Yesu fɔn sɔn oku
20
1 Le kwɛsiɖagbe kɛklɛnu, le hwexenu na vuvlu mɔ gbɛ le ote, Malya Madalatɔn yi yɔgun la to. E bo kpɔn tun ye bo bli ɛkpɛn xeni le yɔgun la nu tɛ. 2 Mi wɛ, e do odun bo va yi kpɔn Simɔ Piyɛ, kpodo onukplanvi ɖe la, xena Yesu yi owan na, e bo lɔ na ye tun mɔ: «Ye kɔ Xwetɔ la we ocɔ tɛ le yɔgun la mɛ, mí ko nyɔ ofi xena ye sɔ-ɛ ɖo.» 3 Piyɛ kpodo onukplanvi ɖe la, tɔn a do yi yɔgun la to. 4 Ye ɛmɛ owe laye bɛ odun kpɔkpɔ, onukplanvi ɖe la, bo do odun hugan Piyɛ, bo jɛ ote le yɔgun la to jɛ ŋukɔn ni-i. 5 E xwi bo kpɔn yɔgun la mɛ, bo kpɔn avɔvinu laye le ofi la, vɔ e ko ɖyɛ e mɛ. 6 Simɔ Piyɛ, xeni le ɛtɛ ni-i, va va, bo ɖyɛ yɔgun la mɛ. E bo kpɔn avɔvinu laye le ofi la, 7 kpodo avɔ xena ye do bla ota na Yesu. Avɔ mɛ la ɔn le aha na avɔvinu laye, e le xixotɛ le ovo, le ofi bu. 8 Mi wɛ, onukplanvi ɖe la, xeni va jɛ ŋukɔn la can ɖyɛ yɔgun la mɛ, e bo kpɔn, bo kan do e ji. 9 Ɖo, gbɔɔn do va jɛ hwe mɛ la nu onukplanviye ɔn kpɔn onu jɛ oxo xeni le Winwlan kinkwɛn la mɛ wu, tun Yesu bo ɖo na fɔn sɔn oku. 10 E mɛ godo, onukplanvi owe laye bo trɔ sɔn yi oxwe yetɔnye gbe.Yesu ɖe eɖe sɔ xlɛ Malya Madalatɔn
(Mat 28:9-10; Mak 16:9-11)
11 Malya le yɔgun la to, bo fan avin nɔ. Le hwexenu na e fan avin nɔ la, e xwi a do kpɔn yɔgun la mɛ, 12 mi wɛ e kpɔn Mawu we ɛwɛndotɔ owe, ye bo do onu owee, bo xlɔn ofi xena ye sɔ ocɔ Yesutɔn sɔ ɖo saa la. Ɛmɛ ɖokpo le otagbe, ɛmɛ owegɔ la bo le afɔgbe.
13 Ye bo lɔ ni-i tun mɔ: «Nyɔnu, ɛlɛ jɔ o fan avin nɔ?» E bo ɖo e wu na ye tun mɔ: «Ye kɔ Xwetɔ tɛye we ocɔ, ko ko nyɔ ofi xena ye kɔ-ɛ sɔ ɖo.» 14 Xena e lɔ mɔsinha vɔ, e trɔ okɔ kpɔn godo, bo kpɔn Yesu le ote le blɛ, vɔ e ɔn nyɔ-ɛ tun Yesu wɛ. 15 Yesu bo lɔ ni-i tun: «Nyɔnu! Ɛlɛ jɔ o do fan avin nɔ? Onu lɛ o lo kan nɔ?» Malya bo bu-i tun ɛjikpa la ji kpɔntɔ wɛ ha. E bo ɖo e wu tun: «Ɛmɛɖaxo, e nyi myɔ wɛ kɔ-ɛ, bo lɔ ofi xena o sɔ-ɛ ɖo na-a, na ma va yi kɔ-ɛ.» 16 Yesu bo yɔ-ɛ, bo tun: «Malya!» E bo trɔ okɔ bo lɔ ni-i le Hebligbe mɛ tun «Hlabuni» xe we gɔnmɛ ni nyi onukplan-ɛmɛtɔ. 17 Mi wɛ Yesu lɔ ni-i tun mɔ: «Ká hɛn-ɔa ɖo ote, ɖo ko ɔn yi Didaye de hɔnɖyo. Vɔ, yi nɔvyee de, a bo lɔ na ye tun ko bo yi Didaye xeni mɔ nyi miatɔ de nɔ, mi wɛ nyi Mawu tɛye bo mɔ nyi Mawu miatɔn.» 18 Mi wɛ Malya Madalatɔn yi onukplanvi laye de bo lɔ na ye tun he bo kpɔn Xwetɔ la. E bo lɔ oxo xena Yesu lɔ la, na ye.
Yesu ɖe eɖe sɔ xlɛ onukplanviye
19 Le kwɛsiɖagbe mɛ la we hwedo, onukplanvi laye kpli le oxwe ɖe gbe bo do ogan agbo la mɛ, ɖo, ye vɔ Jwifuye we ogaye nɔ. Yesu va, bo nɔ ote le dodomɛ na ye, bo lɔ na ye tun: «Fifa na mi!» 20 Xena e lɔ mɔsinha vɔ, e sɔ alɔ etɔnye kpodo daja etɔn sɔ xlɛ ye. Oji bo jɔ ye taŋu do Xwetɔ la na ye kpɔn wu. 21 Yesu mɔ lɔ na ye ke tun mɔ: «Fifa ni nɔ kpodo mi. Ɖi lena Otɔ la ɖo-o ɖodan ɖo ha, mɔ can ko lo ɖo mi ɖodan nɔ.» 22 Xena e lɔ oxo mɛ laye vɔ, e ɖe fufu do ye ji, bo tun: «Mi yi Gbigbɔ Kinkwɛn! 23 Na mi sɔ onu nyanyla sɔ kɛ ɛmɛ ɖe, ye na sɔ kɛ-ɛ, na mi ɔn sɔ onu nyanyla sɔ kɛ ɛmɛ ɖe, ye ɔn sɔ kɛ-ɛ nɔ.»
Tɔma ɔn kan do e ji tun Yesu bo fɔn sɔn oku
24 Vɔ, ɛmɛ ɖokpo le onukplanvi weve laye mɛ, bo nɔ nyi Tɔma, ye bo mɔ nɔ yɔ-ɛ tun Togbosu, e ɔn le ye kɔn na Yesu la do va. 25 Onukplanvi gbokpweye bo lɔ ni-i tun mɔ: «Mí kpɔn Xwetɔ la!» Vɔ, Tɔma bo ɖo e wu na ye tun mɔ: «Na ko ɔn kpɔn ganso we abikpa la le alɔ mɛ ni-i, ko ko zin alɔvi tɛye do ofi xena ye xo gansoye do la, ko ko mɔ zin alɔ tɛye do daja can mɛ ni-i, be ko ɔn kan do e ji nɔ kpɔn gbeɖe.» 26 Kwɛsiɖa ɖokpo godo, Yesu we onukplanviye mɔ va kpli ke le oxwe la gbe, Tɔma bo le ye kɔn. Ye bo do ogan agbo laye mɛ, ganke Yesu bo va nɔ ote le dodomɛ na ye bo tun: «Fifa ni nɔ kpodo mi!» 27 E bo lɔ na Tɔma tun: «Drɛn alɔvi tɔwe la do bwɛ, kpɔn alɔ tɛyee; drɛn alɔ tɔwe a bo sɔ do daja tɛye mɛ; jo onu xixokpɔn do, a bo ɖo xɔse!» 28 Tɔma bo ɖo e wu ni-i tun: «Xwetɔ tɛye, Mawu tɛye!» 29 Yesu bo lɔ ni-i tun: «Xena o kpɔn-ɔ, hɛn dɔn o do kan do e ji wɛɛ? Nyɔnanɔye wɛ na nyi ɛmɛ xeye ni ɔn kpɔn, ganke bo kan do e ji ye!»
Onu xeni dɔn na ye do wlan wema xe