5 Yesu yi owan na Mata kpodo nɔvyɛ nyɔnusi la, kpodo Lazaa. 6 E se tun Lazaa bo jɛ adɔn nɔ, ganke, e mɔ nɔ onyi na onyihinhɔn owe le ofi xena e le la. 7 E mɛ godo, e bo lɔ na onukplanvi etɔnye tun mɔ: «Mí a trɔ yi Yude.» 8 Onukplanvi laye bo kan-ɛ se tun mɔ: «Hlabi, azan ovii ɖe jan xɛn Jwifuye kan na tɔ ɛkpɛn we a bo hu we le oto mɛ blɛ, mi wɛ o ka mɔ gblɔn yi nɔ ke?» 9 Yesu bo ɖo e wu na ye tun mɔ: «Oganxixo weve hɛn le oklo ɖokpo mɛ wɛɛ? Na ɛmɛ ɖe lo zɔn zɔnlin nɔ le oklo, e ɔn nɔ klɛn onu, ɖo, kinklɛn ɛgbɛ la mɛ tɔn nɔ na na e nɔ kpɔn onu nɔ. 10 Vɔ, na ɛmɛ ɖe lo zɔn zɔnlin le ozan mɛ nɔ, e nɔ klɛn onu, ɖo, kinklɛn ɔn le e mɛ.»

11 Xena e lɔ oxo mɛ laye vɔ, e lɔ tun mɔ: «Hadwe míatɔn Lazaa, dɔ awlɔn, vɔ, ko na va yi fɔn-ɛ.» 12 Onukplanvi laye bo lɔ ni-i tun mɔ: «Xwetɔ, e nyi tun awlɔn jan wɛ e dɔ, be adɔn etɔn na gɔ!» 13 Vɔ, oku Lazaatɔn we oxo wɛ Yesu lo lɔ nɔ, vɔ, yee bo bu-i tun awlɔn vɔvɔ wɛ e dɔ nɔ ha. 14 Mi wɛ, Yesu ɖe e mɛ na ye tun Lazaa bo ku. 15 E bo mɔ lɔ tun: «Do miye wu, e nyi jijwɛ na-a tun ko ɔn le blɛ le hwemɛ la nu, e mɛ, mi ba do kan do ji ye. Vɔ fifi, mi na na mí a yi e kɔn.» 16 Mi wɛ Tɔma xena ye mɔ nɔ yɔ tun Togbosu, lɔ na onukplanvi gbokpweye tun mɔ: «Mi na na míye can mí a yi, a do va yi ku kpo-e!»

17 Xena Yesu va, e se tun ye bo o sɔ Lazaa we ocɔ sɔ do yɔgun mɛ sɔn onyihinhɔn ɛnɛ gbɔɔn. 18 Kpɛntin atɔn ha jan wɛ ma Betani kpodo Jeluzalɛmu we toxo la mɛ. 19 Jwifu susu va Mata kpodo Malya kɔn, a do va fa akɔn na ye, do ye nɔvyɛ we oku la wu. 20 Xena Mata se tun Yesu bo gbɔn nɔ, e va yi kpe-e, hwemɛnu Malya bo xlɔn onyi le oxwe la gbe. 21 Mata bo lɔ na Yesu tun mɔ: «Xwetɔ, na o do le bwɛ saa wɛ, nɔvye ɔn ku nɔ. 22 Vɔ, ko nyɔ-ɛ tun gbɔɔn do jɛ fifi can, onu zɛtɛye xena o na byɔ Mawu, e na sɔ ye na we.» 23 Yesu bo ɖo e wu ni-i tun mɔ: «Nɔvwe na fɔn sɔn oku.» 24 Mata bo yi ogbe ni-i tun: «Ko nyɔ-ɛ tun e na va fɔn sɔn oku le finfɔn sɔn oku hwenu le azan kpotwi la gbe.» 25 Yesu lɔ ni-i tun mɔ: «Mɔ wɛ nyi finfɔn sɔn oku, bo mɔ nyi ɛgbɛ la. Ɛmɛ xeni kan do ji ye, na e mɔ do ku can, e na nɔ ɛgbɛ. 26 Ɛmɛ xeni le ɛgbɛ, bo kan do ji ye, ɔn ku nɔ gbeɖe. O kan do e ji?»

27 Mata bo ɖo e wu tun: «Ɛɛn, Xwetɔ, ko kan do e ji tun myɔ bɛ bo nyi Klisu la, Mawu we Ovi, xeni ɖo na va ɛgbɛ la mɛ.»

28 Xena Mata ɖo oxo mɛ la wu, e sɔn, bo va yi yɔ nɔvyɛ Malya, bo ɖe okpa ni-i tun mɔ: «Onukplan-ɛmɛtɔ la va, bo yɔ we nɔ.» 29 Xena Malya se mɔsinha, e site kplaŋu, a do va yi kpe Yesu. 30 Vɔ, Yesu ɔn ɖyɛ otota la mɛ hɔnɖyo, e gbɛ le ofi xena Mata va yi kpe-e le la. 31 Jwifu xeye ni le oxwe la gbe le Malya kɔn ye, bo do fa akɔn ni-i nɔ ye, kpɔn tun e bo site kplaŋu bo tɔn. Yee can kplɔ-ɛ do, bo bu-i nɔ tun yɔgun la to wɛ e yi nɔ ha, a do va yi fan avin. 32 Xena Malya va jɛ ofi xena Yesu le la, bo kpɔn-ɛ, e jɛ klita le ŋukɔn ni-i bo tun: «Xwetɔ, na o do le bwɛ saa wɛ, nɔvye ɔn ku nɔ mɔ!» 33 Xena Yesu kpɔn tun e bo fan avin nɔ, Jwifu xeye ni kplɔ-ɛ do laye can bo lo fan avin nɔ, e ɖu adɔnu ni-i taŋu, ayixa etɔn bo gba do. 34 E bo lɔ tun: «Yɔgun^b ŋukɔ mɛ lɛ mi sɔ-ɛ sɔ do?» Ye bo ɖo e wu ni-i tun: «Xwetɔ, va kpɔn.» 35 Yesu fan avin. 36 Mi wɛ Jwifuye lɔ tun: «Mi kpɔn lena e yi owan ni-i ɖo!» 37 Vɔ, ɖeye bo le ye mɛ bo lɔ tun mɔ: «Emyɔ xeni hun ŋukunsin na ŋuvanɔ, ɛlɛ jɔ e ɔn kpewu hɛn do ɖe gbɔɔn na Lazaa la we oku do glo?»

38 Onu la mɔ ɖu adɔnu na Yesu taŋu, e bo yi yɔgun la kɔn. Yɔgun la le ɛkpɛn ɖaxo ɖe mɛ, ye bo bli ɛkpɛn bo do tu-i. 39 Yesu bo tun: «Mi bli ɛkpɛn la tɛ» Mata, ɛmɛ xeni ku la nɔvyɛ bo lɔ ni-i tun mɔ: «Xwetɔ, e lo hwɛn oxwin nɔ, ɖo, onyihinhɔn ɛnɛ gɔ la xɛn.» 40 Yesu bo ɖo e wu ni-i tun mɔ: «Ko ɔn lɔ na we tun: na o kan do e ji, o na kpɔn Mawu we hɔnhlɔn wɛɛ?» 41 Ye bli ɛkpɛn la tɛ. Mi wɛ Yesu kɔ okɔ do yi oji, bo lɔ tun mɔ: «Didaye, ko do ɛkpɛ na we, ɖo, o ɖo oto-o. 42 Ko nyɔ-ɛ tun o nɔ ɖo oto-o tɛgbɛ, vɔ, ɛmɛ susu xeni lɛdo xeye wɛ dɔn na ko do lɔ oxo xe nɔ, na ye a do kan do e ji tun myɔ bɛ bo ɖo-o ɖodan.» 43 Xena e lɔ mɔsinha vɔ, e do axwa sinsyɔn bo lɔ tun mɔ: «Lazaa, tɔn!» 44 Mi wɛ ɛmɛ xeni ku saa la bo tɔn, afɔye kpodo alɔye bo mɔ gbɛ le bibla kpodo avɔvinu, avɔ bo bla ŋumɛ ni-i. Mi wɛ Yesu lɔ tun mɔ: «Mi tun-i, a bo jo-e do, ni a sɔn.»

45 Le Jwifu xeye ni va Malya kɔn bo kpɔn onu xena Yesu wasi la ye mɛ, ɛmɛ susu kan do Yesu la ji. 46 Vɔ, ɛmɛ buye le ye mɛ, bo va yi kpɔn Falizitɔye, bo to onu xena Yesu wasi la, na ye. 47 Ovɔsantɔ ɖaxoye, kpodo Falizitɔye yɔ ɛhwɛɖɔtɔ ɖaxo we okpli, bo lɔ tun mɔ: «Ɛlɛ mí na wa? Ɖo dahwe xe lo ɖe josi susu xlɛ nɔ dogbɔn ŋudandonu wiwasi mɛ! 48 Na mí jo-e do, e bo yi ŋukɔn le e mɛ nɔ, ɛmɛ zɛtɛye na kan do e ji, Hlɔma we otogaye ba site a bo gba Mawu we oxwe la, a bo vɔ okun na otogun míatɔn!» 49 Ɛmɛ ɖokpo le ye mɛ bo nɔ nyi Kayifu; e bo nyi ovɔsantɔ ɖaxo le oxwe mɛ la mɛ, bo lɔ tun mɔ: «Miye, mi ɔn kpɔn onu jɛ onu ti wu mɔ! 50 Mi ɔn kpɔn-ɛ fifi tun na ɛmɛ ɖokpo gee ku do ota mɛ na otogun la, e na ɖe ale na mi^c hugan tun otogun la seŋu a vɔ okun wɛɛ?» 51 Vɔ, e ɔn nyi emyɔ ŋutɔ hɛn lɔ oxo mɛ laye nɔ, xena e nyi tun emyɔ wɛ nyi ovɔsantɔ ɖaxo le oxwe mɛ la mɛ, oxo wɛ e lɔ ɖo onyi nɔ tun Yesu bo na ku do ota na Jwifuye we otogun la. 52 E ko nyi otogun la ɖoɖyo hɛn can, vɔ, e na ku a do dɔn Mawu we ovi xeye ni gbado zɛtɛye do okpɔ. 53 Bɛ sɔn gbegbe mɛ la, ye sɔ ogbeta na do hu-i. 54 Mi wɛ dɔn Yesu ɔn mɔ nɔ tɔn jɛ agbaŋugba le Jwifuye mɛ. Vɔ, e lɛ le blɛ la bo sɔn yi kansin ɖe xeni tɛkpɔ zogbeji mɛ, le toxo xena ye nɔ yɔ tun Eflayimu mɛ, e bo nɔ blɛ la kpodo onukplanvi etɔnye.

55 Jwifuye we Vivayi we oxwe bo o lo tɛkpɔ nɔ, kansin la mɛ tɔ susu bo yi Jeluzalɛmu, a do va yi sra ɛwu, gbɔxwe oxwe la a va. 56 Jwifuye bo kan Yesu nɔ, ye bo kan yenɔniɔye se nɔ le Mawu we oxwe la gbe tun mɔ: «Naɖe lɛ mi susu do e wu? E na va oxwe la ɖu gbe doo fi?» 57 Ovɔsantɔ ɖaxoye kpodo Falizitɔye o ɖe ogbeta tɔn-ɛ, tun na ɛmɛ ɖe nyɔ ofi xena Yesu le, ni boo xo okpa na heye, na heye a bo wle-e.