4 Pilati mɔ tɔn va gaji bu ke, bo mɔ lɔ na Jwifu laye tun mɔ: «Mi kpɔn! Ko na ɖe-e tɔn-ɛ va gaji na mi, e mɛ, mi ba do nyɔ-ɛ tun mɔ bo ɔn kpɔn ofɛn ti le e wu bo na do do ɛhwɛ ni-i?» 5 Yesu bo tɔn va ga la ji kpodo ɛŋugba le ota, awu gaga ovɛ cɛcɛ la bo le okɔ ni-i. Mi wɛ Pilati lɔ na ye tun mɔ: «Dahwe la xɛn!» 6 Vɔ, xena ovɔsantɔye we ogaye, kpodo Mawu we oxwecɔtɔye kpɔn-ɛ, ye do axwa nɔ, bo lɔ nɔ tun mɔ: «Kan-ɛ do otinsoga ji! Kan-ɛ do otinsoga ji!» Mi wɛ Pilati lɔ na ye tun mɔ: «Miye ŋutɔye, mi va yi kan-ɛ, ɖo mɔ ko ɔn kpɔn ofɛn ɖe bo na do do ɛhwɛ ni-i.» 7 Jwifuye ɖo e wu ni-i tun mɔ: «Mí ɖo osɛn, osɛn mɛ la bo byɔ tun, e bo ɖo na ku, ɖo e sɔ eɖe do wasi Mawu we Ovi.»

8 Xena Pilati se oxo mɛ la, vivɔ mɔ jɛ vivɔ ji ni-i. 9 E mɔ ɖyɛ oxwe la gbe bo kan Yesu se tun mɔ: «Bɔ tɔ lɛ o nyi?» Vɔ, Yesu ko ɖo oxo ti e wu ni-i. 10 Mi wɛ Pilati lɔ ni-i tun mɔ: «O bɔ onu do e mɛ na mɔ wɛɛ? Alo o ɔn nyɔ-ɛ tun ko ɖo ɛcɛ na do jo we, bo mɔ ɖo ɛcɛ na do kan we do otinsoga ji wɛɛ?» 11 Yesu bo ɖo e wu ni-i tun mɔ: «Na e nyi tun Mawu ɔn na ogbe we, o ɔn ɖo ɛcɛ ti do ji ye nɔ. Mi wɛ dɔn ɛmɛ xeni sɔ-ɔ do asi na we nɔ we ɛhwɛhuhu hugan tɔwe.»

12 Bɛ sɔn ogan mɛ la mɛ, Pilati lo kan ayixa nɔ, a do jo Yesu do. Vɔ Jwifuye bo jɛ axwa dido ji, bo tun: «Na o jo dahwe xe do, be ɔn nyi xɔlu ɖaxo Hlɔmatɔn we hadwe. Ɖo, ɛmɛ ɖekpekpe xeni sɔ eɖe do wasi xɔlu, ɛmɛ mɛ fɔn ogu do xɔlu ɖaxo la ji.» 13 Xena Pilati se oxo mɛ laye, e ɖe Yesu tɔn-ɛ va gaji; bo va yi xlɔn onyi le ɛhwɛɖɔkpo ji, le ofi xena ye tɛ ɛkpɛn nywɛ-nywɛye do nyixɔmɛ le, ye bo nɔ yɔ ofi la tun: «Gabata» le Hebligbe mɛ. 14 Vivayi we oxwe la drɔn swɛ, ye boo lo sɔ onu na oxwe la ɖuɖu nɔ, ogan weve mɔsinha bo lo xo nɔ. Mi wɛ Pilati lɔ na Jwifuye tun mɔ: «Xɔlu miatɔn la xɛn!» 15 Vɔ, ye bo jɛ axwa dido ji bo tun: «Hu-i! Hu-i! Kan-ɛ do otinsoga ji.» Pilati bo lɔ na ye tun mɔ: «Ma kan xɔlu miatɔn la do otinsoga ji wɛɛ?» Mi wɛ ovɔsantɔye we ogaye ɖo e wu ni-i tun mɔ: «Mí ɔn ɖo oga bu ɖe zɛgbɔn xɔlu ɖaxo Hlɔmatɔn wu.» 16 Mi wɛ Pilati sɔ Yesu sɔ jo na ye, na ye a do va yi kan-ɛ do otinsoga ji.

Ye bo kplɔ Yesu do sɔn.

17 Yesu ŋutɔ bo kɔ otinsoga etɔn bo do tɔn le toxo la mɛ, bo yi ofi xena ye nɔ yɔ tun Takya we tɛnxo; le hebligbe mɛ, ye nɔ yɔ-ɛ tun Gɔlugota. 18 Blɛ wɛ sɔja laye kan Yesu do otinsoga ji le. Ye bo mɔ kan ɛmɛ owe do aha ni-i, ɖokpo le aɖusi mɛ, ɖokpo bo le amyɔ mɛ, Yesu bo le dodomɛ. 19 Pilati mɔ na na ye wasi tɛkpovi ɖe, ye bo sɔ xo do otinsoga la ji le jigbe. Ye bo wlan do e ji tun mɔ: «Yesu Nazalɛtitɔn, Jwifuye we xɔlu.» 20 Mi wɛ Jwifu susu xlɛ onu xena ye wlan do tɛkpovi la ji, ɖo, ofi xena ye kan Yesu do la, e ɔn dɛn do toxo la wu, ye bo mɔ wlan onu la do Hebligbe mɛ, Latɛngbe mɛ, kpodo Glɛkigbe mɛ. 21 Mi wɛ Jwifuye we ovɔsantɔ ɖaxoye va yi lɔ na Pilati tun mɔ: «O ɔn ɖo na wlan “Jwifuye we xɔlu” vɔ, o ɖo na wlan tun “Dahwe xe lɔ tun he bo nyi Jwifuye we xɔlu.”» 22 Pilati bo ɖo e wu na ye tun mɔ: «Onu xena ko wlan la, ko wlan-ɛ wɛ.»

23 Xena sɔja laye kan Yesu vɔ, ye sɔ awu etɔnye, bo ma-ɛ ɖo ɛnɛ, sɔja ɖokpo bo yi akpa ɖokpo. Ye mɔ sɔ awu etɔn gblɛlɛ la can. Ye ɔn tɔ awu mɛ la do ofi ti, lɔn wɛ ye lɔn-ɛ sɔn jigbe gbɔɔn bo va odo. 24 Mi wɛ sɔja laye lɔ na yenɔniɔye tun mɔ: «Mí ɔn vun awu gblɛlɛ xe nɔ, vɔ, mí a wasi ovoɖiɖe a do kpɔn ɛmɛ xe tɔn na e na nyi?» Mɔsinha wɛ e jɔ ɖo, na Winwlan kinkwɛn la a do cɛ. Winwlan la lɔ tun mɔ:

25 Yesu onɔ, kpodo onɔ nɔvyɛ nyɔnusi, kpodo Malya Klopasi syɛ, kpodo Malya xeni sɔn Madala, ye va le otinsoga Yesutɔn we aha. 26 Yesu kpɔn onɔ, onukplanvi xena e yi owan na la, bo le aha na onɔ la. Mi wɛ e lɔ na onɔ tun: «Naye, ovi tɔwe mɛ.» 27 E bo mɔ lɔ na onukplanvi la tun: «Nawe mɛ.» Bɛ sɔn hwemɛ la nu, onukplanvi la bo kplɔ onɔ la do sɔn yi oxwe etɔn gbe.

28 E mɛ godo, xena Yesu nyɔ-ɛ tun fifi, onu zɛtɛye bo o vɔ, e lɔ tun mɔ: «Kɔmyɔ ci-u nɔ,» e mɛ, oxo xeni le Winwlan kinkwɛn la mɛ ba do cɛ. 29 Vɛn hwinhwan taŋu bo gɔ ozɛn ɖe le ofi la. Sɔja laye sɔ otu ɖe sɔ nylɔ do vɛn hwinhwan la mɛ, bo sɔ ɖo izɔpu^a we otin ɖe wu, bo hɛn yi onu na Yesu. 30 Xena Yesu nu vɛn hwinhwan la vɔ, e lɔ tun: «Onu zɛtɛye vɔ.» Mi wɛ e do okɔ odo, Mawu bo yi gbigbɔ etɔn.

31 Xena Vivayi we oxwe la drɔn swɛ, ye lo sɔ onu na oxwe la nɔ, ye ko jlo na jo ocɔ laye do otinsoga ji le gbɔjwɛzan la gbe; mɔ bɔ do e wu, gbɔjwɛzan mɛ la bo nyi azan ɖaxo ɖe ɖo e jɛ do Vivayi we oxwe la ji. Ye va yi byɔ ogbe Pilati bo na do wɛn afɔ na ɛmɛ xeye na ye kan laye, a bo ɖe ocɔ laye jɛ ote. 32 Mi wɛ sɔja laye va, bo wɛn afɔye na ɛmɛ tantyantɔn, kpodo ɛmɛ owegɔ xeye na ye kan kpodo Yesu laye. 33 Xena ye va Yesu kɔn, ye kpɔn tun e bo o ku, ye ko mɔ wɛn afɔye ni-i. 34 Vɔ, sɔja ɖokpo le sɔja laye mɛ, bo tɔ kanhwan daja mɛ ni-i, ɛsin kpodo ɛhun kpo bo kɔn zɔnɖokpo. 35 Ɛmɛ xeni kpɔn onu xeni jɔ laye wɛ ɖe kunu nɔ, kunuɖiɖe etɔn bo nyi oxojɔxo. Emyɔ bo nyɔ-ɛ tun oxojɔxo bɛ he bo lɔ nɔ, na miye can a do kan do e ji. 36 Ɖo onu xeye jɔ na Winwlan kinkwɛn la a do cɛ. Winwlan la lɔ tun: «Ye ɔn wɛn oxu etɔn ti nɔ», 37 Winwlan la mɔ lɔ tun: «Ye na ɖe okɔ kpɔn ɛmɛ xena ye tɔ kanhwan la.»

38 E mɛ godo, Jozɛfu xeni sɔn Alimate, va yi byɔ ogbe Pilati, a do kɔ ocɔ Yesutɔn. Jozɛfu la nyi ɖokpo le onukplanvi Yesutɔnye mɛ, vɔ e ɔn nɔ ɖe xlɛ, ɖo e vɔ na Jwifuye we ogaye nɔ. Pilati bo ni-i ogbe. Jozɛfu bo yi, bo kɔ Yesu we ocɔ. 39 Nikodɛmu, dahwe xeni va yi kpɔn Yesu le ozan mɛ saa la, emyɔ can va, bo hɛn ami hwɛnnyɛ xena ye sɔ milu kpodo mimi bo do wasi do va, e bo na yi onudagan ogban mɔsinha. 40 Ye ɛmɛ owe laye kɔ Yesu we ocɔ la, bo butu-i kpodo avɔvinu, bo si ami hwɛnnyɛ la do-e ɖi lena Jwifuye nɔ wasi na ocɔ yetɔnye ɖo ha, gbɔxwe a do sɔ do va yi ɖi. 41 Le ofi xena ye kan Yesu do otinsoga ji le la, ɛjikpa ɖe le ofi la, yɔgun yɔyɔ ɖe bo le e mɛ, ye ko ɖi ocɔ ti do e mɛ kpɔn 42 Blɛ la wɛ ye ɖi Yesu do, ɖo yɔgun la ɔn dɛn do ofi la wu, Jwifuye bo o lo sɔ onu nɔ na gbɔjwɛzan la.