¹ Niyan sa atubangan ng Dios kag ni Kristo Hesus nga mabalik kag magaharì bilang Harì, kag siya ang mahusga sa mga buhì pa kag sa mga patay na, ginabilin ko gid nga ² iwali mo ang mensahe ng Dios. Tinguhai nga ihambay ini sa mga tawo, mamatì man sinda o indì. Sabyawa sinda kung nakasalà, hambayi kung nagahuman kasal-anan, patibaya kung nagapangluya. Ini tanan hay humanon mo nga may mapinasinsyahon kag maayo nga pagpanudlò. ³ Kay magaabot ang tiyempo nga ang mga tawo hay indì na magpamatì sa matuod nga pagpanudlò. Kundì, magasunod sinda sa malain nga mga hilig ng lawas kag magpinangità sinda ning madamò nga manunudlò nga ang ginatudlò hay ang gusto lang ninda nga pamatian. ⁴ Ipasuyod kag ipalapos lang ninda sa talinga ang kamatuuran, kundì ang pamatian ninda hay mga pagpanudlò nga isto-istorya lang. ⁵ Pero ikaw, pugunga ang imo kaugalingon sa tanan nga sitwasyon, tiisa ang kahugaan, himua ang imo trabaho bilang miyugpasayod ng Maayo nga Balità kag tapusa ang imo obligasyon bilang miyugserbisyo ng Dios.

⁶ Kay ang akon kabuhì hay malapit na nga ihalad kag nag-abot na ang oras ng akon pagpanaw diri sa kalibutan. ⁷ Pareho sa karera, gingtinguhà ko ang tanan sa pagdyagan, natapos ko ang palumbaan, naging matutom ako paagi sa pagtuman kag sa pagtudlò ng kamatuuran. ⁸ Nganì may premyo^a nga nagahuyat sa akon. Ang Ginoo nga nagahukom ning pantay gid ang matao sa akon ning premyo sa adlaw ng iya paghukom sa tanan nga tawo. Kag siya da ang magatao ning premyo sa tanan nga nagahandom gid sa iya pagbalik.

⁹ Timoteo, tinguhai gid nga makakari diri nga daan sa akon, ¹⁰ kay gingbayaan ako ni Dimas kag nagkadto siya sa Tesalonika kay mas gingpalabi niya ang kalibutanon nga mga bagay didto; si Krisen naman hay nagkadto sa Galacia kag si Tito hay yadto sa Dalmasya. ¹¹ Si Lukas lang ang akon kaibahan. Pag magkari ka diri, panunta si Marcos kay dakò gid ang iya serbisyo sa akon. ¹² Si Tiquico naman hay gingpakadto ko sa Efeso. ¹³ Pag magkari ka, day-a ang akon barò nga panglamig nga nabilin ko kay Karpo sa Troas, imaw da ang mga libro^b, labi na gid adtong mga nasulat sa panit ng hayop^c.

¹⁴ Si Alihandro nga miyugpanday ning saysayon hay madamò ang nahuman nga malain sa akon. Ang Ginoo ang magabayos sa iya mga ginghuman. ¹⁵ Timoteo, magdahan ka sa iya, kay kuntra gid siya sa aton ginatudlò.

¹⁶ Sa akon una nga pag-atubang sa husgado para magdipinsa, wayà gid ning may nagbulig sa akon. Gingpabay-an ninda ako tanan. Kabay pa nga patawaron sinda ng Dios. ¹⁷ Pero abir tiyad adto ang natabò, wayà gid ako bayai ng Ginoo. Kag gingluwas niya ako sa kamatayon pareho ng pagtabang sa babà ng leon. Gingtaw-an niya ako ning kusog sa pagpasayod ng Maayo nga Balità, nganì mas madamò nga bukon Judio hay nakabatì ini. ¹⁸ Sayod ko nga tabangan ako ng Ginoo sa kada malain nga ataki sa akon hasta nga luwas ako nga day-on pakadto sa iya gingharian sa langit. Sa iya ang pagdayaw nga wayà katapusan! Kabay pa.

¹⁹ Timoteo, kamusta na lang sa mag-asawa nga Akilo kag Prisila, kag sa panimayay ni Onisepuro. ²⁰ Nagpabilin si Erasto sa Korinto; si Tropimo hay gingbilin ko nga may sakit sa Mileto. ²¹ Himua gid ang tanan nga makakari bago mag-abot ang tiglalamig. Ginakamusta ka nina Ebulo, Pudin, Lino, Klawdya kag ng tanan nga kauturan kay Kristo.

²² Kabay pa nga pakusugon ng Ginoo ang indo tagipusuon. Kag kabay pa nga ang grasya ng Dios yarà sa indo tanan.