¹ Naa melaun mendawat buis mukaˈ duma mekesesalaˈ getaw mikpungun dia ni Isus adun mekineeg ilan tu taluˈen. ² Laak su nga Pariseo mukaˈ su nga mekpetuˈun di Misulat Palinta nu Megbebayaˈ, linibak nilan si Isus, laung nilan, “Paa, ki getaw kiin, penembaˈeneni nga mekesesalaˈ getaw, dungan pa padun dinilan maan!” ³ Mendadi, benaˈ misuunan ni Isus sug libakan nilan, migukit dayun dinilan sambingay, laungen,

⁴ “Naa mendadi, pinenggiˈ duuni sala tawan diniu megatusi karnirunen, dayun mbelengi salabuuk dun. Ndiˈen ba bilinen dia pengeksaban su siam puluˈ buˈ siam, adun penengaunen ki salabuuk kia mibeleng? Penengaunen lai, sampay metuunen! ⁵ Dayun saˈ metuunen nai salabuuk kia, pisanenen muliˈ, leliagen gupia. ⁶ Naa saˈ mateng dig balayen, sebiinen dayun su nga sambaten dakus su sumbalayen, laungen dinilan, ‘Megleliag ita, puˈ ki mibeleng karniruu, mituun ku na!’ ⁷ Naa maˈantu dadema, saˈ meksikesuuni sala tawan laak mikesalaˈ getaw, taluˈu diniu, dedialan gupia ditu gekbus langit, gembagel pa dig leliag dun di siam puluˈ buˈ siam tawan mekesuun getaw, su ndiˈ kambat meksikesuun.”^a

⁸ Kaliˈ pektaluˈ si Isus, “Mesamaig libun, pinenggiˈ duuni siinen sepuluˈ laad pelata. Saˈ mbeleng diniin selaad, ndiˈen ba tutudani suluˈen mukaˈ siliganen sug liwagan nug balayen, penengaunen sibaˈ sampay metuunen? ⁹ Dayun saˈ metuunen na, sebiinen su nga sambaten mukaˈ sumbalayen mekpungun diag balayen, teluˈenen dayun dinilan, ‘Megleliag ita, puˈ su siin ku mibeleng, minitaˈu na!’” ¹⁰ Diksuˈ ni Isus su taluˈen, “Maˈantu dadema, saˈ meksikesuuni sala tawan laak mikesalaˈ getaw, taluˈu diniu, gembagel tuˈuig leliag ditu gedapan nu nga sesuguˈen nu Megbebayaˈ getaw langit.”

¹¹ Kaliˈ pagid peksambingay si Isus, laungen, “Mendadi, duuni getaw, duaˈ tawanig bataˈen, lumbus laki. ¹² Naa duuni gendaw ki ngudan dun, miktaluˈ tu gamaˈen, ‘Naa Amaˈ, saˈ mesuˈat diniˈa, begay mu na dinaan nandaw su gilasu tu pusakaˈ petenged dinaan.’ Pikilas dayun nu gamaˈen su pusekaˈenen dig bataˈen kia duaˈ tawan. ¹³ Mendadi, benaˈ santaˈ gebii, ki ngudan, pinungunen su kelaun gimunen, dayunen uitay mpanaw tu melayuˈ benwa. Naa benaˈ minateng ditu ki ngudan kini, sipalaanen laak gelaˈay su gimunen sabaˈen megayep. ¹⁴ Mendadi, benaˈ migelaˈ na gupia su kwartanen, mibianan pelum meliget gutemig benwa kiin, ndaˈidun dayuni ketubuˈan nug begutaw kini. ¹⁵ Saˈ maˈantu, mikpetindan di getaw dangen dia, bitang dayun iin di telunan megingat babuy. ¹⁶ Naa, apelai. Pia su gaan nu ngag babuy kia, mauyaˈanen sia maan dun, sabaˈ peglegunusan na. Laak ndaˈi getaw mekpaan diniin. ¹⁷ Dagid benaˈ minibeniben, kaliˈ pegleketau, laungen dig dialem delendemanen, ‘Su kelaun tinindanan ni Amaˈu, sukali gaan nilan, ndiˈ nilan megelaˈ sabaˈ kelaunen. Naan pelum kini, peglegunusan nau! ¹⁸ Tumuˈ pa megawaˈu dini ganam, muliˈu tu ni Amaˈu. Saˈ matengu ditu, teluˈen ku dayun diniin, “Amaˈ, mikesalaˈu diniˈa, sampay ditu Megbebayaˈ. ¹⁹ Kaas kanaˈ na mbantang gelalen mau bataˈ mu. Saˈ maˈantu, Amaˈ, mekpetindan nau laak diniˈa.”’ ²⁰ Naa saˈ maˈantu, minuliˈ tuˈu ditu gamaˈen ki ngudan kini.

“Naa saˈ melayuˈlayuˈ paig begutaw kini, midayag na nu gamaˈen. Iin, kaliˈen maitaˈ sug bataˈen, milelaat dun gupia. Gibeken sungkakay, dayunen ekepay dakus pingelekanen. ²¹ ‘Naa Amaˈ,’ laung nug begutaw, ‘mikesalaˈu diniˈa dakus tu Megbebayaˈ. Kanaˈ na mbantang gelalen mau bataˈ mu.’ ²² Dagid su gamaˈen, miksabi tu nga sesuguˈenen, laungen dinilan, ‘Pemagas amu, angay niui melengas gupia suub kiin, peseluk niu diniin. Penising niu, pesepetusay niu pa pagid. ²³ Mukaˈ titiˈ niu ki pilembuˈ ta nati baka kiin, adun meglekebibu ita, megleliag ita! ²⁴ Puˈ kig bataˈu kini, lepeng minatay na, dayun mitubuˈ puliˈ. Mibeleng na sia, dayun mibaangan na.’ Mendadi, miglekebibu ilan tuˈu.

²⁵ Laung pa ni Isus, “Mendadi su gulangbataˈen pelum, ditu pa pegimulanan nilan. Benaˈ minuliˈ, kaliˈ mesebang dig balay, midengegen su gigungan mukaˈ sibayan. ²⁶ Sinabinen dayuni sesuguˈen nilan, sinaakanen saˈ taˈ alanduni mipenggulaula kia. ²⁷ Kaliˈ sembag su sesuguˈen, ‘Minateng na su ngudan mu. Tinitiˈ nu gamaˈ niu su melembuˈ nati baka, puˈ mialapen puliˈ daw sug bataˈen, ndaˈ mekaˈiday.’ ²⁸ Naa ki gulangbataˈ kini, benaˈ midengegen, miglebut dun patiˈ, mipauk dayun suled. Gumiwaˈ dayun su gamaˈen, pikamuˈamuˈen sug bataˈen kia adun suled. ²⁹ Laak kaliˈ sembag, ‘Paa, Amaˈ, kitui kaibenen, kanaˈ laak santaˈ taun mingimbaalu diniˈa, ndaˈu mainsan pemilas di suguˈan mu dinaan. Laak pia maˈantu, ndaˈ mau mainsan begayay pia salabuuk nati kanding, adun meglekebibu ami sia nu nga sambatu! ³⁰ Laak benaˈ minatengig bataˈ mu kiin, su gumilaˈ tu misukat mu gimu megunung di ngag libun, naa tinitiˈ mu pelum diniin su pilembuˈ nati baka!’

³¹ “Dagid sumimbag su gamaˈen, ‘Naa, Naung, ita duaˈ, meksalabuuk ita gusay megbenwa, kaas adin sug danaan, daniˈa dadema. ³² Dagid ndiˈ mesuˈat saˈ ndiˈ ita daan meglekebibu mukaˈ megleliag, puˈ ki ngudan mu kiin, lepeng minatay na, dayun mitubuˈ pelum. Mibeleng, dayun mibaangan na.’”