¹ Tungod si Kristo hay nagpakasakit sa iya lawas, dapat maging preparado da kamo nga magtiis. Kay ang tawo nga nagpakasakit sa iya lawas hay wayà na nagapadayon sa pagpakasalà. ² Wayà na siya nagasunod sa malain nga handom ng iya lawas kundì nagasunod na siya sa kabubut-on ng Dios mintras nagakabuhì pa siya sa iya nabibilin nga adlaw. ³ Kay tamà na ang inda mga gingpanghuman nga mga malain nga butang nang una, kag adtong mga butang hay ang gusto humanon ng mga tawo nga wayà relasyon sa Dios. Dati, nagpagusto lang kamo sa pag-inuyag, pagsunod sa mga malain nga handom ng lawas; pagbinayong, pagkahilig sa kalibutanon nga kalipay, pagtipon permi agud mag-inom kag maghuman ning makahuhuyà nga mga butang; kag pagsamba sa mga dios-diosan kaibahan ang paghuman ng kalain-lain nga mga butang. ⁴ Nganì niyan ang mga tawo nga wayà relasyon sa Dios hay natingaya sa indo kung basì wayà na kamo nagalakot sa inda malain nga pagkabuhì. Imaw inà nga nagahambay sinda ning malain kuntra sa indo. ⁵ Pero manabat sinda sa Dios sa mga butang nga inda ginahuman, kay ang Dios hay magahusga sa tanan nga tawo, buhì man o patay na. ⁶ Imaw ini ang kabangdanan kung basì gingpasayod ang Maayo nga Balità sa mga tawo nga niyan hay patay na, agud abir patay na sinda niyan sa inda lawas, (kay imaw ini ang husga ng Dios sa tanan nga tawo),^a mabubuhì gihapon sinda pareho ng Dios nga espiritu.

⁷ Malapit na ang katapusan ng kalibutan. Nganì magkabuhì kamo ning tamà kag disiplinaha nindo ang indo isip agud makapangamuyò kamo. ⁸ Kag labaw sa tanan, maghigugmaanan kamo ning hugot sa indo tagipusuon. Kay kung may paghigugmà kamo sa indo isigkatawo, makapatawad gid nindo siya bisan madamò ang iya nahuman nga salà. ⁹ Batuna nindo ang isa kag isa sa indo mga bayay nga wayà ning reklamo. ¹⁰ Kada isa sa aton hay gingtaw-an ng Dios ning abilidad. Gamiton ta ini para sa kaayuhan ng isa kag isa bilang maayo nga mga gingsaligan ng ining iba-iba nga mga abilidad halin sa Dios. ¹¹ Abir sin-o ang magwali, kahinangyan nga dumdumon niya nga hambay ng Dios ang iya ginawali! Kag abir sin-o ang gingtaw-an ng abilidad sa pagbulig sa iban, dapat siya magbulig sunò sa iya makakaya nga gingtao ng Dios, agud madayaw ang Dios sa tanan nga indo ginahuman paagi kay Hesu-Kristo. Makagagahom siya kag angay dayawon hasta sa wayà katapusan. Kabay pa!

¹² Mga pinalanggà, ayaw kamo matingaya sa mabug-at nga mga pagtilaw nga indo naagihan. Pag ginatilawan ang indo pagtuo, ayaw kamo maghunahunà nga kung ano na gid ang matatabò sa indo. ¹³ Kundì, magkalipay kamo, kay nagapakig-isa kamo sa mga kasakit ni Kristo. Kag magiging kumplito gid ang indo kalipay pag maipakità niya sa tanan nga siya hay magkakagahom kag makatitingaya. ¹⁴ Kung ginainsulto kamo tungod kamo hay mga tagasunod ni Kristo, magkalipay kamo kay yarà sa indo ang makagagahom nga Espiritu, nga imaw ang Espiritu ng Dios. ¹⁵ Kung ginaparusahan kamo, dapat hay bukon tungod sa nakapatay kamo ning tawo, o nagpangawat, o naghuman ning malain, o nagpanghilabot sa ginahuman ng iban. ¹⁶ Pero kung parusahan kamo kay kamo hay Kristiano, indì kamo dapat magkahuyà, kundì magpasalamat pa nganì kamo sa Dios tungod nga ginatawag kamo sa inà nga pangayan.

¹⁷ Kay nag-abot na ang tiyempo nga magatunà una sa iya mga ongà ang Dios sa paghukom. Kag kung ini magatunà sa aton una nga iya mga ongà, ano pa gid ang dadangatan ng mga wayà nagasunod sa Maayo nga Balità ng Dios?

¹⁸ Pareho ng nakasulat sa Kasulatan,