11
Su Tituluˈan ni Isus mekatag di Kenenabi
1 Mendadi duuni gendaw, menenabi si Isus. Benaˈ mitubus, kaliˈ pektaluˈi sala tawan sakupen, “Sir, saˈ mesuˈat, pektuˈunay mu ami menenabi, maˈniin ni Juan kiin, piktuˈunanen dadema su nga sakupen.”
2 Kaliˈ pektaluˈ si Isus, “Naa saˈ menenabi amu, kiniig bian nu kenenabi niu. Iini taluˈ niu,
‘Uu Amaˈ nami,
melengas pegbesaan ka nu nga getaw puˈ yaˈa su Megbebayaˈ.
Melengas pekpuunan na su Keglekaunutan mu.
3 Begayay mu ami gendawgendaw di nga gaan nami, sukal di ketubuˈ nami.
4 Pedasun mu ami di nga salaˈ nami,
puˈ yami, mekpedasun ami dadema tu taman mekesalaˈ dinami,
mukaˈ ndiˈ mu buangay mpenulay ami.’”
Subay Penenebiin tu Megbebayaˈ su Kulang nu Sakupen
5 Mendadi, miksambingay si Isus, laungen, “Naa pinenggiˈ sala tawan diniu, mangay tug balay nu sambaten meginengaˈi gebii, teluˈenen dayun, ‘Uu Sambat, saˈ mesuˈat, pautang mau telu buuk pan. 6 Puˈ duuni sala sambatu minateng ditu naan, melayuˈi pigenatanen! Naa ndaˈidun pelumi ilaku dun!’ 7 Dayun sumbag su sambaten dia seled, ‘Aa, ndiˈ mu semukayi tulugu! Siniraan naig balayu. Migbelilid nai nga gembataˈu, sampay naan. Kaas ndiˈu mesuˈat megbuat megbegay diniˈa.’” 8 Maaˈ laung pa ni Isus, “Naa, taˈ ma dayuni mpenggulaula? Taluˈu tuˈu diniu, ki sambaten kia, pia mpauk megbuat megbegay diniin puun tu kesambat nilan, laak metegelan da gusay megbuat dakus megbegay tu kelaun kulang diniin, saˈ su menengi, ndiˈ lumukas menengi diniin. 9 Kaas pesamau dademai teluˈen ku diniu. Penamal amu menenabi tu Megbebayaˈ, begayan amu niin. Penamal amu menengaw, puˈ mekebaang amu. Peksabi amu namal diag bisuangan, puˈ pukaˈan amu tuˈu. 10 Puˈ adini menamal menenabi, begayan tuˈu. Adini menamal menengaw, mekebaang, mukaˈ adini meksabi diag bisuangan, mpukaˈan. 11 Puˈ yamu ngag duunig bataˈen, duun bai sala tawan diniu, saˈ pinenggiˈ menengi sedaˈig bataˈen, begayen sungkin diniin mamak? 12 Atawaka saˈ meksaak gumanuk, begayen pelum diniin gulangulang? 13 Mendadi yamu, saˈ metau amu megbegay kepianan tu gembataˈ niu, asa melaat getaw laak amu, naa labi na su Gamaˈ niu ditu gekbus langit, pepengapuˈen dema tuˈu kig Balakat nu Megbebayaˈ tu nga meksaak dun diniin!”
Ilegan si Isus Pingepuˈan nu Palin
14 Naa duuni getaw beed, sabaˈ silunuˈan menulay. Inutidan ni Isus su migleget dun. Benaˈ miutidanen su menulay, mikektaluˈ puliˈ sug beed. Misebuˈan dayun su nga getaw dia. 15 Laak laung nug duma getaw, “Aa, ki getaw kiin, iini megaganen dun utidayi menenulay, puˈ bigayan ginuung ni Beelsebul, su kaunutan nilan.”a
16 Naa sug duma getaw pelum, pengimanan nilan sia si Isus, kaas miksaak ilan diniin mekesalebuˈ tuˈus, adun gempantek daw puˈ genat tu Megbebayaˈ su pegbayaˈen. 17 Laak misuunan ni Isus sug delendeman nilan. Kaliˈ pektaluˈ dinilan, “Adin su nasud meksimawiˈ mukaˈ megunay megbunuˈ, ndiˈ maiben metulag. Samanen ki salapenan, saˈ meksimawiˈ mukaˈ meksual, metulag dadema. 18 Naa, maˈantu dadema si Satanas. Saˈ pinenggiˈ meksimawiˈ su peglegediˈanen dayun megunay megbunuˈ, ndiˈ ba metulag, deksuˈanen mbeleng? Asa teluˈen niu pengutidan ku su menenulay puun nu pegbayaˈ ni Beelsebul. 19 Keduaˈen, saˈ sia metuud puˈ genat dini Beelsebuli pegbayaˈu mengutid dun, naa su nga sakup niu pelum, adin ba genat su pegbayaˈ nilan? Puˈ ilan, utidan da nilan demai menenulay. Baa, mitakesil amu nu pinggulaula nu nga sakup niu! 20 Laak dagid saˈ iin pasiˈi migbegay dinaan pegbayaˈ mengutid dun su Megbebayaˈ, naa maˈananen, mituaˈ na diniu su Keglekaunutan nu Megbebayaˈ.”
21 Laung pa pagid ni Isus, “Kig letaban getaw, saˈ meksangkap na besi dayun iin da gupiai megingat tug balayen, naa ndiˈ sia magaw su pimetangen. 22 Laak pia maˈantu, saˈ duuni mateng lumabaw pa dun diniin, iin pelumi dumaag. Egaunen dayun su kelaun besi seligan nu gapuˈ balay, dakus su kelaun gimunen, pekilasenen dayun tu ngag dumanen.”b
23 Miktaluˈ padun si Isus, laungen, “Adini getaw kanaˈu sugut, iini kuntrau. Adini ndiˈ megabang dinaan mekpungun sakupu, iini mekpelak dun.”
Melemu Mpuliˈ su Melaaten
24 Kaliˈ pektaluˈ si Isus, “Mendadi su menulay, saˈ utidan di getaw, leepenen dayunig benwa ndaˈi tubig dun menengaw pelelianen. Naa benaˈ ndaˈiduni mbaanganen, maaˈ laungen dig dialem delendemanen, ‘Tumuˈ muliˈ nau ditug balay kia pigenatan ku.’ 25 Naa benaˈ mateng puliˈ tug balay kia, aba, metaanganen siniligan na sug balay dakus pingikpesan. 26 Saˈ maˈantu, mangay dayun dumanen menenulay pitu buuk, melaat pa dun diniin, dayun megelaˈ ilan muliˈ dia. Kaas deksuˈanen, su kebetang nu getaw kia piglegetan salabuuk da sia menulay, melaat pa tug bekna mipenggulaulanen.”
Su Tantu Kepianan
27 Naa selian ni Isus mektaluˈ, duunig libun dia tebenan getaw minekeg mektaluˈ dini Isus, laungen, “Sug libun minataˈ diniˈa mukaˈ mikpeduduˈ diniˈa, liliag tantu!”
28 Kaliˈ pektaluˈ si Isus, “Tumuˈ su getaw mekedengeg di taluˈ nu Megbebayaˈ dakus mekpetuud dun, iin tantu gupiai liliag!”
Su Getaw Mimilas, Menengi Mekesalebuˈ Tuˈus
29 Mendadi benaˈ pekpungunpungun su nga getaw mekpesempel dini Isus, kaliˈ pektaluˈ si Isus, “Paa, yamu pa di nga getaw nemun, medupang amu gupia! Penengiin niu dinaani mekesalebuˈ tuˈus, asa daal da laaki tuˈus begay diniu, ki maaˈ nu mipenggulaula nu pimuunan nu Megbebayaˈ dengantu si Jonas. 30 Puˈ si Jonas, mibaal tuˈus tu getaw Ninibe. Naa naan kini kig Bataˈ nu Kilawan, maˈantu dadema, mbaalu tuˈus diniu nga getaw nemun. 31 Dayun sug Bai tug benwa Seba dengantu, mbantang megindeg tumakesil diniu saˈ mateng su Gendaw nu Kengukum nu Megbebayaˈ di tibaˈan getaw. Puˈ daniin, miktegel mpanaw dinig benwa ta Israel, melayuˈ gupia dig benwanen, puˈ adun mekineeg ditu telisebuten tituluˈan ni Adiˈ Salomon. Naa yamu kiin, duun kinii mituaˈ diniu, metaas pa dini Salomon. 32 Mukaˈ saˈ mateng na tuˈu su Kengukum, naa su nga getaw pa pagid dengantu sakup Ninibe kitu, mbantang dailan dema megindeg tumakesil diniu nga getaw nemun. Puˈ maˈantu dadema ilan, saˈ tinituluˈan ilan ni Jonas, miksikesuun ilan. Mendadi yamu, taman taluˈu diniu, duun kinii mituaˈ diniu, metaas pa dini Jonas!”
Subay Pektalentenan nu Getaw su Tiag
33 Mendadi kaliˈ pektaluˈ si Isus, “Ki suluˈ, ndiˈ tutudan dayun egluden nu getaw, mesama ndiˈen ukluban bandi. Segaga betangen dig dempaˈan, adun medelaganen su nga getaw suled tug balay. 34 Naa su mata niu, iini suluˈ nug lawas niu. Kaas saladuaˈ diniu saˈ pinenggiˈ gempiai mata mu, naa medelagan na su tibuuk lawas mu.c Laak dagid saˈ duuni mesait di mata mu, naa medeleman dademai tibuuk lawas mu. 35 Kaas peglengilama, tekaw mbuus sug laung mu dun tiag mu, masiˈ medelem. 36 Laak saˈ meleep dig lawas mu ki medelag, ndaˈiduni medelem dun, naa maˈantu, lumbus medelag, maˈniin mitiagan ka suluˈ.”
Pigbeluˈan ni Isus su nga Tautau Mekesuun
37 Naa benaˈ mideksuˈ megukit si Isus, duuni Pariseo migenggat diniin maan tug balayen. Saˈ maˈnia, minangay dema dia si Isus, migingkud dayun maan. 38 Laak saˈ minaan si Isus, misebuˈan su Pariseo, kaliˈen maitaˈ puˈ ndaˈ ni Isus pegelaˈ dunutay sug bian mengingenaw tinituluˈ nu nga Pariseo tu nga getaw. 39 Dagid kaliˈ pektaluˈ su Kaunutan, “Paa, yamu pa di nga Pariseo, ugasan niu sug dibabaw nu pinggan niu mukaˈ tasa niu, laak dagid dig dialem, mipenuˈ amu nu pingagaw niu puun di melaat betad niu.d 40 Benguˈbenguˈen amu! Su Megbebayaˈ miwat tug lawas nu getaw, kanaˈ bain da gusayi miwat tug delendemanen? 41 Segaga peglegamut amu tu pubri, adun melimpiu amu tantu, saˈitada mekesuun amu.”
42 Laung pa ni Isus, “Yamu pa di nga Pariseo, mekelelaatlelaat amu! Puˈ pia su mekaikaˈ pimula niu sampay su gininisan pegdaut, naa begay niu tu Megbebayaˈ su kesepuluˈ ilasen. Dagid ki melegdeng betad mukaˈ ki kepetail niu sia tu Megbebayaˈ, baa, ndaˈ dig delendeman niu. Asa kiin siaig bantang pegbetaden niu, sampay su ngag duma pinalinta pa pagid.
43 “Yamu nga Pariseo, mekelelaatlelaat amu daan! Puˈ saˈ ditu simbaan ta, liagan niu su tampusan metaas gingkudan. Saˈ ditu amu pelum tebuˈan, mauyaˈan niu pegbesaan amu nu nga getaw. 44 Mekelelaatlelaat amu dema tuˈu! Puˈ pitanggiˈu amu di ngag lebeng ndaˈi tuˈus dun, maindegan laak nu getaw, puˈ ndaˈ nilan suunay puˈ masiˈ lebeng itu, kanaˈ mpia.”
45 Naa mendadi, duuni mekpetuˈun di Misulat Palinta nu Megbebayaˈ, kaliˈ sumpat, “Naa Sir, saˈ maˈniai teluˈen mu, pepiidpiidan mu dami dema!”
46 Kaliˈ sembag si Isus, “Waˈa lai! Yamu nu nga mekpetuˈun di Palinta, mekelelaatlelaat amu dadema! Pipisan niu gembegat tituluˈan tu nga samataw niu, asa yamu, ndiˈ niu tanan etateni salabuuk tu nga tenduˈ niu meguit tu guiten nilan kia. 47 Mekelelaatlelaat amu daan! Puˈ su ginepuˈay niu, binunuˈ nilan su nga pimuunan nu Megbebayaˈ dengantu. Yamu dadema, migbaal amu melengas lebeng tu nga pimuunan kitu. 48 Naa saˈ maˈantu, mitakesiˈan niu su kesanguˈ niu tu melaat gulaula kia nu nga ginepuˈay niu. Puˈ su ginepuˈay niui mimunuˈ dun, dayun yamui migbaal melengas lebeng nilan. 49 Kaas maˈniniˈi tinaluˈ nu Megbebayaˈ, genat di ketelisebutayen, ‘Suguˈen ku dinilani nga pemuunan ku mukaˈ peneligan ku. Dagid sug duma, peglegetan pa nilan. Sug duma pelum, petain nilan.’”
50 Kaliˈ padun pektaluˈ si Isus, “Naa kagina maˈantu, yamu pa di getaw nemun, melabuˈ tuˈu diniu su ginukuman tu kekpatay ditu kelaun pimuunan nu Megbebayaˈ, genat pa kebuat di gekleb langit buˈ lupaˈ 51 sampay tu kekpatay dini Abel dakus su kebunuˈ dini Zacarias, su pinatay kia ditug Balay Pengedapan tu Megbebayaˈ, dia gelet nu gentudan gilak mukaˈ su Meˈelig Sugud. Taman taluˈu diniu nga getaw nemun kini, melabuˈ tuˈu diniu su ginukuman tu kelaun kemunuˈ kitu!”
52 Laung pa padun ni Isus, “Mekelelaatlelaat amu dema tuˈu, yamu nu nga mekpetuˈun di Misulat Palinta nu Megbebayaˈ! Puˈ inawiˈ niu su gunsiˈ mekepukaˈ tu metuud, mukaˈ inapaˈ niu su nga getaw suled sia, dagid yamu, ndaˈ damu dema seled!”