¹ Ako si Simon Pedro nga ulipon kag apostol^a ni Hesu-Kristo. Nagapangamusta ako sa indo nga nagatuo kay Hesu-Kristo nga aton Dios kag Manluluwas. Kag tungod matarong siya, ang iya gingtao sa indo nga pribilehiyo tungod sa indo pagtuo hay pareho da sa gingtao sa amon.

² Kabay pa nga mabaton nindo ang dugang pa gid nga grasya kag katawhayan tungod sa indo pagkakilaya sa Dios kag kay Hesus nga aton Ginoo.

³ Paagi sa gahom ng Dios, gingtao niya ang tanan naton nga kahinangyanon nga makabulig sa aton para magkabuhì kita sa iya kabubut-on. Ini hay tungod sa aton pagkakilaya sa iya nga nagtawag sa aton paagi sa iya kahimayaan kag maayo nga pamatasan. ⁴ Tungod diri, gingtaw-an niya kita ning kamahay-mahay kag importante gid nga mga promisa, agud paagi sa ini nga mga promisa malikawan ta ang makakasirà sa aton, nga halin sa malain nga handom ng mga tawo nga wayà relasyon sa Dios, kag agud makaparte kita sa iya diosnanon nga kinaugalì. ⁵ Para maabot ini, tinguhaa gid nga idugang sa indo pagtuo ang maayo nga pamatasan; sa maayo nga pamatasan, ang kamayad; ⁶ sa kamayad, ang pagpugong sa kaugalingon; sa pagpugong sa kaugalingon, ang pagkamainantuson; sa pagkamainantuson, ang pagsunod; sa kabubut-on ng Dios; ⁷ sa pagsunod sa kabubut-on ng Dios, ang paghigugmà sa indo mga kauturan; kag sa paghigugmà sa indo mga kauturan, ang matuod nga paghigugmà sa tanan.

⁸ Kung nagapadayon kamo nga madugangan pa gid ini nga mga kinaugalì sa indo kabuhì, nagapakità ini ng indo pagkakilaya parti sa aton Ginoong Hesu-Kristo nga nagapapinuslanon kag nagapabinungahon sa indo kabuhì. ⁹ Pero ang abir sin-o nga wayà ng ini nga mga kinaugalì hay wayà ning pang-intindi sa kamatuuran nga pareho sa buta; nakalimutan niya nga gingpatawad na ng Dios ang iya nagligad nga mga salà.

¹⁰ Nganì mga kauturan ko kay Kristo, tinguhaa gid nga masiguro nindo nga kamo hay matuod nga tinawag kag gingpilì ng Dios. Kay kung humanon nindo ang mga ini, indì gid kamo mahuyog sa kasal-anan, ¹¹ kundì kamo hay batunon gid nga may kalipay ng Dios sa wayà katapusan nga paghaharì ng aton Ginoo kag Manluluwas nga si Hesu-Kristo.

¹² Nganì padayon ko nga ipadumdom sa indo ang parti sa ini nga mga butang, abir nasayuran na nindo ini kag malig-on na kamo sa kamatuuran nga gingtudlò sa indo. ¹³ Kung sa akon, tamà gida nga magpadumdom ako sa indo mintras buhì pa ako. ¹⁴ Kay nasayuran ko nga indì na gid ako magdugay sa ini nga kalibutan, tungod gingpasayod na ini sa akon ng aton Ginoong Hesu-Kristo. ¹⁵ Kag nagatinguhà gid ako nga abir wayà na ako, madumduman gihapon nindo ining akon mga ginatudlò.

¹⁶ Ang amon gingpasayod sa indo parti sa gahom ng aton Ginoong Hesu-Kristo kag sa iya pagbalik hay bukon basi sa mga kamayaran nga humanhuman lang nga istorya, kundì nakità namon ng amon mga matà ang iya gahom. ^17,18 Kami hay kaibahan ni Hesus didto sa bukid ng Dios^b nang gingpadungan kag ginghimayà siya ng Dios nga Amay. Nang adto nga tiyempo, nabatian niya ang bosis ng Dios nga Pinakamakagagahom nga ang hambay, “Imaw ini ang akon pinalanggà nga Ongà. Nalipay gid ako sa iya.” Ini nga bosis nga halin sa langit hay nabatian namon.

¹⁹ Nganì labi nga naglig-on ang amon pagpati sa gingsulat ng mga mensahiro ng Dios. Mas makakaayo sa indo kung pamatian gid nindo ini, kay ini nga mga mensahe hay pareho sa iwagan nga nagahayag sa maduyom nga lugar hasta mag-abot ang adlaw sa aga nga si Kristo. Pareho da siya ng bituon sa aga-aga nga magahayag sa indo hunahunà.^{c 20} Labaw sa tanan, tandai gid nindo ini: ang tanan nga nakasulat sa Kasulatan hay bukon halin sa kaugalingon nga pang-intindi ng mga miyugbalità ng mensahe ng Dios. ²¹ Kay abir san-o pag naghambay sinda, wayà sinda naghambay sunò sa inda kaugalingon nga hunahunà, kundì ini hay halin sa Dios kag naghambay sinda paagi sa gingpasayod sa inda ng Espiritu Santo.