¹ Naa su sepuluˈ buˈ duaˈ tawan kiin mitenduˈ ni Isus peneliganen, sinabinen ilan. Mendadi, benaˈ mipungun ilan, bigayan ilan ni Isus ginuung mukaˈ pegbayaˈ mengutid tu kelaun menenulay mukaˈ meneguliˈ tu ngag leduun. ² Sinuguˈ ilan dayun ni Isus mpanaw, adun megukit ilan mekatag di Keglekaunutan nu Megbebayaˈ mukaˈ meneguliˈ tu nga pegladu. ³ Puli pailan mpanaw, piktituluˈanen ilan, laungen, “Saˈ mpanaw amu, ndaˈiduni sengkapan uiten niu, pia sekud, gambag, balun niu pan, atawaka selapiˈ, mukaˈ salabuuk laaki suub niu. ⁴ Adin sug bekna balay mekpepenaik diniu, ditu laak amu tuun, sampay mekebundas amu dig lain lunsud. ⁵ Adin sug lunsud ndiˈ menembaˈ diniu, pegawaˈ amu dayun dia, mukaˈ ekpug niu sug lepup lupaˈ di geksud niu, adun metakesiˈanig lunsud kia.”

⁶ Mendadi maˈnia, mipanaw tuˈu su nga sepuluˈ buˈ duaˈ peneligan ni Isus, lineep nilan dayun su ngag lunsud, migukit ilan tuˈu di Gempia Petenday mukaˈ pineguliˈan nilan su nga pegladu tu kelaun benwa gingayan nilan.

⁷ Naa su kaunutan dia Galilea si Herodes, benaˈ midengegen sug lumaun pinggulaula ni Isus, mikalangalangig delendemanen. Puˈ sug duma getaw, pekteluˈen nilan puˈ kiin si Isus, iin si Juan su Memunag Tubig, masiˈ mitubuˈ puliˈ. ⁸ Dagid sug duma mektaluˈ, laung nilan puˈ kiin si Isus, iin si Elias dengantu, mituaˈ puliˈ daw. Mukaˈ duun pa pagidi mektaluˈ, laung nilan puˈ si Isus kiin, iini sala tawan pelum pimuunan dengantu, mitubuˈ puliˈ daw. ⁹ Kaas mitaluˈ ni Herodes, “Uy, si Juan, piputukan ku ma gulu. Naa saˈ maˈantu, kini midengegu, adin dun saan getaw iin?” Saˈ maˈnia, mauyaˈan gupia ni Herodes mpekitaˈen sia si Isus.

¹⁰ Naa ki nga peneligan ni Isus, su nga sinuguˈen mangay megukit, mipuliˈ nailan ditu ni Isus. Benaˈ minateng ilan, inukit nilan dayun diniin su kelaunan pinggulaula nilan. Saˈ mitubus, inggat ilan ni Isus mekpain ilan sia deliˈ ditu sala lunsud piningalan dun Betsaida. ¹¹ Laak su nga melaun getaw, misuunan nilani kepanaw kia ni nga Isus. Saˈ maˈantu, miglendug ilan. Laak didialan ilan ni Isus, inukitanen ilan dayun mekatag di Keglekaunutan nu Megbebayaˈ, sampay pineguliˈanen su nga pegladu dinilan.

¹² Mendadi, benaˈ sungu na mesindepi gendaw, mikpesempel dini Isus su sepuluˈ buˈ duaˈ tawan peneliganen, kaliˈ ilan pektaluˈ diniin, “Sir, su nga melaun getaw, melengas suguˈen mu mangay ilan tu ngag lunsud mukaˈ tu mektabuˈ benwa, puˈ adun mekesukat ilan lebungan nilan dakus mekenengaw ilan pektulugan nilan. Puˈ kig benwa kini, meliaw ma.”

¹³ Sumimbag si Isus, “Yamu mai pekpaan dinilan.”

“Apelai, Sir!” simbag nu nga sakupen. “Duun laakig lima buuk pan nami, dayun duunig duaˈ buuk sedaˈ. Naa mabuˈ ndiˈ dadema mesuˈat suguˈen mu ami mangay sumaluy gaan, ki sukal dini nga melaun gupia getaw kini?” ¹⁴ (Puˈ su getaw dia, lima ngibu tawan su laak lumbus laki.)

Mendadi, kaliˈ pektaluˈ si Isus di nga sakupen, “Naa pekpinigpinigen niu ilan pemaingkuday, duun saani piglima puluˈ tawan sala penunan dun.”

¹⁵ Piningkud nilan tuˈu sug launan getaw. ¹⁶ Mendadi, inimud ni Isus kig lima buuk pan kia mukaˈ sug duaˈ buuk sedaˈ, dayun megangag tug langit mukaˈ mekpaladpalad tu Megbebayaˈ. Pikpetapetanen dayun su pan mukaˈ sedaˈ, piktukiden pegilasay tu nga sakupen, adun pengilaken nilan tu nga getaw. ¹⁷ Minaan dayun su kelaun getaw, mukaˈ migelaˈ ilan mbesug. Benaˈ mibesug nailan, kaliˈ pengikpesay nu nga sakup ni Isus su sawad nilan, sepuluˈ buˈ duaˈ dig belanan mipenuˈen.

¹⁸ Naa, duuni gendaw sumiway si Isus tu melaun getaw adun menenabi, dumanen laak su nga sakupen. Benaˈ misuay ilan, sinaak ni Isus tu nga sakupen, “Mendadi naan kini, saˈ su gasalu, alanduni ketaluˈ dun nu getaw?”

¹⁹ Kaliˈ sembag su nga sakupen, “Yaˈa daw si Juan su Memunag Tubig. Saˈ sug duma mektaluˈ, yaˈa daw si Elias dengantu. Mukaˈ duun pa pagidi mektaluˈ, yaˈa dawi sala tawan pa pelum pimuunan nu Megbebayaˈ dengantu, mitubuˈ daw puliˈ.”

²⁰ “Mendadi yamu dema,” sinaak ni Isus, “taˈ mai ketaluˈ niu dun, ki gasalu?”

Sumimbag si Pedro, “Yaˈa na gupia su Tinduˈ nu Megbebayaˈ Meglekaunutan.”

²¹ Laak dagid benaˈ midengeg ni Isus su tinaluˈ kia ni Pedro, inunguben su nga sakupen, ndiˈ nilan pesuun tu getaw ki gasalen kia. ²² Kaliˈ pagid pektaluˈ dinilan, “Naan, kig Bataˈ nu Kilawan, melaun pai kekpeleget dinaan. Mukaˈ pemilasenu pa pagid nu nga kaunutan nu getaw Judea mukaˈ su nga kaunutan nug belian kampuˈ nu mekpetuˈun di Misulat Palinta nu Megbebayaˈ. Deksuˈanen, petainu nilan. Laak dagid di ketelu endawen genat di kepatayu, petubuˈenu puliˈ.”

²³ Kaliˈ dayun pektaluˈ si Isus tu melaun getaw, “Mendadi, saˈ duuni getaw mauyaˈanen sumakup dinaan, iin, subay teliudanen sug daniin delendeman, pisanenen dayun gendawgendaw ki kurusen, dakus dumunut dinaan.^{a 24} Puˈ adini mpauk megwakil gumulen dinaan, mbeleng diniin su ketubuˈ ndaˈi tamanen. Adin su pegwakilen dinaan su gumulen sabaˈ nu kesakupen dinaan, iin, malapen sungkin su ketubuˈ ndaˈi tamanen. ²⁵ Puˈ pia pa malap nu getaw su tibuuk lumbang, dayun mbeleng diniin su ketubuˈ ndaˈi tamanen, naa alandun bai gatagen? Ndaˈidun! ²⁶ Adini getaw mpiid mangken di kesakupen dinaan mukaˈ di taluˈu, naa naan, kig Bataˈ nu Kilawan, mpiid dau dema mangken diniin sakupu saˈ lumusadu puliˈ dini. Mukaˈ saˈ lumusadu puliˈ, maitaˈ na di tiagu su kelengas nu pegbayaˈu, iin dademai kelengas nu pegbayaˈ nu Gamaˈu Megbebayaˈ mukaˈ danu nga pinaas sesuguˈenen getaw langit.” ²⁷ Diksuˈ ni Isus su taluˈen, “Taman taluˈu diniu, yamu nga getaw pegindeg dini nandaw, duun diniui ndiˈ matengi gumulen, meduaˈ matanen ki Keglekaunutan na tuˈu nu Megbebayaˈ.”

²⁸ Naa duun saani sala simana, tumiwad si Isus dig bentud adun menenabi dia. Pidunuten si nga Pedro, si Juan, mukaˈ si Santiago. ²⁹ Mendadi, selian ni Isus menenabi, masiˈ mitekaw mpalini palasen. Sampay su nga penepetenen, metilak gupia sabaˈ keputiˈen. ³⁰ Mukaˈ padun tekaw duunig duaˈ tawan dumanen pegabitabit, masiˈ si Moises mukaˈ si Elias, ³¹ tumiag dademai palas nilan. Pegyegaan nilan sug delendeman nu Megbebayaˈ sungu penuuday ni Isus saˈ mateng ditu Jerusalem, saˈitada ki kepatayen. ³² Laak si nga Pedro kia, tinulug pailan gupia. Dagid mitanud ilan, kaas minitaˈ nilan dayun tumiagi palas ni Isus. Minitaˈ nilan dadema sug duaˈ tawan pegindeg di gupiden. ³³ Saanan lumilung nug duaˈ tawan duma ni Isus, kaliˈ pektaluˈ si Pedro, “Aa Sir, melengas puˈ dini dami! Naa, megbaal ami bebelayan telu buuk, salabuuk daniˈa, salabuuk dani Moises, mukaˈ salabuuk dema dani Elias.” (Laak ndaˈ ni Pedro mesuunayi gempia sia teluˈenen.)

³⁴ Naa selian ni Pedro mektaluˈ, duuni gabun mituaˈ mikeleklem dinilan. Kaliˈ peleklemay dun si nga Pedro, mipatiˈ ilan mendek. ³⁵ Duuni miktaluˈ dig dialem gabun, laungen, “Kini na tuˈu sug Bataˈu, ki pimiliˈu. Pekineegay niu iin!”

³⁶ Dekag mideksuˈ mektaluˈ, minitaˈ nilan, sala da dun ni Isus dia. Genat itu, pigunguban pa nilan ki minitaˈ nilan kia, miniben pa dekag nilan pegukit di nga getaw.

³⁷ Naa benaˈ miksala gendaw, duminiksun si nga Isus. Kaliˈ ilan diksun, melaun gupia getaw suminungkak dini Isus. ³⁸ Mendadi, kaliˈ pektawagi sala tawan, laungen, “Sir, kig bataˈu kini, penengiin ku diniˈa, bentayay mu, puˈ buntung bataˈu! ³⁹ Iin, peglegetan menulay. Saˈ matengi kegleget dun, metekaw megbeksay, dayun bebuyen, megbulaˈig babaˈen. Ndiˈ sia megawaˈ diniin ki menulay. Dekag pa megawaˈ diniin, metegelan dun gupiaig bataˈu kini! ⁴⁰ Naa, inubugu di nga sakup mu kini, utidan nilan sia ki menulay, laak ndaˈ nilan megaga.”

⁴¹ Kaliˈ pektaluˈ si Isus tu nga getaw dia, “Ay, yamu pa di nga getaw nemun, ndaˈi salig niu, mipenulay amu! Pinlukas nau dumuma diniu. Santaˈ pai kaibenen, ki ketigelu diniu?” Laung ni Isus tu gamaˈ nu gembataˈ kia, “Uit mu dini kig bataˈ mu kiin!”

⁴² Puli pa midepet dia ni Isus su gembataˈ, pibuksak nu menulay kia, binabuy dayun. Mendadi pimaag dayun ni Isus ki menulay kia, piuliˈanen tuˈu su gembataˈ, pigwakilen dayun puliˈ tu gamaˈen. ⁴³ Su kelaun getaw migbantay, misebuˈan ilan patiˈ di metaas ginuung kia nu Megbebayaˈ.

Mendadi, selian misebuˈan su melaun getaw tu taman pinggulaulanen, kaliˈ pektaluˈ si Isus tu nga sakupen, ⁴⁴ “Mendadi yamu, talentenay niu gupia kini taluˈu diniu. Naan kini, kig Bataˈ nu Kilawan, duuni gendaw mateng, pegwakilu tu pegbayaˈ nu getaw.” ⁴⁵ Dagid ki tinaluˈ kia ni Isus, ndaˈ metekad nu nga sakupen. Puˈ ndaˈ pa mbuasay sug delendeman nilan, kaas ndiˈ pa nilan mesabut, mukaˈ mekalangalang ilan dema sumaak dun diniin.

⁴⁶ Naa mendadi su nga peneligan ni Isus, miksual ilan, saˈ taway dun dinilani tampusan metaasi tindegen. ⁴⁷ Laak misuunan ni Isus kig delendeman nilan kia. Dayun suminabi si Isus sala tawan gembataˈ, piˈindegen dia gupiden, ⁴⁸ kaliˈ pektaluˈ, “Adin su menembaˈ di gembataˈ kini sabaˈ nu kesakupen dinaan, naa gitunganen, naani mipenembaˈen. Pidag pa tanan, kagina pinembaˈu niin, mipenembaˈen dadema su suminuguˈ dinaan. Puˈ adin diniui mekpebabaˈ gupia dig lawasen, iini tampusan metaasi tindegen.”

⁴⁹ Laak dagid si Juan, kaliˈ pektaluˈ dini Isus, “Sir, duuni minitaˈ nami getaw megutid di menenulay, sembayanen su ngalan mu. Laak pimaag nami, puˈ kanaˈ tain samasakup di pikumpungan ta.”

⁵⁰ Laak kaliˈ sembag si Isus, “Naa, ndiˈ niu pemaagay. Puˈ adini getaw kanaˈ kuntra niu, iini sugut niu.”

⁵¹ Naa mendadi, saˈ sungu na mateng su kepuliˈ ni Isus ditu gekbus langit, pia maˈantu, pinanteken di ginaanen megdayun da gusay tu Jerusalem. Saˈ maˈantu, sumikat ilan dayun, ⁵² duuni piuna ni Isus nga sakupen mangay tu salabuuk lunsud tu Samaria, adun pengendamen nilan sia su kengintuluganen dia. ⁵³ Dagid su nga getaw Samaria kia, benaˈ misuunan nilan kig delendeman ni Isus pegangay ditu Jerusalem, benwa nu getaw Judea, naa ndaˈ nilan dayun penembaˈay si nga Isus diag lunsud nilan. ⁵⁴ Saˈ maˈantu, laung nu sakupen, si Santiago mukaˈ si Juan, “Naa, uu Kaunutan, liagan mu ba mekpelabuˈ ami dinilan dupiˈ gapuy genat tug langit, adun mesapul ilan?”

⁵⁵ Laak liningay ni Isus su nga sakupen kia, pimaagen ilan dayun. ⁵⁶ Minundas dayun tug lain lunsud si nga Isus.

⁵⁷ Naa mendadi, selian ni nga Isus mundas, duuni getaw pektaluˈ diniin, “Sir, pia adin ka angay, megdunutu diniˈa.”

⁵⁸ Kaliˈ sembag si Isus, “Laak naan, kig Bataˈ nu Kilawan, ndaˈidun tanani pektulugan ku. Tumuˈ pa su nga teleksuy, duuni gateb nilan, mukaˈ su nga manukmanuk, duuni salag nilan.”

⁵⁹ Naa duun pelumig lain getaw, miktaluˈ si Isus diniin, “Sakupa dinaan.”

Kaliˈ sembag, “Laak Sir, muliˈ pau deliˈ, puˈ unaan ku pa lebengay su gamaˈu.”

⁶⁰ Kaliˈ pelum sembag si Isus, “Baa, su nga pangay tu kepatay ndaˈi tamanen, melengas ilan nai meglebeng tu nga matay dinilan. Yaˈa pelum, angaya na megukit mekatag di Keglekaunutan nu Megbebayaˈ.”

⁶¹ Duun pa pelumi sala tawan, kaliˈ pektaluˈ dini Isus, “Sir, sumakupu diniˈa. Laak saˈ mesuˈat, buang mu dinaan, megudas pau deliˈ tu nga gapen ku.”

⁶² Kaliˈ pelum sembag si Isus diniin, “Paa, adin su getaw mekpuun megdaru, dayun peglingay peglingay tu teliudanen, kiin, kanaˈ mbantang megabang tu Keglekaunutan nu Megbebayaˈ.”