Pɔlu lɔ oxo sɔn odan xena ye ɖo na wa do kpan ŋukɔn agunviye wu
5
1 Ká kan ŋumɛ na ŋusunglo nyɔxonɔ a do gbɛ onu ni-i o, vɔ do akpakpa lanmɛ ni-i ɖi ɛmɛtɔ ha. O ba nɔ do akpakpa lanmɛ na hwanjaviye ɖi nɔvi ŋusungloye ha, 2 a bo do akpakpa lanmɛ na nyɔnu nyɔxonɔye ɖi ajinɔye ha, mɔsinha ke wɛ o na nɔ do akpakpa lanmɛ na nyɔnuviye ɖi nɔvi nyɔnusiye ha, kpodo zinzan mimɛ. 3 Kpodo sisi, kpe ŋukunsin do okposi xeye ni hyan alɔgɔ ye wu. 4 Vɔ, na okposi ɖe ɖo vikpɛye alo mamayɔviye, yevyɛ laye ni nɔ kplan sisi ɖiɖo na xwedo yetɔnye tantyan, a bo kpe ŋukunsin do xwedo la wu ɖi lena ye kpe ŋukunsin do yee wu le vikpɛvi mɛ ɖo ha. Onu xeni nɔ jɛŋu na Mawu, e mi mɛ. 5 Okposi xeni hyan alɔgɔ, xeni ɔn ɖo ɛmɛ ti xeni na kpe ŋukunsin do e wu, e nɔ sɔ omɔkpinkpɔn etɔn sɔ ɖo Mawu ji. Ozan kpodo oklo, e nɔ ɖe kuku nɔ a bo xo ɛɖɛ nɔ kpodo vivɛnu dido. 6 Vɔ, okposi xeye ni sɔ yeɖe na ɛgbɛ ɖuɖu, ye le ɛgbɛ ganke bo o ku. 7 Ogbeɖiɖe xeye na o na lɔ do asi na ye, e mi mɛ, na ɛmɛ ɖe ko mɔ do va kpɔn oxo ɖe a bo lɔ do ye wu nɔ o. 8 Na ɛmɛ ɖe ɔn nɔ kpe ŋukunsin do ɛmɛ etɔnye wu, le ota ji, ɛmɛ xeye ni le xwedo etɔn mɛ ye, be e bo flɛ le xɔse mɛ. E mɔ nyla hugan maxɔsetɔ.9 Gbɔxwe na o na do nyɔnu ɖe we nyikɔ okposiye we wema mɛ, oxwe etɔn ɔn ɖo na hwe hugan kanɖeko. E bo ɖo na nyi nyɔnusi xeni ɖe osu ɖokpo gee kpɔn le ɛgbɛ etɔn mɛ. 10 Ye bo ɖo na nyɔ-ɛ tun e bo nyi odan nywɛ watɔ, bo nɔ na okplan vikpɛye, bo nɔ yi jonɔ, bo nɔ klɔ afɔ na xɔsetɔyea, bo nɔ gɔ alɔ na ɛmɛ xeye ni le vivɛsise mɛ ye, bo mɔ nɔ bya ŋukunsin do odan nywɛ ɖekpekpe wiwa wu.
11 Vɔ, ká do okposi nyɔnuviyeb we nyikɔ wema la mɛ, ɖo hwexenu na ŋusunglo nɔ va jlo ye nɔ, ojlo mɛ la bo va dɔn ye tɛ le Klisu la wu, ye nɔ jlo na ɖe osu. 12 E mɛ la wɛ dɔn na Mawu we kojoɖiɖo na jɛ ye ji, ɖo ye ɔn mɔ le ogbeji na ajɔgbe xena ye fyan na Klisu la. 13 Mɔ bɔ do e wu, xena e nyi tun ɖiɖɔ wɛ ye va kplan nɔ, ye nɔ dan gbɔn xwegbe-xwegbeye nɔ, xeni mɔ va nyla taŋu la wɛ nyi tun jɛtun jijɛ nɔ hugan ye, oxo xeni ɔn kan ye, ye ba do onu e mɛ nɔ, a bo nɔ lɔ oxo xeye na ye ɔn ɖo na lɔ ye nɔ. 14 Mi wɛ dɔn, ko jlo tun okposi nyɔnuviye a ɖe osu, a bo ji ovi, a bo kplɔ oxwe yetɔnye. E mɛ, kɛntɔ míatɔnye ko mɔ kpɔn omɔ a do lɔ oxo nyanyla ti do mía wu nɔ. 15 Ɖo, okposi ɖeye o bu le omɔ nywɛ la ji, bo kplɔ Satana do. 16 Vɔ, na nɔvi xɔsetɔ nyɔnusi ɖe ɖo okposiye le xwedo etɔn mɛ, e ɖo na kpe ŋukunsin do ye wu, ye ko mɔ do nyi agban le okɔ ji na agun la nɔ o. Agun la ba do kpewu gɔ alɔ na okposi xeye ni le ohyan mɛ ye.
Pɔlu lɔ oxo do lena ye na ɖo bubu na agunmɛhyɔnye ɖo wu
17 Agunmɛhyɔn xeye ni kplɔ agun nɔ nywɛɖe ye, e jɛ tun ye a nɔ ɖo bubu na ye, a bo nɔ tu axɔ na ye, le ota ji ye ɛmɛ xeye ni nɔ jɛ agbagba bo nɔ do to Mawu we oxo nɔ, bo mɔ nɔ kplan onu ɛmɛ nɔ ye. 18 Ɖo, Winwlan Kinkwɛn la lɔ tun mɔ: «Oglelɛtɔ ni ká bla onu na nyibu xeni kpedo e wu do ɖe ɛjinukun laye ɖo ovo na getin laye nɔ oc». Winwlan Kinkwɛn la bo mɔ lɔ tun mɔ: «Odanwatɔ ɖo na yi odan xeni wa we axɔtud». 19 Ká yi ogbe na ɛhwɛdido we oxo ɖe do kpan ŋukɔn agunmɛhyɔn ɖe, na ɛmɛ owe alo atɔn ɔn lɔ tun oxojɔxo bɛ. 20 Ɛmɛ xeye ni nɔ wa onu nyanyla nɔ ye, nɔ gbɛ onu na ye le ɛmɛ zɛtɛye we ŋumɛ, na ɛmɛ gbokpweye a do vɔ.
21 Ko lo byɔ sɔn siwe nɔ vivɛɖe, le Mawu kpo Klisu Yesu, kpodo ɛwɛndotɔ cincan Mawutɔnye we ŋukɔn nɔ tun mɔ, myɔ boo zɔn do osɛn xe laye ji, ká nɔ nɔ ɛmɛ ɖe ji, a bo ká nɔ kpɔn ŋumɛ na ɛmɛ ɖe keŋu gbɔxwe a wa onu. 22 Ká hwlɛndo a do ɖo alɔ ota na ɛmɛ ɖe, a bo do sɔ agun we odan ɖe sɔ do alɔ mɛ ni-i o. Ká ɖo alɔ le onu nyanyla ɛmɛ ɖe tɔn mɛ, hɛn ɖiwe do mimɛ ji.
23 Ká mɔ nu ɛsin ɖoɖyo nɔ o, vɔ nɔ nu vɛn viɖe-viɖe, do dɔmɛ we adɔn tɔwe wu, ɖo o nɔ yawu jɛ adɔn.