¹ Ayaw paghambayi ning masakit ang maguyang na nga lyaki kundì laygayan mo siya pareho ng imo tatay. Tratuhon mo ang mga sultiro pareho ng imo mga manghod, ² kag ang mga maguyang nga babayi pareho ng imo nanay. Tratuhon mo da ang mga dalaga pareho ng imo mga manghod, nga may malimpyo nga mutibo.

³ Tahuron mo kag buligan ang matuod nga mga bayo nga babayi nga wayà na gid ning may ginasaligan. ⁴ Pero kung ang bayo hay igwa ning mga ongà o mga apo, sinda ang una nga may obligasyon nga magdipara agud makabayos sinda sa inda mga maguyang kay imaw ini ang maayo kag ginabaton ng Dios. ⁵ Ang matuod nga bayo nga babayi nga wayà na gid ning may nagabulig, nagasalig na lang gid sa Dios. Adlaw kag gab-i nagapinangamuyò siya kag nagapangayò ning bulig sa Dios. ⁶ Pero ang bayo nga babayi nga mahilig sa pagpinangalipay nga kalibutanon hay patay na sa panirò ng Dios abir buhì pa siya.^{a 7} Itudlò mo sa mga nagatuo dirà ini nga mga sugò agud wayà ning may malain nga maihambay laban sa inda. ⁸ Kay ang bisan sin-o nga nagatuo nga wayà nagadipara sa iya mga hali, labi na gid sa iya pamilya, nagapakilaya lang nga ginabaliwayà niya ang matuod nga pagpanudlò kag mas malain pa siya sa wayà nagatuo.

⁹ Puydi ilakot sa listahan agud mabuligan ang mga bayo nga mga babayi nga nagaedad 60 paibabaw, isa lang ka beses nag-asawa.^{b 10} Dapat da nga kilaya sinda nga maayo ang inda mga ginahuman, maayo ang inda pagdipara sa inda mga ongà, madiparahon sa mga bisita, malipay nga nagaserbisyo abir sa pinakamababà nga trabaho para sa mga banal nga tawo ng Dios, nagabulig sa mga nahuhugaan kag mahugod maghuman ning abir ano nga maayo.

¹¹ Pero ayaw maglakutan sa listahan agud mabuligan ang mga batà pa nga bayo nga babayi. Kay kung magkahilig kag gusto nga mag-asawa liwat, mapabayaan ninda ang gingpangakò nga indì na mag-asawa liwat agud magserbisyo kay Kristo. ¹² Nganì mababasoy sinda kay wayà ninda pagtumana ang inda una nga pangakò kay Kristo. ¹³ Puyra pa dirà, magatinamad ang mga bayo nga mga batà pa kag permi na lang magpinanumbayay. Kag ang malain pa gid hay magapinangtsismis kag magapinanghilabot sinda sa iban kag magainistorya ng mga bagay nga dapat indì pagaistoryahan. ¹⁴ Nganì kung sa akon, kung tiyad lang da ini ang matabò, mas maayo pa ang mga bayo nga batà pa hay mag-asawa na lang liwat kag magpangongà, kag diparahon ang inda panimayay, agud nga wayà ning bagay nga may maihambay ang mga kalaban nga nagakuntra sa aton. ¹⁵ Kay igwa na ning mga bayo nga nasuhag kag nagsunod na sinda kay Satanas. ¹⁶ Kung may babayi nga nagatuo nga may hali nga mga bayo, dapat siya ang magdipara sa inda agud indì na mabug-atan ang iglesya kag para mabuligan ng iglesya ang matuod nga mga bayo nga wayà na gid ning may ginasaligan.

¹⁷ Kung parti naman sa mga miyugdumaya ng mga nagatuo nga maayo ang inda pagdumaya, dapat tahuron gid sinda kag taw-an ning maayo nga suweldo, labi na gid kung nagapangabudlay sinda sa pagwali kag pagtudlò. ¹⁸ Kay nakasulat sa Kasulatan, “Ayaw magtabuni ang babà ng baka mintras ginagamit sa paggiok agud makakaon.”^c Kag nakasulat pa gid, “Ang trabahador hay dapat bayaran ning tamà.” ¹⁹ Ayaw pagbatuna ang akusasyon laban sa miyugdumaya, puyra lang kung may duha o tuyo nga testigo nga nagapamatuod. ²⁰ Pero kung may miyugdumaya nga nagapadayon sa pagpakasalà, hambayi sa atubangan ng mga nagatuo para hadlukan ang iban nga maghuman ning salà.

²¹ Sa atubangan ng Dios kag ni Kristo Hesus kag ng iya mga anghel, ginabilin ko sa imo nga sundon mo gid ini nga mga sugò nga wayà ning may ginapaburan. Kahinangyan gid nga sa tanan mo nga ginahuman, wayà ka ning may ginaapinan. ²² Ayaw magtungtong ng imo kamot nga daan sa bisan kay sin-o para magtao sa inda ning otoridad nga magdumaya sa mga nagatuo nga wayà anay ginausisà ning maayo, kay kung masayuran nga sinda hay nagapakasalà gihapon, maumid ka sa inda mga salà. Dapat magpalayò ka sa tanan nga malain.

²³ Parti sa imo lawas nga permi nagakasakit, bukon lang tubì ang imo inumon, kundì mag-inom ka da ning maisot nga ilimnanon para sa imo tiyan.

²⁴ Parti liwat sa gingbutang nga mga miyugdumaya, may mga tawo nga abir wayà pa ginausisaa hay sayod na gid ang inda mga salà. Pero ang mga salà ng iban hay masasayuran da sa ulihi pagkatapos sinda mausisà. ²⁵ Imaw da kung maayo ang aton ginahuman. May mga ginahuman kita nga maayo nga nasasayuran nga daan kag may iban nga indì nga daan masayuran pero sa ulihi hay masasayuran da gihapon.