Vahebulaniya 1

Ibalula kwa

Vahebulaniya

Umulyango	Gina gakwali mu litaafili ili
1:1–4:13	Umuyandikhaaji iwonensa kiija uYeesu mukhome kivashila avakuwamalago na vamalayikha va Nguluvi
4:14–7:28	UYeesu mukhome kivashila avatambule vina vakhandi visenga insengo mu nanda imbaagule iya kifuunyila
8:1–10:18	Imfwa ya Yeesu yaleeta ulufingo ulupya kishila luna uNguluvi wámupeelaga uMusa
10:19–13:19	Amaswi aga kivajinia avahuvililaaji va Yeesu na kivalogola avaanu ava pawukuulu avanya lihuuvi
13:20-25	Amaswi aga wudugo

UNguluvi ilogola noose kishilila kwa Lusawo lwakwe

1 Pawukuulu, uNguluvi akhandi ilogola na vambuyeesu kishilila kwa vakuwamalago vaakwe. Akhandi iigaha ndeeno khavili khavili na kwa nsila nyinshi. 2 Leelo mu nsiku isi isa wudugo, uNguluvi alogwele noose kishilila kwa Lusawo lwakwe.^a Kishilila kwa mwene, uNguluvi wáwumbile uwulanga ni nyi na wámugaha ave muhaasi wa fiinu fyona. 3 ULusawo uyo ingʼaala uwutupikho wa Nguluvi, khanji yumwene yuna iwonensa shina ashwali uNguluvi. Kwa nsila ya liswi ilinya ngufu, ipinsa ifiinu fyona fiyiteneshe kiiva ngaja shina fishwali. Wátuvalasaaga uwunansi weesu, wáaluta kushaanya kwa Nguluvi na kikhala ku liwokho ilya kundiilo ilya Nguluvi uMunya Wutupikho, mu luvala ulwa lishima likhome mandu.

UYeesu mukhome kishila avamalayikha

4 UNguluvi wámugahaga uLusawo uyo kiiva mukhome kishila avamalayikha,^b ngaja shina wámupeelaga ilitaawa lya lishima likhome kishila ilitaawa lya vamalayikha. 5 UNguluvi asikhamujoveele umalayikha yoyoona amaswi gina wámujovelaga uLusawo lwakwe kiija,

“Owe yuuwe Lusawo lwangu,

iminsiyaano naava nili Wiiho.”^c

Khanji uNguluvi asikhajovile ulwa malayikha yoyoona kiija,

“One nikhava nili Wiiho,

woope akhava Lusawo lwangu.”^d

6 Khanji pina ikimufilikha uLusawo lwakwe yuna ali mwene duguli mu nyi iyi, wájovile,

“Avamalayikha woona va Nguluvi vave vikimufuunya umwene.”^e

7 Khanji uNguluvi pina ilogola ulwa malayikha, wájovile,

“Umwene ikivagaha avamalayikha vave ngaja lipepo

na vavanda vaakwe kiiva ngaja ngʼali sa mooto.”^f

8 Leelo pina ilogola ulwa Lusawo lwakwe, wájovile,

“Wee Nguluvi, ukhatema shiluta na shiluta,

khanji usiive ukivatema avaanu vaakho kwa shiyooli.

9 Owe widobokha uwugolofu,

leelo ukiwukhalalila uwunansi.

Lulwene uNguluvi, Nguluvi waakho,

akubagwile owe na kikududumisisa amafuta amanofu,

baheene uve uli mukhome,

kishila avayaago woona.”^g

10 Khanji uNguluvi ikimujova uLusawo lwakwe kiija,

“Owe Mutwa,^h yuuwe wawumbaga inyi apo pashiyanso,

khanji yuuwe wawumbaga nawu wulanga.

11 Ifiinu fyona ifyo fikhasila, fikhasakhala ngaja menda,

leelo owe ukhava ukwali shiluta na shiluta.

12 Owe ukhafigonja gonja ifiinu ifyo

ngaja umuunu shina igonja gonja inkhansu,

ukhaseveelukha ngaja mwenda umukuulu.

Leelo owe usikhahambukha kaa, ukhava ukwali shiluta na shiluta.”ⁱ

13 UNguluvi asikhamujoveele umalayikha yoyoona kiija,

“Khala ku liwokho lyangu ilya kundiilo,

mbakha pina nikhava nakutanga

uvamene avalugu vaakho na kivatema.”^j

14 Ino, avamalayikha vava naani? Avamalayikha fiwumbwa fina fikimusenjela uNguluvi. Umwene iiva ikivafilikha kivasenjela avaanu vina viposheela uwukulukho wuna vakhahaasiwa.