¹ Mendadi benaˈ mipapas na su Gendaw Pelali, benaˈ daliˈ endaw na gendaw Duminggu, si Maria Magdalena mukaˈ su sala Maria, linaawan nilan puliˈ su sangyab libengan dini Isus. ² Mendadi, benaˈ minateng ilan dia, mitekaw meglinug metikteg, puˈ duuni sesuguˈen nu Kaunutan Megbebayaˈ luminusad genat tu gekbus langit. Benaˈ mituaˈ dia su getaw langit, mikpesempel dayun tu gembagel batu tinakep tu sangyab, linuliden dayun dia gupid nug bisuangan nu sangyab, migingkud dayun dig batu kia. ³ Naa su muluˈ ni getaw langit kini, metinggas, maaˈ nug delag nu gilat, dayun su penepetenen pa pagid, mekesulaw sabaˈ nu keputiˈen. ⁴ Mendadi su nga getaw pelum piˈingat diag libengan dini Isus, mipatiˈ ilan saabay, midataˈ ilan dayun, sabaˈ mipendeenan ilan.

⁵ Laak kaliˈ pektaluˈ ki getaw langit kia tu ngag libun, “Naa, ndiˈ amu mendek. Puˈ misuunan ku, iini penengaun niu sia dini si Isus, kig linansang di kurus kitu. ⁶ Naa, ndaˈ nain dini. Mitubuˈ na puliˈ, maaˈ da nu gandang tinaluˈen. Puˈ seled amu dini, bentayay pa daan niu, kinuˈ da sia sug bililidanen. ⁷ Naa, pemagas amu, laaway niu ganam su nga sakupen, ukitay niu dayun ilan, maˈniniˈi taluˈ niu. ‘Si Isus, mitubuˈ na puliˈ. Mukaˈ pa padun miguna na diniu ditu Galilea. Mpegitaˈ da niu ditu!’ Naa, daal daitui pimuun dinaan petenday diniu.”

⁸ Maˈantu, migdedaliˈ megawaˈ dia sangyab su ngag libun. Pia mindek ilan, mipatiˈ ilan pagid penleliagay. Gumibek ilan dayun, puˈ laawan nilan su nga sakup ni Isus, adun ukitan nilan dun.

⁹ Mendadi benaˈ dia pa dalan kig duaˈ tawan libun kia, duuni mitekaw sumungkak dinilan dia gunaan nilan, masiˈ si Isus. Kaliˈ pektaluˈ, “Gempia dai ginaa niu.” Naa, apelai. Ki ngag libun kini, mikpesempel ilan dini Isus, minginlulud ilan dayun dia gedapanen, piguidan nilani geksuden. ¹⁰ Laung ni Isus, “Naa, ndiˈ amu mendek. Segaga laaway niu dayun su nga mimated dinaan kiin, iini taluˈ niu dinilan, mundas ilan ditu Galilea, puˈ sungkaken ku pailan ditu.”

¹¹ Saˈ maˈantu, benaˈ mipalus dia sangyabi ngag libun kia, su nga getaw kiin piˈingat tug lebeng, mimeguliˈ ilan ditu Jerusalem, inukit nilan dayun tu nga kaunutan nug belian su kelaun mipenggulaula kia. ¹² Naa saˈ maˈantu, mikpungun su nga kaunutan nug belian dakus su ngag duma kaunutan nu getaw Judea, miksabutsabut ilan. Tinindanan nilan dayun su nga migingat dig libengan dini Isus kia, melaun kwarta bigay nilan dinilan, ¹³ puˈ adun megbalus ilan tu melaun getaw. Kaliˈ pektaluˈi nga kaunutan kini, “Naa, maˈniniˈi taluˈ niu ditu melaun getaw. Taluˈ niu dinilan, benaˈ miglegebii, miktulug amu. Benaˈ miktulug amu, naa su nga sakup ni Isus, mituaˈ ilan ditu, dayun nilan pegdaaway, laung niu, kig bangkay ni Isus. ¹⁴ Laak dagid kalukalu mekeseled di telinga nu Gubirnadur puˈ miktulug amu daw, naa yami laaki metau mengamuˈ diniin, adun ndiˈ amu mekendutaˈ dun.”

¹⁵ Naa saˈ maˈantu, dinawat dayun nu nga migingat kia su kwarta, minangay ilan tuˈu megukit dig balus, maaˈ dadema nu pimuun dinilan kia. Kaas maˈniai petuuden nu nga getaw Judea dakus peksigwagen nilan pa gusay, sampay nemun.

¹⁶ Maˈantu, su nga sepuluˈ buˈ sala tawan sakup ni Isus, minundas ilan dayun tu salabuuk bentud ditu Galilea, ki gandang tinduˈ ni Isus dinilan. ¹⁷ Benaˈ minateng ilan diag bentud, mipekitaˈ nilan tuˈu si Isus, minginluˈud ilan dayun diniin. Laak sug duma, migduaˈduaˈig delendeman nilan diniin. ¹⁸ Mendadi, mikpesempel dayun dia nga sakupen si Isus, kaliˈ pektaluˈ dinilan, “Ndaˈiduni mesamaˈ pegbayaˈ di gekleb langit buˈ lupaˈ, migelaˈ na gupia pegwakil dinaan. ¹⁹ Mendadi kagina maˈantu, panaw amu, leep niu su kelaun bansa nu nga getaw, pesakup niu ilan dinaan. Bunagay niu ilan tubig, sembayay niu su Gamaˈ mukaˈ sug Bataˈen sampay sug Balakat nu Megbebayaˈ. ²⁰ Petuˈunay niu su kelaun bansa nu getaw, puˈ adun petuuden nilan su taman nu pinalintau diniu.” Diksuˈ ni Isus su taluˈen, “Mukaˈ ndiˈ niu selingaway ini. Naani dumuma gusay diniu, sampay ditu kelengkeb nug benwa.”