¹ Ang abir sin-o nga nagatuo nga si Hesus ang Kristo^a hay gingtaw-an ning bag-o nga kabuhì halin sa Dios, kag ang abir sin-o nga nagahigugmà sa Dios nga Amay nga nagtao ning bag-o nga kabuhì, hay nagahigugmà da sa mga gingtaw-an ning bag-o nga kabuhì halin sa Dios. ² Kung ginahigugmà naton ang Dios kag ginasunod ang iya mga sugò, nasasayuran naton nga ginahigugmà ta ang mga ongà ng Dios. ³ Kay ang paghigugmà sa Dios hay ang pagsunod naton sa iya mga sugò. Kag ang iya mga sugò hay bukon gid masyado mahugà sundon. ⁴ Kay ang tanan nga gingtaw-an ning bag-o nga kabuhì halin sa Dios hay nakakadaog sa mga paagi ng kalibutan nga kuntra sa kagustuhan ng Dios. Kag gingperdi naton ini paagi lang gid sa aton pagtuo kay Kristo. ⁵ Sin-o ang makakadaog sa mga paagi ng kalibutan nga kuntra sa kagustuhan ng Dios? Wayà ning iban kundì ang nagatuo nga si Hesus hay Ongà ng Dios.

⁶ Si Hesu-Kristo gid hay nag-abot sa kalibutan, gingbawtismuhan sa tubì kag nag-ilig ang iya dugò hasta nga siya namatay. Bukon lang paagi sa tubì kundì sa dugò, ini hay nagpamatuod nga siya ang Ongà ng Dios. Ang Espiritu Santo nagpamatuod da parti diri kag sayod naton nga matuod ini kay ang Espiritu hay nagahambay ning matuod. ⁷ Nganì, igwa gida ning tuyo nga nagapamatuod parti kay Hesus: ⁸ ang Espiritu Santo, ang tubì kag ang dugò. Kag ining tuyo hay nagakaisa sa pagpamatuod. ⁹ Gingpatihan naton ang pamatuod ng mga tawo, pero mas masaligan gid ang pamatuod ng Dios kag siya mismo ang nagpamatuod parti sa iya Ongà. ¹⁰ Ang abir sin-o nga nagatuo sa Ongà ng Dios hay nagapati sa pamatuod ning hugot sa pamatuod sa iya tagipusuon. Pero ang indì magtuo sa Dios hay ginahuman nga pusong ang Dios, kay indì siya magpati sa ini nga pamatuod parti sa Ongà ng Dios. ¹¹ Imaw ini ang pamatuod: gingtao sa aton ng Dios ang kabuhì nga wayà katapusan kag ini nga kabuhì hay halin sa iya Ongà. ¹² Ang igwa madayom nga relasyon sa Ongà ng Dios hay igwa ning kabuhì nga wayà katapusan. Pero ang wayà relasyon sa iya Ongà hay wayà ning tiyad ini nga kabuhì.

¹³ Ginasulat ko ini sa indo agud masigurado nindo nga kamo nga nagatuo sa Ongà ng Dios^b hay igwa ning kabuhì nga wayà katapusan. ¹⁴ Kag sigurado gid nga kada kita magpalapit kag magpangayò ng abir ano nga bagay sunò sa kabubut-on ng Dios, nagapamatì siya sa aton. ¹⁵ Kag kung sigurado kita nga siya hay nagapamatì sa aton pag kita nagapangabay, sigurado gid nga itatao niya ang abir ano nga aton ginapangayò.

¹⁶ Niyan ang abir sin-o nga makakità sa iya utod kay Kristo nga nagahuman ning kasal-anan nga indì ikamatay espiritwal, kahinangyan ipangamuyò niya sa Dios para adto nga tawo pagataw-an ning kabuhì. Ini hay para lang sa mga nakahuman ning salà nga indì ikamatay espiritwal. Pero parti sa salà nga ikamatay espiritwal, wayà ako nagasiling nga ipangamuyò nindo ang tawo nga nakahuman ng tiyad ini nga salà. ¹⁷ Ang tanan nga ginahuman nga bukon matarong hay kasal-anan, pero puydi pa mapatawad, puyra sa salà nga ikamatay espiritwal.

¹⁸ Sayod naton nga ang abir sin-o nga gingtaw-an ning bag-o nga kabuhì halin sa Dios hay wayà nagapadayon sa pagpakasalà kay ginadahanan siya ng Ongà ng Dios kag wayà ning malain nga mahuhuman si Satanas sa iya. ¹⁹ Sayod da naton nga kita hay mga ongà ng Dios pero ang tanan nga tawo nga wayà relasyon sa Dios hay sa idayom ng gahom ni Satanas. ²⁰ Sayod naton nagkari ang Ongà ng Dios sa kalibutan kag gingtaw-an kita ning pang-intindi agud may madayom kita nga relasyon sa matuod nga Dios kag kita hay nagapakig-isa sa iya, kay kita hay nagapakig-isa sa iya Ongà nga si Hesu-Kristo. Siya imaw ang matuod nga Dios kag siya ang ginahalinan ng kabuhì nga wayà katapusan.

²¹ Mga ongà ko sa pagtuo, palayò kamo sa mga bagay nga puydi makailis sa Dios sa indo tagipusuon^c.