Wema tantyantɔn xena Pɔlu wlan ɖodan
Timɔte
Pɔlu do ogbe na Timɔte
1
1 Mɔ, Pɔlu xeni nyi Klisu Yesu we ɛmɛ dindɔn wɛ wlan wema xe. Mawu hwlɛngantɔ míatɔn kpodo Klisu Yesu ɛmɛ xe ji na mí sɔ omɔkpinkpɔn míatɔn sɔ ɖo, wɛ can-a dogbɔn ogbeɖiɖe yetɔn mɛ, 2 ko wlan wema xe ɖodan we nɔ, Timɔte, ovi tɛye ŋutɔ-ŋutɔ le xɔse mɛ. Mawu míatɔ, kpodo Klisu Yesu Xwetɔ míatɔn, we dɔmɛnywɛ kpodo dɔŋuɖunu kpinkpɔn kpodo fifa ni nyi tɔwe.Pɔlu tun ye boo cɔ yeɖe do onukplan-ɛmɛtɔ nyanylaye wu
3 Timɔte, ɖi lena ko byɔ we taŋu ɖo ha le hwexenu na ko sɔn yi Masedwanu, nɔ Efɛzu. Ɖo, ɛmɛ ɖeye le blɛ la, bo lo kplan onu xeye ni ɔn sɔgbe kpodo xɔse míatɔn, ɛmɛye nɔ; o ɖo na gbɛ na ye. 4 Gbɛ na ye tun ye boo jo hwenuxo ma nyɔ ota na ye do, boo jo okunkan gblɛlɛlɛye xixlɛ do. Ɖo, onu dindɔnye wɛ ye nɔ hɛn do va, ye ko nɔ na ŋukɔn yiyi Mawu we tito xena ye na kpewu nyɔ dogbɔn xɔse mɛ. 5 Onu xeni dɔn na ko do na we ogbeɖiɖe mɛ wɛ nyi tun, ye ɖo na ɖo owan yiyi xeni sɔn oji mimɛ, ayixa nywɛ kpodo xɔse adodwe mɛ. 6 Ɛmɛ ɖeye trɔ godo do walɔ mɛ laye, bo bu omɔ dogbɔn oxovloye lilɔ mɛ. 7 Ye jlo na nyi osɛnkplan-ɛmɛtɔye, vɔ ye ɔn se oxo xena ye lɔ nɔ ye gɔnmɛ, gbɔɔn do nyɔ onu xena ye kplan ɛmɛye nɔ kpodo kan do e ji kpo la can.
8 Mí ɔn dokpo ma nyɔ-ɛ tun osɛn, onu nywɛ wɛ e nyi, na ye gbɛ zan-ɛ ɖi lena e jɛ ɖo ha. 9 Onu xena mí ɖo na nyɔ-ɛ xɛn: Mawu ɔn ɖo osɛn na ɛmɛ jijwɛye, vɔ Mawu ɖo-e na danuwatɔye, aglajɛtɔye, ɛmɛ xeye ni nɔ ɖo sisi na Mawu ye, onu nyanylawatɔye, ɛmɛ xeye ni ɔn nɔ si Mawu ye, ɛmɛ xeye ni nɔ ko Mawu ye, ɛmɛ xeye ni nɔ hu yetɔye kpodo yenɔye, ɛmɛhutɔye, 10 aledatɔye, ŋusunglo xeye ni nɔ ɖo oxo kpodo ye hatɔ ŋusungloye, nyɔnusi xeye ni nɔ ɖo oxo kpodo ye hatɔ nyɔnusiye, ɛmɛ xeye ni nɔ wle ɛgbɛtɔ a bo va yi sa ye, ojokantɔye, ɛmɛ xeye ni nɔ ta onu do ojo kinkan ji ye, kpodo ɛmɛ zɛtɛye xeni nɔ site kpan ŋukɔn onukpinkplan adodwe la. 11 Onukpinkplan mɛ la sɔgbe kpodo Ɛwɛn Nywɛ xeni nɔ ɖe Mawu xeni jɛ na kanfu we gigo sɔ xlɛ. Ɛwɛn Nywɛ mɛ la wɛ ye sɔ do asi na-a.
Pɔlu do ɛkpɛ na Mawu do dɔmɛnywɛ xeni wasi ni-i wu
12 Ko do ɛkpɛ na Klisu Yesu Xwetɔ míatɔn xeni na-a hɔnhlɔn na ma do wa odan etɔn. Ɖo emyɔ wɛ kpɔn tun mɔ bo nyi ɛmɛ xeni jɛ na ye bo na ɖe oji do e wu, mi wɛ dɔn e do can-a do odan etɔn mɛ; 13 mɔ xeni nɔ lɔ oxo nyanyla do e wu saa, bo nɔ ɖe ofun na xɔsetɔye, a bo wa danu kpo ye nɔ. Vɔ, Mawu va kpɔn dɔŋuɖunu na-a, ɖo xena ko ɔn kan do e ji saa, ko ɔn nyɔ onu xena ko lo wasi nɔ. 14 Xwetɔ míatɔn la kɔn ɛfɛnu etɔn do ji ye taŋu, e bo na-a xɔse, kpodo owan yiyi xeni le Klisu Yesu mɛ. 15 Oxojɔxo kpatakli wɛ nyi oxo xe, e bo jɛ tun ɛmɛ zɛtɛye na yi-i, mi wɛ nyi tun, Klisu Yesu va ɛgbɛ la mɛ, a do va hwlɛn onu nyanylawatɔye gan. Mɔ bɛ wa nyanyla hugan onu nyanylawatɔ mɛ laye seŋu. 16 Vɔ, onu xeni dɔn na Mawu do kpɔn dɔŋuɖunu na-a xɛn, e jlo na Klisu Yesu a ɖe ohun kuku taŋu etɔn sɔ xlɛ, dogbɔn ɛgbɛzan mɔ xeni wa onu nyanyla hugan onu nyanylawatɔ zɛtɛye tɔn mɛ, e ba do nyi kpɔndewu na ɛmɛ xeye ni na va kan do e ji ye, a bo do yi Ɛgbɛ Mavɔmavɔ. 17 Mí a sɔ gigo kpodo yɛyi kpo na Mawu gbɔɔn do yi mavɔ. Emyɔ wɛ nyi Xɔlu mavɔmavɔ, Mawu makumaku, Xɔlu xena ɛmɛ ɖe ɔn nɔ kpɔn, emyɔ ɖokpo gee wɛ nyi Mawu. Ami.
18 Ovi tɛye Timɔte, ogbeɖiɖe xena ko sɔ na we nɔ mɛ. E bo sɔgbe kpodo oxolɔɖonyi xeye na ye lɔ do wu we saa ye. Oxolɔɖonyi mɛ laye ni nɔ do hɔnhlɔn lanmɛ na we, na-a do fun ahwan nywɛ la, 19 kpodo xɔse kpodo ayixa nywɛ kpo. Ɛmɛ ɖeye bo gbɛ oto ɖiɖo ayixa nywɛ mɛ la, e bo na na ye jɛ onyi le xɔse mɛ. 20 Imɛnɛ kpodo Alɛsandru kpo le ɛmɛ mɛ laye mɛ. Ko jo ye na Satanaa, na ye a do kpɔn onu jɛ e wu tun ye bo ɔn ɖo na nɔ zun Mawu.