6 Mi wɛ, ɛmɛ ɖe xena Mawu dɔn ɖodan, va, nyikɔ etɔn bo nɔ nyi Jan. 7 E va, a do nyi kunuɖetɔ, a bo ɖe kunu na kinklɛn la, e mɛ, ɛmɛ zɛtɛye ba ɖo xɔse dogbɔn emyɔ ji. 8 Emyɔ la hɛn nyi kinklɛn la, vɔ e va, a do ɖe kunu na kinklɛn la. 9 Kinklɛn mɛ la wɛ nyi kinklɛn adodwe xeni va ɛgbɛ la mɛ, bo klɛn na ɛgbɛtɔ zɛtɛye. 10 Oxo la o le ɛgbɛ la mɛ, dogbɔn emyɔ ji wɛ ɛgbɛ la jɔ, vɔ, ɛgbɛ la mɛtɔye ko do josi-i. 11 E va oto etɔn mɛ, vɔ, oto etɔn mɛtɔye ko yi-i. 12 Vɔ, ɛmɛ zɛtɛye xeni yi-i ye, bo kan do e ji ye, e na ye ɛcɛ, na ye a do trɔ zun Mawu vikpɛye. 13 Ye ɔn nyi Mawu we ovi dogbɔn ɛhun mɛ, alo ɛgbɛtɔ we ojlo mɛ, vɔ, dogbɔn Mawu we ojlo mɛ wɛ.

14 Oxo la trɔ zun ɛgbɛtɔ, bo va nɔ mía mɛ, e nɔ nyɔ adɔ mɛ ganji, bo nɔ to oxojɔxo taŋu. Mí kpɔn ninɔmɛ ɖaxo etɔn, ninɔmɛ xena Otɔ la na Ovi etɔn ɖokpo akogo la. 15 Jan ɖe kunu ni-i, bo do axwa tun mɔ: «Emyɔ wu wɛ ko lɔ oxo do tun: Ɛmɛ ɖokpo le godo na-a, bo gbɔn nɔ, ɛmɛ mɛ la hugan-a, ɖo e o le gbɔxwe ko va jɔ.» 16 Mi wɛ, do owan yiyi ɖaxo etɔn wu, e nyɔ adɔ mɛ taŋu do mí ɛmɛ zɛtɛye, mí bo yi ɛfɛnu do ɛfɛnu ji. 17 Ɖo, Mɔyizi ji wɛ Mawu gbɔn bo do na mí Osɛn la, vɔ, ɛfɛnu kpodo oxojɔxo bo gbɔn Yesu Klisu ji do va. 18 Ɛmɛ ti ɔn kpɔn Mawu kpɔn. Vɔ, Ovi ɖokpo akogo la, xeni nyi Mawu, bo le akɔn mɛ na Otɔ la, wɛ ɖe-e sɔ xlɛ.

19 Hwexenu na Jwifuye we oga xeye ni le Jeluzalɛmu, sɔ ovɔsantɔye, kpo Lewi vikpɛye ɖodan Jan, a do va yi kan-ɛ se tun onu lɛ e nyi jaa, kunu xena e ɖe xɛn. 20 Xena ye kan oxo la Jan se, e ɔn gbɛ ɖiɖo e wu, vɔ e ɖe e mɛ na ye nywɛɖe tun he bɛ hɛn bo nyi Klisu la. 21 Ye bo kan-ɛ se tun mɔ: «Fifi ɖe, onu lɛ o nyi? Eli wɛ o nyi?» E bo ɖo e wu na ye tun mɔ: «O o! Mɔ hɛn.» Ye bo mɔ kan-ɛ se tun mɔ: «Myɔ wɛ nyi oxolɔɖonyitɔ la?» E mɔ ɖo e wu tun: «O o!» 22 Mi wɛ ye mɔ kan-ɛ se tun mɔ: «Onu lɛ o gbɛ nyi tututu? Lɔ-ɛ na mí, na mí a do kpewu a va yi ɖo ogbe ɖe na ɛmɛ xeye ni ɖo mí ɖodan ye. Onu lɛ myɔ ŋutɔ nyɔ-ɛ tun he bo nyi?» 23 E bo ɖo e wu na ye tun: «Mɔ wɛ nyi ɛmɛ xeni do axwa nɔ le gbefaji, bo lɔ nɔ tun mɔ:

24 Le ɛmɛ xeye na ye ɖo ɖodan laye mɛ, Falizitɔye can le ye mɛ^c. 25 Ye bo kan-ɛ se tun mɔ: «Xena o ɔn nyi Klisu la, o ko nyi Eli, o ko mɔ nyi oxolɔɖonyitɔ la, ɛlɛ dɔn o do lɛ Mawu we ɛsin na ɛmɛye nɔ?» 26 Jan ɖo e wu na ye tun mɔ: «Mɔ, ko lɛ Mawu we ɛsin na mi nɔ kpodo ɛsin. Vɔ, ɛmɛ ɖe le mia mɛ, mi ko nyɔ-ɛ, 27 ɛmɛ mɛ la le godo na-a, bo gbɔn nɔ, ko ɔn jɛ na tun afɔkpakan etɔnye can.»

28 Onu xe la jɔ nɔ le Betani, le Judɛn we otɔ godo, ofi xena Jan lo lɛ Mawu we ɛsin na ɛmɛye le nɔ.

29 Le onyihinhɔngbe etɔn, Jan kpɔn Yesu gbɔn nɔ e kɔn nɔ, mi wɛ e lɔ tun: «Mi kpɔn! Mawu we Lɛngbɔvi xeni nɔ sɔ onu nyanyla sɔ kɛ ɛgbɛtɔ zɛtɛye xɛn. 30 Emyɔ la wu wɛ ko lɔ oxo do, bo tun: Ɛmɛ ɖe le godo na-a, bo lo gbɔn nɔ, ɛmɛ mɛ la hugan-a, ɖo e o le gbɔxwe na ko va jɔ. 31 Mɔ can ko ɔn nyɔ-ɛ saa tun emyɔ wɛ, vɔ, ni a do ɖe eɖe sɔ xlɛ Izrayɛli vikpɛye wɛ dɔn ko do va lɛ Mawu we ɛsin na ɛmɛye nɔ.»

32 Jan mɔ lɔ ke tun mɔ: «Ko kpɔn Mawu we Gbigbɔ la jɛ ote sɔn jiŋukunsin ɖi hɔnnɛ ha, bo va jɛ e ji. 33 Ko ɔn nyɔ-ɛ saa, vɔ, ɛmɛ xeni ɖo-o ɖodan tun mɔ boo va yi lɛ ɛsin na ɛmɛye, lɔ na-a tun mɔ: “Ɛmɛ xe ji na o na kpɔn Gbigbɔ la na jɛ ote do, a bo tre le e ji, ɛmɛ mɛ la wɛ nɔ lɛ Gbigbɔ Kinkwɛn na ɛmɛye.” 34 Mɔ, ko bo kpɔn ɖo mɔsinha, mi wɛ ko do ɖe kunu nɔ tun emyɔ bɛ bo nyi Mawu we Ovi la.»

35 Le onyihinhɔngbe etɔn, Jan mɔ le ofi la ke, kpodo onukplanvi etɔn owe. 36 Xena Yesu va yi nɔ, e kpɔn-ɛ trululu bo lɔ tun mɔ: «Mawu we Lɛngbɔvi la xɛn.» 37 Xena onukplanvi owe laye se oxo mɛ la, ye kplɔ Yesu do. 38 Yesu trɔ okɔ, bo kpɔn tun ye bo kplɔ he do nɔ, mi wɛ e kan ye se tun mɔ: «Ɛlɛ mi lo kan nɔ?» Ye bo ɖo e wu ni-i tun mɔ: «Hlabi, bɔ lɛ o nɔ nɔ?» Hlabi la we gɔnmɛ wɛ nyi «Onukplan-ɛmɛtɔ.» 39 Mi wɛ e lɔ na ye tun mɔ: «Mi va, na mi a kpɔn.» Hwedo ogan ɛnɛ mɔsinha wɛ lo xo nɔ. Ye bo kplɔ-ɛ do, bo va yi kpɔn ofi xena e nɔ nɔ, ye bo nɔ e kɔn le gbegbe mɛ la.

40 Onukplanvi owe xeye ni se oxo xena Jan lɔ, bo kplɔ Yesu do laye, Andre xeni nyi Simɔ Piyɛ we fofo, nyi ɛmɛ ɖokpo le ye mɛ. 41 Jɛ ŋukɔn, Andre va yi kpɔn nɔvyɛ Simɔ la, bo lɔ ni-i tun mɔ: «Mí kpɔn Mɛsiya la!» Mɛsiya la we gɔnmɛ wɛ nyi Klisu. 42 E bo kplɔ-ɛ va Yesu kɔn, Yesu kpɔn-ɛ trululu, bo lɔ ni-i tun mɔ: «Myɔ wɛ nyi Simɔ, Jan vyɛ, ye na nɔ yɔ we tun Sefasi.» Sefasi we gɔnmɛ wɛ nyi ɛkpɛn.

43 Le onyihinhɔngbe etɔn Yesu sɔ ogbeta a do yi Galile. E kpɔn Filipu, bo lɔ ni-i tun mɔ: «Kplɔ-ɔ do!» 44 Bɛtisayida we toxomɛtɔ wɛ nyi Filipu, toxo mɛ la mɛ tɔye ke wɛ nyi Andre kpodo Piyɛ. 45 Filipu kpɔn Natanayɛli bo lɔ ni-i tun mɔ: «Mí kpɔn ɛmɛ xena Mɔyizi wlan onu do e wu le Osɛn we wema la mɛ, oxolɔɖonyitɔye can bo wlan onu do e wu. Mi wɛ nyi Yesu Nazalɛtitɔn, Jozɛfu vyɛ.» 46 Natanayɛli bo ɖo e wu ni-i tun mɔ: «Onu nywɛ ɖe na kpewu tɔn sɔn Nazalɛti doo?» Filipu bo ɖo e wu ni-i tun: «Va, naa kpɔn.» 47 Xena Yesu kpɔn Natanayɛli lo gbɔn nɔ e kɔn nɔ, e lɔ oxo do e wu tun mɔ: «Izrayɛlivi ŋutɔ-ŋutɔ ɖe xɛn, onu huhlu ɔn le ayixa etɔn mɛ.» 48 Natanayɛli bo kan-ɛ se tun mɔ: «Naɖe o wa bo do nyɔ-ɔ?» Mi wɛ Yesu ɖo e wu ni-i tun mɔ: «Hwexenu na o le figitingɔ, ko o kpɔn we, gbɔxwe Filipu va yɔ we.» 49 Natanayɛli bo lɔ tun: «Hlabi, myɔ wɛ nyi Mawu we Ovi, myɔ wɛ nyi xɔlu Izrayɛlitɔn.» 50 Yesu ɖo e wu ni-i tun mɔ: «Xena ko lɔ na we tun ko bo kpɔn we le figitin la gɔ, mi bɛ dɔn na o do kan do ji ye mɔ? O na mɔ kpɔn onu ɖaxo-ɖaxoye xeni hugan xe.» 51 Yesu bo mɔ lɔ tun mɔ: «Oxojɔxo kpatakli xɛn ko lo lɔ na mi nɔ, mi na kpɔn jiŋukunsin na hun, ɛwɛndotɔ Mawutɔnye, na yi jigbe nɔ, a bo jɛ ote nɔ, gbɔn Ɛgbɛtɔ we Ovi la ji.»