Ining pangaduha nga sulat ni Pedro nga Apostolis hay gingsulat niya nang malapit na siya patyon. Wayà ning pangayan kung diin ini niya gingpadaya. Sa kapitulo uno bersikulo uno, hambay lang ni Pedro, “...ang iya gingtao sa indo nga pribilehiyo tungod sa indo pagtuo hay pareho da sa gingtao sa amon.” Pero sa kapitulo tres bersikulo uno, hambay niya, “... ini ang akon ikaduha nga sulat sa indo.” Nganì kung ang una nga sulat hay ang Una nga Sulat ni Pedro, pareho nga mga tawo ang iya gingsulatan sa ini nga sulat; ini ang mga nagatuo sa lima nga probinsya ng Roma sa Asya Menor (1 Pedro 1:1).

Gingsulat ini ni Pedro sa duha ka kabangdanan. Una, gusto niya nga pakusugon ang mga nagatuo nga makabasa ng ini nga sulat; nga magpadayon sinda nga magsalig, kag magtiis sa gingtudlò sa inda nga mga kamatuuran. Pangaduha, gingpaandaman niya sinda kuntra sa mga bukon matuod nga manunudlò nga gusto ninda nga dayaon ang mga nagatuo.

Sa ini nga sulat, madamò ang magkakapareho sa mga gingsulat ni Judas. Halimbawà, sa kapitulo dos kompara sa Judas bersikulo 4-18.