Pɔlu lɔ oxo do onu xeye ni na jɔ le oganxixo kpotwiye mɛ wu
4
1 Gbigbɔ Kinkwɛn lɔ ceɖe-ceɖe tun mɔ, le oganxixo kpotwiye mɛ, ɛmɛ ɖeye na gbɛ xɔse la, a bo kplɔ gbigbɔ ɛmɛblɛɖutɔye do, a bo mɔ kplɔ onukpinkplan xeye ni sɔn gbigbɔ nylakanye kɔn ye do. 2 Ye na sɔ yeɖe sɔ na ɛyɛmɛnuwatɔ ojokantɔye, xeye ni ɔn mɔ nɔ nyɔ onywɛ le nyanyla mɛ le ɖi ɛmɛ xeye na ye sɔ ogan zozo xɛxɛxɛ do fyɔ ayixaye na ha. 3 Ye nɔ gbɛ na ɛmɛye nɔ tun ye bo ɔn ɖo na ɖe osu alo nyɔnu, a bo tun ye bo ɔn ɖo na ɖu onuɖuɖu ɖeye. Vɔ, Mawu ɖo onuɖuɖu mɛ laye na xɔsetɔ xeye ni nyɔ oxojɔxo laye, a do ɖu, kpodo ɛkpɛ dido kpo. 4 Ɖo, onu xena Mawu ɖo zɛtɛye wɛ nyɔ, onu ti ɔn le na ye na gbɛ. Onu xeni le vivɛɖe wɛ nyi tun, ye ɖo na yi ye kpodo ɛkpɛ dido kpo na Mawu. 5 Ɖo, Mawu we oxo la kpodo ɛɖɛxixo kpo o kɔn ye wu.Pɔlu lɔ lena ye na nyi odansɔvi nywɛ ɖo
6 Na o lo kplan onu mɛ laye nɔvi xɔsetɔye nɔ, o na nyi Klisu Yesu we odansɔvi nywɛ xeni hwɛn nɔ le gbigbɔ mɛ dogbɔn xɔse we oxoye kpodo onukpinkplan nywɛ xena o kplɔ do nɔ, mɛ. 7 Vɔ, gbɔn akpa na hwenuxo xeye ni ɔn nɔ kpedo ɛmɛ wu le xɔse mɛ ye, oxovlo xeye na nyɔnu nyɔxonɔ ɖeye nɔ lɔ nɔ ye. Jɛ gbagba a bo nɔ do ɖo sisi na Mawu. 8 Agbaza mɛ we gbagba jijɛ na lanmɛ a do nɔ nywɛɖe, nɔ kpedo ɛmɛ wu viɖe, vɔ sisi ɖiɖo na Mawu wɛ nɔ kpedo ɛmɛ wu le onu zɛtɛye mɛ, ɖo, e mɛ la mɛ wɛ ɛgbɛ we ajɔgbe finfyan le na egbe kpodo swɛ godo kpo. 9 Oxojɔxo kpatakli wɛ nyi oxo xe, e bo jɛ tun ɛmɛ zɛtɛye a yi-i. 10 Mi wɛ, mí jɛ gbagba nɔ taŋu, ɖo mí sɔ omɔkpinkpɔn míatɔn sɔ ɖo Mawu ɛgbɛ-ɛgbɛ la ji, xeni nyi ɛgbɛtɔ zɛtɛye we hwlɛngantɔ, le ota ji xɔsetɔyetɔn. 11 Ogbeɖiɖe kpodo onukpinkplan xeye na o na wasi ye mɛ. 12 Ɛmɛ ti ni ká do ovɔn we do hwanjavi xena o nyi wu, vɔ, nyi kpɔndewu na xɔsetɔye le oxo lilɔ mɛ, le afɔ ɖiɖe mɛ, le owan yiyi mɛ, le xɔse mɛ, kpodo ɛgbɛ mimɛ zinzan mɛ. 13 Gbɔɔn do jɛ hwexenu na ko na va va, sɔ ɖiwe sɔ san ovɔ, a nɔ do xlɛ Winwlan Kinkwɛn laye na xɔsetɔye, a bo nɔ do akpakpa lanmɛ na ye nɔ, a bo mɔ nɔ do kplan onu ye nɔ. 14 Ká mɔ ɖe okɔ le onunina gbigbɔ mɛ tɔn xeni le si we wu o, onunina xena o yi dogbɔn oxolɔɖonyi mɛ le hwexenu na agunmɛhyɔnye ɖo alɔ ota na we. 15 Bya ŋukunsin do onu mɛ laye wu, a bo sɔ ɖiwe sɔ na blebu na odan mɛ la. E mɛ, ɛmɛ zɛtɛye na kpɔn ŋukɔn yiyi tɔwe. 16 Kpe ŋukunsin do myɔ ŋutɔ kpodo onukpinkplan tɔwe wu, o ba do vivɛnu le e mɛ. Ɖo, na o lo wasi mɔsinha nɔ, o na hwlɛn myɔ ŋutɔ kpodo ɛmɛ xeye ni nɔ ɖo oto we nɔ ye, gan.