¹ Palanggà nga Ginang^a nga gingpilì ng Dios kag sa iya mga ongà^b,

Bilang maguyang^c, nagsulat ako sa indo nga nagahigugmà gid ning matuod kag bukon lang ako kundì imaw da ang tanan nga nakakasayod ng kamatuuran. ² Ginahigugmà namon kamo kay naitanom sa aton tagipusuon ang kamatuuran nga halin sa Dios kag magapabilin sa aton hasta sa wayà katapusan.

³ Mababaton naton ang grasya, kaluoy kag ang katawhayan halin sa Dios nga Amay kag kay Hesu-Kristo nga iya ongà, kung nagasunod kita sa kamatuuran kag nagahigugmaanan sa isa kag isa.

⁴ Nagakalipay ning dakò ang akon tagipusuon kay nabatian ko nga may pila dirà sa imo mga ongà ang nagapadayon nga nagasunod sa kamatuuran sunò sa sugò nga nabaton naton halin sa Dios nga Amay. ⁵ Niyan, Ginang, gusto ko nga ipadumdom sa imo ang sugò nga dapat kita maghigugmaanan sa isa kag isa. Ini hay bukon bag-o nga sugò ang ginasulat sa indo, kundì sayod na naton tunà pa nang nagtuo kamo kay Kristo. ⁶ Ang paghigugmà sa Dios hay ang pagsunod naton sa iya mga sugò. Kag ang sugò niya sa indo hay maghigugmaanan sa isa kag isa, pareho nang nabatian nindo tunà pa nang una nang nagtuo kamo kay Kristo.

⁷ Kay kadamò ang manunudlò nga miyugpangluko nga nagkadto abir diin sa kalibutan. Sinda hay wayà nagakilaya nga si Hesu-Kristo hay naging tawo. Imaw ini ang mga miyugpangluko kag ang kapareho ng Nagakuntra kay Kristo. ⁸ Nganì, bantayi ang indo kaugalingon para ang bunga ng aton mga gingpangabudlayan indì masayang, kundì makabaton kamo ning kumplito nga premyo halin sa Dios. ⁹ Ang abir sin-o nga iba ang ginatudlò sa gingtudlò ni Kristo kag nagadugang ng sarili nga pagpanudlò, hay wayà relasyon sa Dios. Pero ang abir sin-o nga nagapabilin sa gingtudlò ni Kristo, imaw ang may relasyon sa Dios nga Amay kag kay Hesus nga ongà ng Dios. ¹⁰ Abir sin-o nga nagakarà sa indo kag labot ang pagpanudlò nga indo nabatian parti kay Kristo, ayaw siya pagbatuna sa indo bayay kag ayaw magpangabay ning pagpakamaayo para sa iya. ¹¹ Kay ang nagapangabay para sa iya hay nagapakig-isa sa iya malain nga ginahuman.

¹² Madamò pa kuntà ako ning ihambay sa indo, pero indì ko na gusto isulat, kay nagalaom ako nga makaibahan ko kamo kag maihambay ko ini sa indo atubangan, agud ang aton kalipay hay makumplito. ¹³ Nagapangamusta diri ang mga ongà^d ng maguyang mo nga babayi^e nga gingpilì ng Dios.