6 Xena Yesu lɔ oxo ɖo mɔsinha vɔ, e tun otan do nyixɔ ji, bo do nya baba, bo si gbɔn ŋukunsinye ji na ŋuvanɔ la. 7 E bo lɔ ni-i tun mɔ: «Va yi fun ŋumɛ le Kalogun Silowe nu.» Silowe la we gɔnmɛ wɛ nyi ɛmɛ dindɔn. Ŋuvanɔ la yi, bo fun ŋumɛ, hwexenu na e trɔ va, e lo kpɔn onu nɔ. 8 Hatɔye, kpodo ɛmɛ xeye ni nɔ kpɔn-ɛ saa, e ba do byɔ onu nɔ ye, lo kan se nɔ tun mɔ: «E ɔn nyi dahwe mɛ hɛn nɔ xlɔn onyi a do byɔ onu nɔ wɛɛ?» 9 Ɛmɛ ɖeye lɔ tun: «Mi wɛ!» Ɖeye bo lɔ tun: «O o, e mi hɛn, e ɖi-i wɛ!» Vɔ, hwanja la ŋutɔ bo lɔ nɔ tun: «Mɔ wɛ!» 10 Mi wɛ ye kan-ɛ se nɔ tun mɔ: «Fifi ɖe, naɖe ŋukunsin tɔweye wa bo do hun?» 11 E ɖo e wu na ye tun mɔ: «Dahwe xena ye nɔ yɔ tun Yesu, e nya baba, bo si gbɔn ŋukunsinye ji na-a, bo lɔ na-a tun mɔ boo yi Silowe, a bo va yi fun ŋumɛ. Mi wɛ ko yi, xena ko fun ŋumɛ la vɔ, ko kpɔn onu nɔ!» 12 Ye bo kan-ɛ se tun mɔ: «Bɔ lɛ dahwe mɛ la le?» E bo ɖo e wu na ye tun mɔ: «Ko ɔn nyɔ.»

13 Ye kplɔ dahwe xeni nyi ŋuvanɔ saa la do yi Falizitɔye de. 14 Vɔ, gbɔjwɛzangbe wɛ Yesu nya baba le, bo do hun ŋukunsin na dahwe la. 15 Mi wɛ, Falizitɔye can kan dahwe la se tun naɖe lɛ onu la jɔ ɖo na e do va jɛ onu kpinkpɔn ji jaa. E bo ɖo e wu na ye tun mɔ: «E si baba do ŋukunsin ji na-a, ko bo va yi fun ŋumɛ, bo kpɔn onu nɔ.» 16 Falizitɔ ɖeye bo lɔ nɔ tun mɔ: «Dahwe xeni wasi onu mɛ la, e ɔn sɔn Mawu de, ɖo e ɔn nɔ zɔn do gbɔjwɛzangbe we osɛn la ji.» Vɔ, ɛmɛ buye bo lɔ nɔ tun: «Naɖe lɛ onu nyanylawatɔ na wa, a do wasi ŋudandonu mɛ ye?» Ogbe bo ma na ye. 17 Mi wɛ, ye kan ɛmɛ xeni vaŋu saa la se tun mɔ: «Myɔ ŋutɔ ɖe, naɖe o lɔ nɔ do ɛmɛ xeni hun ŋukunsin na we la wu?» E bo ɖo e wu tun mɔ: «Oxolɔɖonyitɔ wɛ e nyi.»

18 Ganke Jwifuye ɔn jlo na kan do e ji tun e bo nyi ŋuvanɔ saa, gbɔxwe va kpɔn onu nɔ fifi. Mi wɛ dɔn, ye yɔ ajitɔ etɔnye do va, 19 bo kan ye se tun mɔ: «Ovi miatɔn xena mi lɔ nɔ tun heye bo ji ŋuvanɔ la xɛn oxojɔxo? Naɖe lɛ e nyi ɖo na e do va kpɔn onu nɔ fifi?» 20 Ajitɔ etɔn laye bo ɖo e wu na ye tun mɔ: «Ovi míatɔn wɛ oxojɔxo, ŋuvanɔ bɛ e nyi na mí do ji-i. 21 Vɔ, lena e nyi ɖo fifi gbɔɔn e do va kpɔn onu nɔ, mí ɔn nyɔ-ɛ. Ɛmɛ xeni hun ŋukunsin ni-i la can, mí ɔn nyɔ-ɛ. Mi kan oxo-e se, e o hwɛn, emyɔ ŋutɔ hɛn e na lɔ oxo do eɖe nu!» 22 Ajitɔ etɔn laye lɔ oxo ɖo mɔsinha nɔ, ɖo ye vɔ na Jwifuye we ogaye nɔ. Ɖo, oga laye o sɔ ogbeta tun ɛmɛ xeni na yi ogbe tun Yesu bɛ bo nyi Klisu la, ye na nya-ɛ le okplityɔn la tɛgbɛ. 23 E mɛ la wɛ dɔn na ajitɔ etɔnye do lɔ tun e boo hwɛn, ye boo kan oxo emyɔ ŋutɔ se.

24 Falizitɔ laye mɔ yɔ dahwe xeni vaŋu saa la, zɔn owegɔ ke, bo lɔ ni-i nɔ tun mɔ: «Lɔ oxojɔxo le Mawu we ŋukɔn. Míye, mí nyɔ-ɛ tun dahwe xeni hun ŋukunsin na we la, onu nyanylawatɔ bɛ e bo nyi.» 25 Mi wɛ e gbo do e wu na ye tun mɔ: «E ko nyi onu nyanylawasitɔ ma, ko ɔn nyɔ. Vɔ, onu ɖokpo xena ko nyɔ wɛ nyi tun: ŋuvanɔ wɛ ko nyi saa, fifi ko kpɔn onu nɔ.» 26 Ye bo ɖo e wu ni-i tun mɔ: «Ɛlɛ e wa na we? Naɖe lɛ e hun ŋukunsin la na we ɖo?» 27 E bo ɖo e wu na ye tun mɔ: «Ko o lɔ-ɛ na mi saa, vɔ, mi ko ɖo oto-o, ɛlɛ jɔ mi mɔ do kan nɔ na se-e? Alo miye can, mi jlo na trɔ zun onukplanvi etɔnye wɛɛ?» 28 Ye bo zun-i, bo lɔ tun: «Myɔ bɛ nyi onukplanvi etɔn o, míye, Mɔyizi we onukplanviye wɛ mí nyi. 29 Míye, mí nyɔ-ɛ tun Mawu bo lɔ oxo na Mɔyizi, vɔ emyɔ, mí ɔn nyɔ ofi xena e sɔn.» 30 Dahwe la bo ɖo e wu na ye tun mɔ: «Oxo xeni kpaca do ɛmɛ le oxo la mɛ bɛ mɛ o: mi ɔn nyɔ ofi xena e sɔn, ganke e bo hun ŋukunsin na-a! 31 Mí nyɔ-ɛ tun Mawu ɔn nɔ ɖo oto onu nyanylawatɔye, vɔ na ɛmɛ ɖe nɔ ɖo sisi ni-i, bo nɔ wasi ojlo etɔnye, e nɔ ɖo oto-e. 32 Mí ɔn se kpɔn tun ɛmɛ ɖe bo hun ŋukunsin na ɛmɛ xena ye ji ŋuvanɔ. 33 Na ɛmɛ xe la ɔn do sɔn Mawu de wɛ, e ɔn kpewu na wasi onu ti!» 34 Ye bo ɖo e wu ni-i tun mɔ: «Myɔ la ŋutɔ, onu nyanyla mɛ wɛ o le sɔn hwexenu na ye ji we gbɔɔn, o bo va na okplan míye nɔ?» Ye bo ɖe-e tɔn-ɛ jɛ gaji.

35 Xena Yesu se tun ye bo nya dahwe xena e hun ŋukunsin na la, e va yi kpɔn-ɛ bo lɔ ni-i tun mɔ: «O kan do Ɛgbɛtɔ we Ovi la ji?» 36 Dahwe la bo ɖo e wu ni-i tun mɔ: «Onu lɛ la ɛmɛɖaxo? Lɔ-ɛ na-a, na ma kan do e ji.» 37 Yesu bo lɔ ni-i tun mɔ: «Ɛɛn ɛmɛ xena o lo kpɔn nɔ xe wɛ, ɛmɛ xeni lɔ oxo na we nɔ wɛ, ɛmɛ la xɛn.» 38 Mi wɛ Dahwe la lɔ tun: «Xwetɔ, ko kan do ji we.» E bo do onu odo ni-i. 39 Mi wɛ Yesu lɔ tun: «Ko va ɛgbɛ la mɛ na ɛmɛ xeye ni ɔn kpɔn onu nɔ saa ye, a do kpɔn onu, na ɛmɛ xeye ni o lo kpɔn onu nɔ ye, a do trɔ zun ŋuvanɔye: kojoɖiɖo la mɛ» 40 Falizitɔ ɖeye xeni le aha ni-i ye, se oxo mɛ laye, bo kan-ɛ se tun mɔ: «Míye can, ŋuvanɔye wɛ mí nyi?» 41 Yesu bo ɖo e wu na ye tun mɔ: «Na mi do nyi ŋuvanɔye wɛ, be ɛhwɛ ɔn mɔ le okɔ na mi nɔ, vɔ, xena mi tun “mí kpɔn onu nɔ” mi wɛ dɔn ɛhwɛ la do gbɛ kpɔtɔ le okɔ na mi.»