3
Ang Malain nga mga Tawo sa Ulihi nga mga Adlaw
1 Niyan dapat mo gid maintindihan nga sa ulihi nga mga adlaw may maabot nga mga kaguluhan kag kahugaan. 2 Kay ang mga tawo hay maging makasarili, hakog sa kuwarta, hambugon, hadakon, mang-insulto sa isigkatawo kag sa Dios, masinuwayon sa inda mga ginikanan, bukon mapinasalamaton kag wayà ning rispito sa Dios. 3 Sinda hay wayà ning paghigugmà sa isigkatawo, indì ninda gusto magpakighusay, magapinanglibak sinda, indì ninda gusto magpugong ng sarili, sinda hay mapintas kag hangit sa bisan ano nga maayo. 4 Bukon lang inà, sinda hay traidor, haras-haras, subra nga kahambog, mahilig sa kalipay nga kalibutanon kaysa maghigugmà sa Dios. 5 Magapakuno-kuno lang sinda nga ginatuman ninda ang kabubut-on ng Dios, pero wayà ninda ginabatuna ang gahom ng Dios nga makabag-o ng inda malain nga kabuhì. Likawi ini nga mga tawo.
6 Ang iban sa inda nga manunudlò hay nagakadto sa mga bayay para lukuhon ang mga babayi nga madalì magpati sa salà nga mga pagpanudlò. Ini nga mga babayi hay ginabug-atan na sa mga kasal-anan kag kuntrulado na sinda ng tanan nga malain nga hilig ng lawas. 7 Ini nga mga babayi hay permi nagatuon ning bag-o nga pagpanudlò pero indì makaintindi ng kamatuuran. 8 Ini nga mga manunudlò hay nagakuntra sa kamatuuran pareho nina Hanos kag Hambrosa nga nagkuntra kay Moises. Balingag ang inda isip kag wayà sinda ginabatuna ng Dios kay wayà puyos ang inda pagtuo. 9 Pero indì gid sinda makapadayon sa inda pagpangluko, kay masasayuran ng tanan ang inda kabuangan pareho ng natabò kana Hanos kag Hambros.
Ang Laygay kay Timoteo parti sa Pagtuo kag Pagpanudlò sa Hambay ng Dios
10 Pero ikaw Timoteo, gingsunod mo ang akon ginatudlò, kung pauno ang akon kabuhì, ang rason kung basì ako nagakabuhì, ang akon pagtuo sa Ginoo, ang akon pagpasinsya sa mga tawo, ang akon paghigugmà sa isigkatawo kag ang akon pagtiis sa mga kahugaan. 11 Nakità mo ang subra nga mga pagpasakit sa akon tungod sa pagtuo kag ang mga kahugaan nga akon naagihan sa Antiyok, Iconio kag sa Listrab. Gingtiis ko ini tanan nga natabò sa akon kag gingtabangan ako ng Ginoo. 12 Sa matuod lang, ang tanan nga nagapakig-isa kay Kristo Hesus, nga gusto magkabuhì sunò sa kububut-on ng Dios hay makaagi ning subra nga mga pagpasakit tungod sa pagtuo. 13 Pero ang malain nga mga tawo kag ang mga nagapakuno-kuno para magpangluko hay magapadayon nga mas malain, kag sinda nga nagapangluko hay maluluko da.
Ang Importansya sa Pagsunod sa Kasulatan nga Halin sa Dios
14 Pero ikaw, magpadayon ka sa pagtuman sa mga kamatuuran nga imo natun-an kag imo gid gingpatihan. Sayod mo nga ang mga nagtudlò sa imo hay masasaligan. 15 Kag tunà da nang batà ka pa, sayod mo gid ang Kasulatan nga halin sa Dios, nga makapamayad sa imo parti sa kaluwasan paagi sa pagtuo kay Kristo Hesus. 16 Tanan nga Kasulatan hay gingpasulat ng Dios paagi sa iya gahom sa pagpasayod sa nagsulat. Kag may puyos gid ini sa pagtudlò ng kamatuuran, pagsabyaw ng salà, pagtamà sa malain kag paglaygay kung pauno magkabuhì ning matarong, 17 agud ang tawo nga nagaserbisyo sa Dios hay may kakayahan kag preparado gid sa paghuman ng tanan nga maayo.