12 Yesu mɔ lɔ oxo na otogun la ke, bo tun: «Mɔ wɛ nyi kinklɛn ɛgbɛ la tɔn, ɛmɛ xeni kplɔ-ɔ do, e ɔn zɔn vuvlu nɔ, vɔ, e na ɖo kinklɛn xeni nɔ na ɛgbɛ.» 13 Mi wɛ Falizitɔye lɔ ni-i tun mɔ: «O lo ɖe kunu na ɖiwe nɔ, kunuɖiɖe tɔwe ɔn sɔgbe.» 14 Yesu bo ɖo e wu na ye tun mɔ: «Ɛɛn, oxojɔxo ko lo ɖe kunu na mɔ ŋutɔ nɔ, vɔ kunuɖiɖe tɛye bo nyi oxojɔxo. Ɖo, ko nyɔ ofi xena ko sɔn, bo nyɔ ofi xena ko lo yi nɔ, vɔ miye, mi ɔn nyɔ ofi xena ko sɔn gbɔɔn do nyɔ ofi xena ko yi nɔ can. 15 Miye, mi nɔ ɖɔ ɛhwɛ na ɛmɛ, ɖi lena ɛgbɛtɔye nɔ wasi ɖo ha, vɔ mɔ ko ɔn nɔ ɖɔ ɛhwɛ na ɛmɛ ti. 16 Vɔ, na ko na mɔ do ɖɔ ɛhwɛ na ɛmɛ can, ɛhwɛ ɖiɖɔ tɛye nɔ zɔn gbɔn oxojɔxo ji. Ɖo, mɔ ɖokpo gee hɛn le, vɔ, Didaye xeni ɖo-o ɖodan, le kpo-o. 17 Ye wlan do osɛn miatɔn mɛ tun, na ɛmɛ owe wasi kunuɖiɖe ɖokpo ŋumyɔye, be kunuɖiɖe mɛ la bo sɔgbe. 18 Mɔ, ko ɖe kunu na ɖiye nɔ, Didaye xeni sɔ-ɔ ɖodan can, bo mɔ ɖe kunu na-a nɔ.» 19 Ye bo kan-ɛ se tun mɔ: «Bɔ lɛ didawe la le?» Yesu bo ɖo e wu na ye tun mɔ: «Miye, mi ɔn nyɔ-ɔ gbɔɔn do nyɔ Didaye can; na mi do nyɔ-ɔ wɛ, be mi na nyɔ Didaye la can.» 20 Yesu lɔ oxo mɛ, le hwexenu na e le Mawu we oxwe la gbe, le ofi xena ɖaka xe mɛ na ye nɔ sɔ onunina sɔ do, le. Ɛmɛ ti we alɔ ɔn jɛ e wu, ɖo ogan etɔn ɔn xo hɔnɖyo.

21 Yesu mɔ lɔ na ye ke tun mɔ: «Mɔ, ko lo sɔn nɔ, mi na va kan-a; mi na ku do onu nyanyla wiwa miatɔnye mɛ. Ofi xena ko lo yi nɔ, mi ɔn kpewu na yi.» 22 Mi wɛ Jwifuye lɔ tun mɔ: «Hu wɛ e ka hu eɖe nɔ, bo do lɔ nɔ tun ofi xena he bo yi nɔ, miye boo ɔn kpewu na yi?» 23 Yesu bo ɖo e wu na ye tun mɔ: «Miye, nyixɔ ji tɔn wɛ mi nyi. Mɔ, jiŋukunsin wɛ ko sɔn; miye, ɛgbɛ mɛ bwɛ tɔn wɛ mi nyi, mɔ, ko ɔn nyi ɛgbɛ xe mɛ tɔn. 24 Mi wɛ dɔn ko do lɔ na mi tun miye bo na ku do onu nyanyla wiwa miatɔnye mɛ. Ɖo, na mi ɔn kan do e ji tun ko bo nyi ɛmɛ xena ko nyi, mi na ku do onu nyanyla wiwa miatɔnye mɛ.» 25 Mi wɛ ye kan-ɛ se tun mɔ: «Onu lɛ o nyi?» Yesu bo ɖo e wu na ye tun mɔ: «Ɛmɛ xena ko lɔ na mi tun ko bo nyi sɔn dojɛ gbɔɔn la, jan wɛ ko nyi. 26 Ko ɖo oxo susu bo na lɔ, kpodo ɛhwɛ susu bo na ɖɔ sɔn mia wu. Vɔ, ɛmɛ xeni ɖo-o ɖodan oxojɔxototɔ wɛ e nyi. Oxo xena ko se le e kɔn bɛ ko lo lɔ na ɛgbɛ la seŋu nɔ.» 27 Ye ɔn kpɔn onu jɛ e wu tun Otɔ la we oxo wɛ e lo lɔ na ye nɔ. 28 Mi wɛ Yesu lɔ na ye tun mɔ: «Hwexenu na mi na kɔ Ɛgbɛtɔ we Ovi la do yi oji, mi na nyɔ-ɛ tun ko bo nyi ɛmɛ xena ko nyi, e mɛ, mi na kpɔn onu jɛ e wu tun ko bo ɔn wa onu ti le ɛcɛ tɛye ŋutɔ mɛ nɔ, ɖo, onu xena Otɔ la kplan-a jan wɛ ko lɔ nɔ. 29 Ɛmɛ xeni ɖo-o ɖodan, e le kpo-o, e ɔn jo-o do akogo, ɖo onu xeni nɔ nyɔ e ŋu jan wɛ ko nɔ wasi.» 30 Xena Yesu lɔ oxo ɖo mɔsinha nɔ, ɛmɛ susu kan do e ji.

31 Yesu lɔ na Jwifu xeye ni kan do e ji laye tun mɔ: «Na mi nɔ ogbeji na oxo tɛye, be mi bo nyi onukplanvi tɛyee oxojɔxo. 32 Mi na nyɔ oxojɔxo la, oxojɔxo la bo na na na, mi na jɛ miaɖe si.» 33 Ye bo ɖo e wu ni-i tun mɔ: «Ablaxamu we jijimɛviye wɛ mí nyi, mí ɔn nyi ɛmɛxixɔ na ɛmɛ ɖe kpɔn. Naɖe lɛ myɔ o na va lɔ na mí tun míye bo na jɛ míaɖe si ɖo?» 34 Yesu bo ɖo e wu na ye tun mɔ: «Oxojɔxo kpatakli xɛn ko lo lɔ na mi nɔ, ɛmɛ ɖekpekpe xeni wa onu nyanyla nɔ, e nyi ɛmɛxixɔ na onu nyanyla. 35 Vɔ, ɛmɛ xeni nyi ɛmɛxixɔ, e ɔn nɔ nɔ oxwegbe gbɔɔn do yi, oxwevi, nɔ nɔ oxwegbe gbɔɔn do yi. 36 Na Ovi la na na mi jɛ miaɖe si, mi na jɛ miaɖe si oxojɔxotɔn. 37 Ko nyɔ-ɛ tun Ablaxamu we jijimɛviye wɛ mi nyi. Vɔ, mi bo kan ka hu-u nɔ, ɖo, mi gbɛ oxo tɛyee. 38 Mɔ, onu xena ko kpɔn le Didaye kɔn, we oxo wɛ ko lo lɔ nɔ, vɔ miye, onu xena miatɔ lɔ na mi wɛ mi lo wasi nɔ.» 39 Ye bo ɖo e wu ni-i tun mɔ: «Ablaxamu wɛ nyi míatɔ.» Mi wɛ Yesu lɔ na ye tun mɔ: «Na mi do nyi Ablaxamu vikpɛye wɛ, mi na nɔ wa onu ɖi emyɔ ha. 40 Vɔ fifi, mi kan ka hu-u nɔ, mɔ xeni lo lɔ oxojɔxo xena ko se le Mawu de na mi nɔ, Ablaxamu ɔn wasi onu mɔsinhatɔn ɖe! 41 Miye, miatɔ we odan wɛ mi lo wasi nɔ.» Ye bo ɖo e wu ni-i tun mɔ: «Mí ɔn nyi agaviye mɔ! Mawu ɖokpo gee wɛ nyi Otɔ xena mí ɖo!» 42 Yesu bo lɔ na ye tun mɔ: «Na Mawu do nyi miatɔ wɛ, be mi na yi owan na-a, ɖo Mawu mɛ wɛ ko jɔ sɔn, e kɔn bɛ ko sɔn. Ko ɔn va le mɔ ŋutɔ we ɛcɛ mɛ, vɔ emyɔ la wɛ ɖo-o ɖodan. 43 Ɛlɛ dɔn mi ɔn do kpɔn onu jɛ oxo xena ko lɔ na mi nɔ wu? Ɖo, mi ɔn kpewu na se oxo tɛye. 44 Lɛgba wɛ nyi miatɔ, onu xena miatɔ la jlo wɛ mi ka wasi nɔ. E o nyi ɛmɛhutɔ sɔn dojɛ gbɔɔn. E ɔn nɔ nɔ oxojɔxo ji, ɖo, oxojɔxo ti ɔn le onu mɛ ni-i. Na e lo kan ojo nɔ, onu xena e nyi le ote la mɛ, ojokantɔ wɛ e nyi, bo nyi otɔ na ojo kinkan. 45 Vɔ mɔ, oxojɔxo xena ko lo lɔ nɔ, wɛ dɔn na mi ɔn kan do ji ye. 46 Onu lɛ le mia mɛ, bo na ɖe xlɛ tun mɔ bo hu ɛhwɛ? Fifi, xena e nyi tun oxojɔxo wɛ ko lɔ nɔ, ɛlɛ dɔn miye, mi ɔn do kan do ji ye? 47 Ɛmɛ xeni nyi Mawutɔn, Mawu we oxo wɛ e nɔ ɖo oto. Vɔ, xena mi ɔn nyi Mawutɔn, mi wɛ dɔn na mi ɔn do ɖo oto nɔ.» 48 Jwifuye bo ɖo e wu ni-i tun mɔ: «Xena mí lɔ tun Samalitɔ bɛ myɔ bo nyi, gbigbɔ nylakan bɛ bo le myɔ mɛ, ɛhwɛ ɔn jɔ na mí wɛɛ?» 49 Yesu bo gbo do e wu na ye tun mɔ: «Gbigbɔ nylakan ti ɔn le mɔ mɛ, Didaye wɛ ko ɖo bubu na nɔ, vɔ, miye mi ko ɖo bubu na-a nɔ. 50 Mɔ, ko ɔn nɔ kan tun ye a kanfu-u, vɔ, ɛmɛ ɖokpo le, bo lo kan kanfu la na-a nɔ, e bo nɔ ɖo kojo. 51 Oxojɔxo kpatakli xɛn ko lɔ na mi nɔ, na ɛmɛ ɖe wasi do oxo tɛye ji, e ɔn na ku kpɔn gbeɖe.» 52 Jwifuye bo lɔ ni-i tun mɔ: «Fifi, mí kan do e ji tun gbigbɔ nylakan bo le myɔ mɛ, Ablaxamu ku, oxolɔɖonyitɔye can bo ku, vɔ myɔ bo va lɔ nɔ tun ɛmɛ xeni wasi do oxo hetɛye ji, bo ɔn ku nɔ. 53 Ablaxamu mía dagbwa xeni ku la, myɔ, o hugan-ɛ wɛɛ? Oxolɔɖonyitɔye can ku. Onu lɛ o sɔ ɖi we do kpɔn la?» 54 Yesu bo ɖo e wu na ye tun mɔ: «Na mɔ ŋutɔ lo kanfu ɖiye nɔ, kanfu tɛye ɔn nyi onu ti. Didaye wɛ nɔ kanfu-u, emyɔ xena mi lo yɔ nɔ tun Mawu miatɔn la. 55 Mi ko nyɔ-ɛ can, vɔ, mɔ ko nyɔ-ɛ; na ko lɔ tun ko bo ɔn nyɔ-ɛ, ko na nyi ojokantɔ ɖi miye ha. Ko nyɔ-ɛ, bo nɔ wasi do oxo etɔnye ji. 56 Ablaxamu mia dagbwa, xena e susu-i tun he bo na kpɔn azan tɛye, jijwɛ ɖaxo ɖe wɛ e nyi ni-i. E bo kpɔn-ɛ, bo kpɔn jijwɛ.» 57 Jwifu laye bo lɔ ni-i tun mɔ: «Myɔ, o ɔn ká ɖo oxwe kanɖe owo hɔnɖyo, o bo kpɔn Ablaxamu?» 58 Yesu bo ɖo e wu na ye tun mɔ: «Oxojɔxo kpatakli xɛn ko lo lɔ na mi nɔ, gbɔxwe Ablaxamu va jɔ, mɔ ko o le.» 59 Mi wɛ ye can ɛkpɛnye, bo ka tɔ-ɛ nɔ, vɔ, e bo bɛ, bo tɔn le Mawu we oxwe la gbe.