¹ Mga pinalanggà ko, ayaw nindo pagpatihi nga daan ang abir sin-o nga nagahambay nga ang iya ginatudlò hay paagi sa Espiritu Santo, kundì tistingon gid anay ang pagpanudlò kung halin sa Dios o bukon. Kay kadamò ang bukon matuod nga mga miyugbalità ng mensahe ng Dios nga nagkadto abir diin sa kalibutan. ² Paagi sa iya pagpanudlò masasayuran naton kung sin-o ang igwa ning Espiritu ng Dios. Ang abir sin-o nga nagatudlò nga si Hesu-Kristo nagkari sa kalibutan bilang tawo, ang iya pagpanudlò hay halin sa Dios. ³ Ang abir sin-o nga nagatudlò nga si Hesus wayà nagkari sa kalibutan bilang tawo, ang iya pagpanudlò bukon halin sa Dios. Ang tiyad ini nga tawo hay kaibahan ng Nagakuntra kay Kristo. Nabatian nindo nga maabot ini kag niyan hay yari na sa kalibutan.

⁴ Mga ongà ko sa pagtuo, kamo hay sa Dios. Nagdaog na kamo laban sa mga bukon matuod nga mga miyugbalità ng mensahe ng Dios, kay ang Espiritu nga yarà sa indo hay makagagahom kaysa espiritu nga si Satanas nga yarà sa mga tawo nga nagakuntra sa kagustuhan ng Dios. ⁵ Sinda hay sa ini nga kalibutan nga wayà nagabaton sa Dios, nganì ang inda ginatudlò hay parti sa kalibutanon nga mga bagay kag nagapati sa inda ang mga tawo nga wayà relasyon sa Dios. ⁶ Pero kita gid hay sa Dios, nganì ang abir sin-o nga may madayom nga relasyon sa Dios hay nagapati sa aton. Pero ang wayà relasyon sa Dios, wayà nagapati sa aton. Sa ini nga paagi, makikilaya naton kung sin-o ang nagatudlò ning kamatuuran halin sa Espiritu Santo kag halin sa espiritu nga nagapangluko.

⁷ Mga pinalanggà ko, maghigugmaanan kita kay ang paghigugmà hay halin sa Dios. Ang abir sin-o nga nagahigugmaanan ang gingtaw-an ning bag-o nga kabuhì halin sa Dios, kag may madayom nga relasyon sa Dios. ⁸ Ang wayà nagahigugmaanan wayà madayom nga relasyon sa Dios, kay ang kinaugalì ng Dios hay mahigugmaon.

⁹ Gingpakità ng Dios ang iya paghigugmà sa aton nang gingsugò ang iya bugtong nga Ongà diri sa kalibutan para paagi sa iya pagkamatay sa krus, magkaigwa kita ning kabuhì nga wayà katapusan. ¹⁰ Imaw ini ang matuod nga paghigugmà: bukon ang paghigugmà naton sa Dios kundì ang iya paghigugmà sa aton kung sa diin gingtao niya ang iya Ongà agud maging sakripisyo para sa kapatawaran ng aton mga kasal-anan.

¹¹ Mga pinalanggà ko, kay ginghigugmà kita ng Dios ning tiyad ini kadakò, dapat da nga maghigugmaanan kita. ¹² Wayà ning tawo nga nakakità sa Dios, pero kung kita hay nagahigugmaanan, siya hay nagapabilin nga nagapagkig-isa sa aton kag ang iya paghigugmà hay nababatyagan paagi sa aton paghigugmaanan nga natatabò sunò sa iya kagustuhan.

¹³ Nasayuran naton nga kita hay nagapabilin nga nagapagkig-isa sa Dios kag siya sa aton, kay gingtao ng Dios ang iya Espiritu sa aton. ¹⁴ Amon gid nakità kag nakaibahan si Hesus, niyan amon ginapamatuuran nga gingsugò ng Dios nga Amay ang iya Ongà bilang Manluluwas ng tanan nga tawo sa kalibutan. ¹⁵ Ang nagahambay ning matuod nga si Hesus, Ongà ng Dios hay nagapabilin nga nagapagkig-isa sa Dios kag ang Dios sa iya. ¹⁶ Nasayuran naton kag gingpatihan nga ginahigugmà gid kita ng Dios. Ang kinaugalì ng Dios hay mahigugmaon, ang abir sin-o nga nagahigugmà pareho ng Dios hay nagapabilin nga nagapagkig-isa sa Dios kag ang Dios sa iya. ¹⁷ Mintras kita nagapabilin nga nagapagkig-isa sa Dios, ang aton paghigugmà hay natabò sunò sa iya kagustuhan, nganì wayà kita ning kahadlok sa adlaw ng paghusga, kay makakaatubang kita nga wayà ning kahadlok kay ginapatuyaran naton si Hesu-Kristo mintras yari kita sa kalibutan. ¹⁸ Wayà ning kaibahan nga kahadlok ang matuod nga paghigugmà kay ginaduyà ng paghigugmà ang kahadlok. Bukon pa gid perpikto ang paghigugmà ng tawo nga nahahadlok, kay ang kahadlok hay may kaibahan nga parusa. ¹⁹ Nagahigugmà kita kay ang Dios ang una nga naghigugmà sa aton. ²⁰ Kung may nagahambay nga, “Ginahigugmà ko ang Dios”, pero nagatanom ning kahangit sa iya utod kay Kristo, siya hay bakakon. Kay kung ang iya utod kay Kristo nga nakikità indì niya mahigugmà, ang Dios pa arà nga indì nakikità? ²¹ Imaw ini ang sugò nga gingtao niya: ang nagahigugmà sa Dios kahinangyan da nga maghigugmà sa iya utod kay Kristo.