Malya kɔn celu do afɔye ji na Yesu
12
1 Xena Vivayi we oxwe la drɔn onyihinhɔn ɛdɛn, Yesu yi Betani, ofi xena Lazaa xena e fɔn sɔn oku le. 2 Xena e yi blɛ, ye wasi onuɖuɖu ɖe, Mata bo lo ma onuɖuɖu la nɔ. Lazaa can bo le ɛmɛ xeye ni yi tɛnxo a do ɖu onu kpo-e laye mɛ. 3 Malya bo sɔ celu ohovivɛtɔn lita mamɛ xena ye sɔ nalu adodwe do wasi, bo sɔ kɔn do afɔye ji na Yesu, bo sɔ oɖa etɔnye do tutu afɔ laye. Celu la we owan bo gbakpe gbɔn oxwe la gbe seŋu. 4 Onukplanvi Yesutɔn ɖokpo, xena ye nɔ yɔ tun Yuda Isikalyɔtu xeni na va sa Yesu la, lɔ tun mɔ: 5 «Ɛlɛ jɔ ye ɔn sa celu mɛ, a bo do yi ohogana sandi atɔn (300), a bo sɔ oho la do kpedo ayanɔye wu?» 6 E ɔn nyi tun ayanɔye we onu hɛn vɛ ni-i nɔ na e do lɔ mɔsinha, vɔ fyanfinnɔ wɛ e nyi, ɖo, emyɔ wɛ nɔ hɛn ohohɛnnu la, bo nɔ fin le xena ye sɔ do e mɛ la wu. 7 Mi wɛ Yesu lɔ tun mɔ: «Jo nyɔnu la dob, e wasi xe la ɖo onyi na ɖiɖi zangbe tɛye. 8 Ayanɔye na le mia kɔn tɛgbɛ. Vɔ mɔ, ko ɔn le mia kɔn nɔ tɛgbɛ.»Ye bla ogbe do Lazaa wu
9 Jwifu susu gbagbagba se tun Yesu bo le Betani, ye bo va, e ko nyi Yesu la ɖoɖyo hɛn dɔn na ye do va, vɔ, a do va kpɔn Lazaa xena Yesu fɔn sɔn oku la can. 10 Mi wɛ ovɔsantɔ ɖaxoye sɔ ogbeta na do hu Lazaa la can, 11 ɖo, emyɔ la wɛ dɔn na Jwifu susu do lɛ le ye kɔn nɔ, bo va yi kan do Yesu ji nɔ.
Yesu ɖyɛ Jeluzalɛmu
12 Le onyihinhɔngbe etɔn, ɛgbɛtɔ susu gbagbagba xeye ni va oxwe ɖu gbe laye, se tun Yesu bo gbɔn nɔ Jeluzalɛmu. 13 Ye kan ɛdemaye, bo tɔn a do yi kpe-e. Ye bo do axwa tun: «Gigo na Mawu! Mawu ni do na ɛmɛ xeni gbɔn nɔ le Xwetɔ la we nyikɔ mɛ! Mawu ni do na xɔlu Izrayɛlitɔn.» 14 Yesu kpɔn osɔkɛtɛvi ɖe bo xlɔn e ji, ɖi lena Winwlan la lɔ ɖo ha tun mɔ:
15 «Mi ká vɔ, Jeluzalɛmu we toxomɛtɔye
Mi kpɔn xɔlu miatɔn gbɔn nɔ,
Bo xlɔn osɔkɛtɛvi ji.»
16 Jɛ ŋukɔn, onukplanvi etɔnye ɔn kpɔn onu jɛ onu xeni jɔ nɔ laye wu, vɔ, le vivɔnu, xena Mawu va do gigo na Yesu bo do fɔn-ɛ sɔn oku, ye va flin tun Winwlan kinkwɛn la bo o lɔ oxo mɛ la ɖo onyi saa do Yesu wu, oxo mɛ laye ji bɛ ɛmɛ laye wasi do.
17 Ɛmɛ susu xeye ni le ofi la kpodo Yesu na e do yɔ Lazaa tɔn-ɛ le yɔgun la mɛ bo do fɔn-ɛ le ɛmɛ kukuye mɛ, ye lo ɖe kunu na Yesu la nɔ. 18 Mi wɛ dɔn na ɛmɛ laye do va kpe-e, ɖo ye se tun e bo ɖe josi mɛ la sɔ xlɛ dogbɔn ŋudandonu wiwasi mɛ. 19 Falizitɔye bo lɔ le yeɖe mɛ nɔ tun mɔ: «Mi kpɔn nɔ fifi, mí ɔn kpe onu ti wu bo ka wa nɔ mɔ! Ɛmɛ zɛtɛye mɛ kplɔ-ɛ do.»
Ɛmɛ ɖeye ni ɔn nyi Jwifu lo kan Yesu nɔ
20 Ɛmɛ ɖeye xeni ɔn nyi Jwifuye, ɖeye le ɛmɛ xeye ni va sinsɛn gbe le Jeluzalɛmu le oxwe we ogan la mɛ ye, mɛ. 21 Ye va yi kpɔn Filipu xeni sɔn Bɛtisayida le Galile we kansinmɛ, ye bo byɔ-ɛ tun mɔ: «Ɛmɛɖaxo, mí jlo na kpɔn Yesu.» 22 Filipu va yi lɔ-ɛ na Andre, ye bo zɔn kpɔkpɔ, bo va yi lɔ na Yesu. 23 Yesu bo ɖo e wu na ye tun mɔ: «Ogan la xo na Mawu a do ɖe Ɛgbɛtɔ we Ovi la we hɔnhlɔn sɔ xlɛ. 24 Oxojɔxo kpatakli xɛn ko lo lɔ na mi nɔ: na ɛjinukun ɖe jɛ nyixɔ gɔ, e ko ku, e ɔn nɔ na sinsyɛn ti, vɔ, na e ku, e nɔ syɛn okun susu. 25 Ɛmɛ xeni yi owan na ɛgbɛ etɔn na bu-i, vɔ, ɛmɛ xeni na gbɛ owan na ɛgbɛ etɔn le ɛgbɛ xe mɛ, na nɔ ɛgbɛ gbɔɔn do yi Ɛgbɛ Mavɔmavɔ mɛ. 26 Na ɛmɛ ɖe jlo na nyi odansɔvi tɛye, ni kplɔ-ɔ do. E mɛ, ofi xena mɔ ko le, odansɔvi tɛye ba va nɔ blɛ la can. Na ɛmɛ ɖe nyi odansɔvi tɛye, Didaye na va do bubu e wu.
Yesu lɔ oxo do oku etɔn wu
27 Fifi okla tɛye le onulilo mɛ. Oxo ŋukɔ lɛ ko na lɔ? Otɔ, ká na na vivɛsise we oganxixo xe la a va ji ye wɛ ko na lɔ? Vɔ, oganxixo xe la wɛ dɔn na ko do va. 28 Otɔ ɖe hɔnhlɔn tɔwe sɔ xlɛ.» Mi wɛ ogbe ɖe ɖi sɔn jigbe bo tun: «Ko o ɖe hɔnhlɔn tɛye la xlɛ, ko bo na mɔ ɖe xlɛ ke.» 29 Ɛmɛ susu xeye ni le ofi la, bo se ogbe la we ɖiɖi ye, lɔ tun: «Oju wɛ ɖe ogbe!» Ɖeye bo lɔ nɔ tun: «Mawu we ɛwɛndotɔ ɖe wɛ lɔ oxo ni-i.» 30 Vɔ, Yesu bo lɔ na ye tun mɔ: «E ɔn nyi mɔ hɛn dɔn na ogbe mɛ la do ɖi, vɔ miye wɛ. 31 Hwexenu na Mawu na ɖo kojo na ɛgbɛ la xɛn va, fifi wɛ Mawu na nya ɛmɛ xeni kpa ɛcɛ do ɛgbɛ la ji, tɔn-ɛ. 32 Hwexenu na ye na kɔ-ɔ tɛ le nyixɔ ji bwɛ, ko na dɔn ɛgbɛtɔ zɛtɛye do va ji ye.» 33 Oku xe ha na e na va ku we xo wɛ e lo lɔ nɔ ɖo mɔsinha. 34 Otogun la bo ɖo e wu ni-i tun mɔ: «Mi se le Osɛn wema la mɛ tun Klisu la bo na nɔ ɛgbɛ tɛgbɛ. Fifi naɖe lɛ e nyi ɖo na o mɔ do lɔ nɔ tun ye bo na kɔ Ɛgbɛtɔ we Ovi la yi jigbe? Onu lɛ nyi Ɛgbɛtɔ we Ovi la?» 35 Yesu bo lɔ na ye tun mɔ: «Kinklɛn la gbɛ le kpodo mi na azan ovii ɖe. Mi zɔn zɔnlin le hwexenu na kinklɛn la gbɛ le mia kɔn, vuvlu ko mɔ do va cɔn mi le ajiji mɛ nɔ, ɖo, ɛmɛ xeni zɔn zɔnlin le vuvlu mɛ nɔ, ɔn nɔ nyɔ ofi xena e lo yi nɔ. 36 Mi wɛ dɔn, fifi xena kinklɛn la le mia kɔn, mi kan do e ji, na mi a do nyi kinklɛn vikpɛye.»
Xena Yesu lɔ oxo mɛ la vɔ, e sɔn bo va yi bɛ do ye.
Jwifuye ɔn kan do Yesu ji
37 Yesu ɖe josi susu sɔ xlɛ dogbɔn ŋudandonu swiwasi mɛ le ŋumɛ na ye, ganke ye ko kan do e ji. 38 E mɛ, oxo xena oxolɔɖonyitɔ Ezayi o lɔ saa ba do cɛ, e lɔ tun mɔ:
«Xwetɔ, onu lɛ kan do oxo xena mí lɔ laye ji?
Onu lɛ Xwetɔ la ɖe hɔnhlɔn etɔn sɔ xlɛ?»
39 Ye ko kpewu na kan do e ji can, ɖo, Ezayi la mɔ lɔ tun mɔ:
40 «Mawu gba ŋukunsin na ye;
Bo na na oto yetɔnye tri,
Na ye ko mɔ do kpɔn onu nɔ
Ayixa yetɔnye ko mɔ do kpɔn onu jɛ e wu nɔ,
Ye na gba va lɛkɔ va Mawu kɔn,
Mawu ba va gɔ adɔn na ye.»
41 Ezayi lɔ oxo mɛ la, ɖo e kpɔn Yesu we ninɔmɛ ɖaxo, bo lɔ oxo do Yesu la wu. 42 Ganke, le Jwifuye we oga laye ŋutɔ mɛ, ɛmɛ susu kan do e ji. Vɔ, do Falizitɔye wu, ye ɔn nɔ lɔ-ɛ le agbaŋugba, ɖo, ye vɔ nɔ tun ye bo na nya ye le okplityɔn la tɛgbɛ-tɛgbɛ. 43 Ɖo, ɛgbɛtɔye a kanfu ye wɛ ye yi owan na, sɔ hugan tun Mawu a kanfu ye.
Oxo Yesutɔnye wɛ na ɖo kojo
44 Yesu kɔ ogbe yi oji bo tun mɔ: «Ɛmɛ xeni kan do ji ye, e ɔn nyi mɔ ji ye jan hɛn e kan do, vɔ, e kan do ɛmɛ xeni dɔn-ɔ ɖodan la can ji. 45 Ɛmɛ xeni kpɔn mɔ, e kpɔn ɛmɛ xeni ɖo-o ɖodan la can. 46 Mɔ kinklɛn la, ko va ɛgbɛ la mɛ, e mɛ, ɛmɛ ɖekpekpe xeni na kan do ji ye, ɔn mɔ nɔ vuvlu mɛ nɔ. 47 Na ɛmɛ ɖe se oxo tɛye e ko wasi do e ji, e ɔn nyi mɔ hɛn na do ɛhwɛ ni-i, ɖo, mɔ ko ɔn va na do do ɛhwɛ na ɛgbɛ la, vɔ a do hwlɛn-ɛ gan wɛ. 48 Ɛmɛ xeni gbɛ-ɔ, e ko yi ogbe na oxo tɛyee, onu xeni na ɖo kojo ni-i, o le. Oxo xena ko lɔ, wɛ na ɖo kojo ni-i, le azan kpotwi la gbe. 49 Ɖo ko ɔn lɔ xo le mɔ ŋutɔ we ɛcɛ mɛ, vɔ, Didaye xeni sɔ-ɔ sɔ ɖodan, emyɔ ŋutɔ wɛ ɖe ogbe na-a ma do lɔ onu zɛtɛye xena ko ɖo na lɔ. 50 Ko bo nyɔ-ɛ tun ogbeɖiɖe etɔn nɔ na Ɛgbɛ Mavɔmavɔ. Onu xe we oxo xena ko lo lɔ nɔ, ko lɔ-ɛ nɔ ɖi lena Didaye lɔ-ɛ ɖo na-a ha.»