¹ Tungod natawo na kamo liwat, bayai na nindo ang tanan nga klasi ng kalainan. Ayaw kamo magpangluko o magpakunukuno. Indì kamo magkasina o maghambay ning malain kuntra sa indo isigkatawo. ² Pareho ng lapsag nga nagahandom ning gatas ng iya nanay, handuma da nindo ang puro nga espiritwal nga gatas agud magbahoy kamo hasta mabaton nindo ang kabilugan ng indo kaluwasan. ³ Kay naagihan na nindo nga ang Ginoo hay maayo gid.

⁴ Siya ang buhì nga bato nga gingsikway ng mga tawo pero gingpilì ng Dios, kag importante sa iya panirò. Kag mintras nagapalapit kamo sa iya, ⁵ kamo nga pareho da ng buhì nga mga bato hay ginapatindog ng Dios para maging isa ka espiritwal nga bayay. Kag bilang mga parì nga ginglain para sa Dios, nagahalad kamo sa iya ning espiritwal nga mga halad nga makatao kalipay sa iya, kay ginahuman nindo ini paagi kay Hesu-Kristo. ⁶ Parti kay Hesu-Kristo, nagahambay ang Dios sa Kasulatan,

⁹ Pero, kamo hay gingpilì ng Dios, mga parì nga nagaserbisyo sa Harì, isa ka nasyon nga mga banal nga tawo ng Dios, kag kamo hay naging sa iya agud ipasayod ang iya subra nga kaayo nga mga ginghuman. Gingtawag niya kamo paluwas halin sa kaduyom pakadto sa iya makatitingaya nga kahayag. ¹⁰ Nang una, bukon kamo mga tawo ng Dios, pero niyan kamo hay mga tawo na ng Dios. Nang una, wayà kamo gingkaluy-i ng Dios, pero niyan, ginakaluy-an niya kamo.

¹¹ Mga pinalanggà, ang kalibutan hay bukon permamenti nga istaran nindo, kag mga estranghiro lang kamo diri. Nganì nagapangabay ako sa indo nga likawi na nindo ang malain nga mga handom ng indo lawas nga nagakuntra gid sa indo espiritu. ¹² Ipakità nindo sa mga tawo nga wayà relasyon sa Dios ang indo maayo nga pagkabuhì. Abir kamo hay ginapabintangan ninda niyan nga nagahuman kamo ning malain, makikità ninda nga maayo galì ang indo ginahuman. Sa ulihi dayawon ninda ang Dios sa adlaw ng iya pag-abot.

¹³ Tungod sa Ginoo, magpasakop kamo sa tanan nga tawo nga nagadumaya: maging sa harì nga imaw ang may pinakamataas nga otoridad, ¹⁴ o sa mga gobernador nga imaw ang gingtaw-an ning gahom ng harì, nga magparusa sa mga nagahuman ning malain kag magpadungog sa mga nagahuman ning maayo. ¹⁵ Kay imaw ini ang kabubut-on ng Dios, agud kung maghuman kamo ning maayo, wayà ning mahahambay kuntra sa indo ang mga tawo nga nagapinaluko nga kuyang makaintindi. ¹⁶ Hilway na kamo, pero bukon ini mahambay nga hilway da kamo para maghuman ning malain; kundì magkabuhì kamo bilang mga ulipon ng Dios. ¹⁷ Tahura nindo ang tanan nga tawo, kag higugmaa nindo ang indo mga kauturan kay Kristo. Magkabuhì kamo nga may kahadlok sa Dios, kag tahura nindo ang harì.

¹⁸ Kamo nga mga ulipon, tumana nindo ang indo mga amo nga may tudo nga kahadlok sa Dios, bukon lang ang mabuot nga mga amo kundì patì da ang mga mapintas. ¹⁹ Kay pakamaayuhon gid kamo ng Dios kung ginatiis nindo ang mga kahugaan tungod sa sayod na nindo tumanon ang kabubut-on ng Dios, abir wayà kamo ning salà nga nahuman. ²⁰ Pero kung sakiton kamo tungod sa indo ginahuman nga malain, dayawon ba kamo ng Dios bisan ginatiis nindo ang parusa nga inà? Siyempre indì! Pero kung ginasakit kamo abir maayo ang indo ginahuman, kag kung ginaagwanta nindo ini, kaluy-an gid kamo ng Dios. ²¹ Ang pagpakasakit ni Kristo para sa aton hay imaw ang halimbawà nga dapat naton patuyaran. Kag imaw ini ang kabangdanan kung basì gingtawag kita, agud masunod ta ang pagkabuhì ni Kristo. ²² Wayà gid siya nakasalà, kag wayà gid nagpinusong. ²³ Ging-insulto siya, pero wayà gid siya nagbayos ning insulto. Gingsakit siya, pero wayà gid siya nagpamahog. Nagsalig siya sa Dios nga imaw ang nagahukom ning tamà. ²⁴ Si Kristo mismo ang nag-akò ng aton mga salà nang siya hay ginglangsang sa krus, agud indì na kita magpakasalà kundì magkabuhì kita ning matarong. Tungod kay nag-antos siya sa mga pilas, kita hay nag-ayo. ²⁵ Nang una, pareho kita sa mga karnero nga nagtayang, pero niyan nakabalik na kita sa Ginoo nga Miyugdipara kag Miyugbantay ng aton kabuhì.