¹ Nganì niyan, bilang ako hay isa ka miyugdumaya ng mga nagatuo, may ibibilin ako sa indo nga mga miyugdumaya da. Nakità ko mismo ang mga kasakit ni Kristo kag makakaparte da ako ng iya gahom kag himayà sa iya pag-abot, nagapangabay ako sa indo ² diparaha ning maayo ang mga gingpilì ng Dios nga yarà sa indo poder. Pareho sinda sa mga karnero kag kamo ang mga pastor sa inda. Dapat halin sa tagipusuon ang indo pagdipara sa inda kay imaw ini ang kabubut-on ng Dios, bukon nga napilitan lang kamo o may ginapaabot kamo nga suhoy, kundì tungod gusto gid nindo nga makabulig sa inda. ³ Ayaw kamo magharì-harì sa mga nagatuo nga gingtugyan sa indo para diparahon, kundì maging halimbawà kamo sa inda. ⁴ Kag pag-abot ni Kristo nga Pinakapunò nga Pastor, mababaton nindo ang premyo nga makatitingaya gid kag wayà gid nagakupas.^a

⁵ Kag kamo naman nga mga kabataan, magpasakop kamo sa mga maguyang. Kag kamo tanan nga mga nagatuo, magpakababà kamo kag magserbisyo sa isa kag isa, kay nakasulat sa Kasulatan, ‘Ginakuntra ng Dios ang hambugon, pero ginakaluy-an niya ang mapainubuson.’^{b 6} Nganì magpasakop kamo sa Dios nga Makagagahom para maghusga sa mga hambugon, kay magaabot ang adlaw nga pagahimayaon niya kamo. ⁷ Isalig nindo sa iya ang tanan nindo nga kabayak-on kay nababayaka siya sa indo.

⁸ Magpreparar kamo kag magbantay! Kay ang indo kaaway nga si Satanas hay nagalibot-libot pareho ng leon nga nagangurob kag nagapangità ning masisirà. ⁹ Palig-una nindo ang indo pagtuo sa Dios kag batui nindo si Satanas. Dumduma nindo nga ang tanan nga mga kauturan nindo kay Kristo sa bilog nga kalibutan hay naaagihan da ang kahugaan nga pareho sa indo. ¹⁰ Matag-od na lang nga tiyempo ang indo pagtiis. Pagkatapos inà, ang Dios imaw ang magabulig sa indo agud wayà na ning kuyang ang indo pagkabuhì, kag siya ang magapalig-on kag magapakusog sa indo, agud ang indo pagtuo hay indì magpangluya. Kay siya ang ginahalinan ng tanan nga pagpakamaayo, kag gingpilì niya kamo agud makaparte da kamo ng iya wayà katapusan nga gahom kag dangal paagi sa indo pakig-isa kay Kristo. ¹¹ Sa Dios nga nagagahom hasta sa wayà katapusan. Kabay pa!

¹² Gingsulat ko sa indo ining matag-od nga sulat sa bulig ni Silvano. Siya hay utod naton kay Kristo kag masaligan gid. Kabay pa nga paagi sa sulat nga ini, napakusog ko kamo kag napamatuuran ko ang kaayuhan ng Dios sa aton. Maghuman ning maayo sa iba pareho ng Dios nga nagahuman ning maayo sa aton.

¹³ Ang mga nagatuo sa Rome^c hay nagapangamusta sa indo. Sinda hay pareho da sa indo nga gingpilì ng Dios nga maging iya mga ongà. Si Marcos nga ginakabig ko nga akon ongà hay nagapangamusta da sa indo. ¹⁴ Magkamustahanan kamo nga may matuod nga paghigugmà^d.

Sa indo tanan nga nagpakig-isa kay Kristo, kabay pa nga ang katawhayan hay yarà sa indo.