¹ Ako si Pedro nga apostol^a ni Hesu-Kristo. Nagapangamusta ako sa indo tanan nga gingpilì ng Dios, nga nagaistar bilang mga estranghiro sa Ponto, Galacia, Capadocia, Asya kag Bitinia. ² Gingpilì kamo ng Dios nga Amay tunà pa nang una sunò sa iya gingplano nga humanon niya kamo bilang iya mga ongà paagi sa Espiritu Santo, agud tumanon nindo si Hesu-Kristo kag patawaron kamo sa indo salà paagi sa iya dugò.

Kabay pa nga mabaton nindo ang dugang pa gid nga grasya kag katawhayan.

³ Dayawon ang Dios, nga imaw ang Dios ng aton Ginoong Hesu-Kristo kag iya da Amay. Tungod sa iya kadakò nga kaluoy, natawo na kita liwat^b paagi sa pagkabuhì liwat ni Hesu-Kristo. Ini nga bag-o nga kabuhì ang nagatao sa aton ning dakò nga paglaom ⁴ nga gingpangakò sa aton ng Dios. Ini nga pagpakamaayo nga gingpangakò ng Dios hay didto sa kalangitan nga indì gid maduduyà, wayà gid ning kasawayan, kag indì gid magakupas. ⁵ Kag paagi sa indo pagtuo, ginadahanan kamo ng gahom ng Dios mintras nagahuyat kamo ng kaluwasan nga gingpreparar na ng Dios nga ipasayod sa ulihi nga mga adlaw. ⁶ Tungod diri, magkalipay kamo abir may nagaabot nga mga sarìsarì nga pagtilaw ng kalisod, kay ini nga mga pagtilaw temporaryo lang. Dapat gid ini nga maagihan nindo ⁷ agud matistingan ang indo pagtuo kung matuod gid o bukon. Pareho ini ng bulawan nga ginapaagi sa kalayo agud masayuran kung puro o bukon. Pero mas importante ang aton pagtuo kaysa sa bulawan nga naduduyà. Nganì kung mapamatuuran ang indo pagtuo hay tunay gid, dayawon niya kamo kag padunggan pag-abot ni Hesu-Kristo. ⁸ Abir wayà kamo nakakità sa iya, ginahigugmà nindo siya. Kag nagatuo kamo sa iya abir wayà pa nindo siya nakikità hasta niyan. Imaw inà nga ang indo kalipay hay makatitingaya kag indì gid maisplikar, ⁹ kay ginabaton na nindo ang resulta ng indo pagtuo nga imaw ang kaluwasan ng indo espiritu.

¹⁰ Ini nga kaluwasan hay ging-usisà ning maayo ng mga miyugbalità ng mensahe ng Dios. Sinda ang nagpasayod ng mensahe nang una, pero niyan nag-abot ini sa aton parti sa pagpakamaayo ng Dios. ¹¹ Gingpasayod na sa inda nang una ng Espiritu ni Kristo nga nagaistar sa inda nga magaagi si Kristo sa kasakit kag pagkatapos inà padunggan siya. Nganì ang mga miyugbalità ng mensahe ng Dios dati hay padayon sa inda pag-usisà kung san-o kag kung pauno ini matabò. ¹² Gingpasayod da sa inda ng Dios nga ang mga butang nga inda ginabalità hay bukon para sa inda kaayuhan kundì para sa aton^c. Kag niyan nabatian na nindo ang inda mga ginapasayod paagi sa mga nagapasayod ng Maayo nga Balità. Nagwali sinda sa indo paagi sa gahom ng Espiritu Santo nga gingpadaya sa inda halin sa langit. Kag bisan ang mga anghel hay nagahandom gid nga maintindihan ining Maayo nga Balità nga gingpasayod sa indo.

¹³ Nganì kahinangyan maging preparado gid kamo permi sa paghuman ng kabubut-on ng Dios, magpugong ng indo kaugalingon, kag magsalig ning hugot nga mabaton nindo ang pagpakamaayo nga itao sa indo pag mag-abot si Hesu-Kristo. ¹⁴ Bilang matinumanon nga mga ongà ng Dios, indì kamo magpadaya-daya sa malain nga mga handom nga nagagahom sa indo nang wayà pa kamo ning relasyon sa Dios. ¹⁵ Banal ang Dios nga nagtawag sa indo, nganì dapat magpakabanal da kamo sa tanan nindo nga ginahuman. ¹⁶ Kay nagahambay ang Dios sa Kasulatan, “Magpakabanal kamo, kay ako hay banal.”^d

¹⁷ Ang Dios hay wayà ning may ginapalabi. Nagahukom siya sa tanan nga tawo sunò sa inda ginghuman. Nganì kung ginatawag nindo siya nga Amay sa indo pangamuyò, tahura nindo siya mintras yari pa kamo bilang estranghiro sa kalibutan. ¹⁸ Nasayuran da nindo kung ano ang gingbayad agud maluwas kamo halin sa pagkabuhì nindo nga wayà ning puyos nga indo gingpanublì sa indo mga kalulo-lulohan. Ang gingtubos sa indo hay bukon mga butang nga naduduyà pareho ng bulawan o pilak, ¹⁹ kundì ang kamahay-mahay nga dugò ni Kristo. Pareho siya ng karnero nga wayà gid ning deperensya kag buling nga ginghalad sa Dios. ²⁰ Bago pa nahuman ang kalibutan, gingpilì na ng Dios si Kristo nga maging aton Manluluwas. Pero gingpakilaya siya ng Dios sa ini nga ulihi nga mga adlaw. Ginghuman niya ini para sa indo. ²¹ Kag paagi kay Kristo nagatuo kamo sa Dios nga nagbuhì kag nagpadungog sa iya, nganì ang indo pagtuo hay sa Dios kag nagasalig kamo sa iya.

²² Kag tungod nga nagasunod na kamo sa kamatuuran, ginglimpyo na kamo sa indo mga salà agud may matuod kamo nga paghigugmà sa indo mga kauturan kay Kristo. Kabay pa nga maghigugmaanan kamo ning hugot gid sa indo tagipusuon, ²³ kay natawo na liwat. Kag ini hay bukon paagi sa indo mga ginikanan nga may kamatayon, kundì paagi sa buhì kag wayà katapusan nga hambay ng Dios. ²⁴ Nakasulat sa Kasulatan,