Pɔlu lɔ oxo sɔn ninɔmɛ xeye na agunkplɔtɔye ɖo na ɖo wu
3
1 Oxojɔxo kpatakli wɛ nyi oxo xe: na ɛmɛ ɖe jlo na nyi agunkplɔtɔ, odan nywɛ mɛ e lo kan nɔ. 2 Agunkplɔtɔ ɖo na nyi ɛmɛ ɖe, xe wu na ye ɔn kpɔn ofɛn ti le nɔ, e na ɖe nyɔnu ɖokpo gee, a bo nɔ wa onu do ojlɛ nu, e ɖo na nɔ bu ota mɛ gbɔxwe a wa onu, a bo ɖo walɔ nywɛ, e ɖo na nɔ yi jonɔ ganji, e ɖo na nyi ɛmɛ xeni na kpewu kplan onu ɛmɛ. 3 E ɔn ɖo na nɔ jo eɖe do na ahan nunu, e ɔn ɖo na nyi tagbanɔ, vɔ, e ɖo na nyi dɔmɛnywɛnɔ, a bo nɔ yi owan na fifa, ni ká nɔ yi owan na oho zɛ ojlɛ wu. 4 E ɖo na nɔ kplɔ ɛmɛ xeye ni le oxwe etɔn gbe ye nywɛɖe, vikpɛ etɔnye ba nɔ se otonu kpodo ɛmɛ sisi taŋu. 5 Ɖo, na ɛmɛ ɖe ɔn kpewu kplɔ ɛmɛ xeye ni le oxwe etɔn gbe ye, naɖe e na wa a do kplɔ Mawu we agun? 6 E ɔn ɖo na nyi ɛmɛ xeni trɔ oji mɛ yɔyɔ, na e ɔn nyi mɔsinha, e na va gɔ kpodo gonyinyi, Mawu bo na va do ɛhwɛ ni-i ɖi lɛgba ha. 7 Mɔ bɔ do e wu, ɛmɛ xeye ni ɔn nyi xɔsetɔye can ɖo na nɔ ɖe kunu nywɛ do e wu. E mɛ, ɛmɛye ko mɔ do do ovɔn-ɛ nɔ, e ko mɔ do jɛ lɛgba we omɔ ɖiɖoye mɛ nɔ.Ninɔmɛ xeye na agun ji we odansɔtɔye ɖo na ɖo
8 Agun ji we odansɔtɔye can ɖo na nyi ɛmɛ xeni jɛ na sisi, a bo nɔ lɔ oxojɔxo. Ye ɔn ɖo na nɔ nu ahan diin, ye ko ɖo na nɔ xo ɛmɛ ɖu. 9 Ye ɖo na tɛ do xɔse we oxojɔxo xena Mawu ɖe xlɛ la wu taŋu, kpodo ayixa mimɛ. 10 Na ye ka sɔ ɛmɛ ɖe do ɖo agun ji we odansɔtɔ nɔ, ye ni do-e kpɔn gbɔxwe, e mɛ godo, na ye ɔn kpɔn ofɛn ti le e wu, e ba bɛ odan la. 11 Nyɔnusiyea can ɖo na jɛ na sisi, ye ko ɖo na nyi ɛmɛxolɔtɔ, ye ba nɔ wa onu do ojlɛ nu, a bo nɔ le ogbeji le onu zɛtɛye mɛ. 12 Agun ji we odansɔtɔ, nyɔnu ɖokpo gee wɛ e ɖo na ɖe. E ɖo na kplɔ vikpɛ etɔnye kpodo xwedo etɔn nywɛɖe. 13 Ɖo, agun ji we odansɔtɔ xeye ni nɔ wa odan yetɔnye ganji, bubu ɖaxo ɖe nɔ nɔ ye wu, ye bo nɔ ɖo kan do e ji ɖaxo le xɔse mɛ, le Klisu Yesu mɛ.
Mawu ɖe onu hwihwla xeni le xɔse mɛ sɔ xlɛ
14 Ko wlan wema xe ɖodan we nɔ, ojlo tɛye bɛ nyi tun ma va kɔn we le madɛn-madɛn mɛ. 15 Vɔ, na viva tɛye la va dɛn nɔ, wema xe la ba na na o na nyɔ lena o ɖo na zɔn ɖo le Mawu we xwedo mɛ, mi wɛ nyi Mawu ɛgbɛ-ɛgbɛ we agun, bo nyi gundo kpodo dodwe na oxojɔxo la. 16 Le oxojɔxo mɛ, onumakpɔndona xena Mawu ɖe xlɛ mí tun míye bo ɖo na kan do e ji la, glo.
Klisu la sɔ ɛgbɛtɔ we ninɔmɛ, bo do va nyixɔ ji,
Gbigbɔ Kinkwɛn bo ɖo ɛkpɛn e ji tun e bo nyi ɛmɛ jijwɛ,
Ɛwɛndotɔ Mawutɔnye bo kpɔn-ɛ,
Ye bo jla oxo etɔn le ɛmɛ xeye ni ɔn nyi Jwifuye mɛ,
Ɛmɛ susu bo kan do oxo etɔn ji le ɛgbɛ la mɛ,
Mawu bo kɔ-ɛ do sɔn yi jiŋukunsin le gigo mɛ.