¹ Kung parti sa mga ulipon nga nagatuo, dapat tahuron gid ninda ang inda mga amo, agud nga wayà ning may malain nga maihambay sa pangayan ng Dios kag sa aton mga ginatudlò. ² Kag kung ang inda mga amo nagatuo da, indì dapat ninda ibaliwayà na lang ang inda pagtahod sa inda kay mag-utod na sinda kay Kristo. Ang dapat pa gid nganì kuntà hay magserbisyo sinda ning mas maayo kay ang inda pagpangabudlay hay ikaayo ng mga amo nga nagatuo nga ginahigugmà ng Dios. Itudlò kag ibilin nga tumanon gid ang mga ginghambay ko sa imo.

³ Kung ang bisan sin-o nga nagapanudlò ning iba nga wayà nagapareho sa tamà nga ginghambay ni Hesu-Kristo nga aton Ginoo kag wayà nagapareho sa mga pagpanudlò nga makabulig sa pagsunod sa kabubut-on ng Dios, ⁴ ini nga tawo hay habukon pero wayà ning may nasasayuran. Sakit na niya ang magpinangdiskusyon kag magpinangdibati parti sa paggamit ng mga hambay kag ang matatabò lang hay pagkaili, pag-inaway, paghambay ning malain, pagbintang, ⁵ kag permi da siya nagapinangdiskusyon sa mga tawo. Ini nga mga tawo nga nagatudlò ning salà hay balingag ang isip kag wayà makakasayod kung ano ang kamatuuran. Kalaom ninda ang pagpanudlò parti sa Dios hay ikamanggad. ⁶ Pero kung ang tawo hay nagasunod sa kabubut-on ng Dios kag kuntinto na siya sa iya kamutangan, imaw ini ang matuod nga manggad. ⁷ Sa matuod lang, nang gingtawo kita diri sa kalibutan wayà kita ning may gingdaya, kag kung mamatay kita, wayà da kita ning may madaya halin diri sa kalibutan. ⁸ Nganì kung may pagkaon kita kag may barò, dapat kuntinto na kita. ⁹ Pero ang abir sin-o nga gusto magmanggaranon hay mahuyog gid sa mga pagtintar kag masiod sinda sa mga malain nga handom nga magadaya sa inda sa kalukuhan kag kasiraan. ¹⁰ Kay ang pagkahakog sa kuwarta hay imaw ang ginatunaan ng tanan nga klasi ng kalainan. Ang iban nga mga tawo sa subra nga handom sa kuwarta hay nagtayang na sa pagtuo kag tudo ang inda kalisod sa tagipusuon.

¹¹ Pero ikaw nga nagaserbisyo sa Dios, palayui gid ini nga mga bagay. Tinguhai nga magsunod sa kabubut-on ng Dios, magtuo kay Hesus, maging matarong, maging mahigugmaon, maging matiniison sa pagsalig sa Dios sa abir ano nga kahugaan kag maging maluluy-on sa imo isigkatawo. ¹² Pareho sa miyugdyagan sa palumbaan, himua gid ang imo makakaya sa imo pagsunod sa Dios hasta sa katapusan. Tinguhai gid nga mababaton mo ang premyo nga kabuhì nga wayà katapusan. Gingtawag ka ng Dios nga batunon ini nga kabuhì, kag nagpahuo ka nang nagpamatuod ka sa atubangan ng madamò nga mga tawo nga ikaw magasunod sa Dios sa bug-os mo nga kabuhì. ¹³ Sa atubangan ng Dios nga nagatao ning kabuhì sa tanan nga nagakabuhì, kag sa atubangan ni Kristo Hesus nga wayà nahadlok maghambay ning kamatuuran nang ginaimbistigar ni Ponsiyo Pilato, imaw ini ang akon sugò sa imo: ¹⁴ tumana ang tanan nga gingbilin ko sa imo kag siguraduhon mo nga tamà ang imo pagkabuhì agud wayà gid ning may malain nga maihambay laban sa imo hasta nga magpakità si Hesu-Kristo nga aton Ginoo sa iya pagbalik. ¹⁵ Kung parti sa iya pagbalik, matatabò ini sa tamà nga oras nga gingpilì ng Dios nga imaw lang gid ang nagagahom sa tanan. Ini nga Dios hay punò gid ning kalipay. Siya ang Harì nga mas mataas sa tanan nga harì kag Ginoo nga mas mataas sa tanan nga ginoo. ¹⁶ Siya lang ang Dios kag nagakabuhì nga wayà katapusan.^a Siya hay nagaistar sa kahayaghayag nga wayà gid ning may makapalapit. Wayà gid ning may nakakità sa iya o makakità abir sin-o. Sa iya ang padungog kag gahom sa paghaharì nga wayà katapusan. Kabay pa!

¹⁷ Kung parti sa mga manggaranon diri sa kalibutan, hambaya sinda nga indì sinda magpahambog o mag-asa sa inda manggad nga bukon permamenti. Kundì dapat sa Dios lang sinda magsalig nga subra-subra nga nagatao ng tanan nga bagay agud maging malipayon gid kita. ¹⁸ Tudlui sinda nga maghuman ning maayo agud maging manggaranon sinda sa maayo nga ginahuman. Tudlui da sinda nga maging mabinuligon kag maging maatag sa pagtao ng inda mga pagkabutang sa mga nagakahinangyan. ¹⁹ Sa tiyad ini nga paagi, ginapapadakò ninda ang inda mga premyo didto sa langit nga sigurado gid nga indì maduyà kag makabaton sinda ning matuod gid nga kabuhì.

²⁰ Timoteo, bantayi gid agud indì mabag-o ang pagpanudlò parti kay Hesus nga gingsalig sa imo para itudlò sa iban. Likawi ang mga pagtinabil nga wayà ning puyos, nga indì makabulig sa mga tawo sa inda pagsunod sa Dios, kag ang mga pagpanudlò nga wayà nagakayato nga ginatawag ng iban nga ‘kamayad’. ²¹ Ang iban ginaakò nga sinda hay kamayad-mayad, pero tungod sa inà nga ‘kamayad’ nagatayang na sinda kag wayà na ninda masayuri ang tamà nga gusto hambayon sa pagpanudlò parti kay Hesus.

Kabay pa nga ang grasya ng Dios yarà sa indo.