¹ Naa migukit si Isus tu nga sakupen, laungen dinilan, “Duuni peneligan nu medatuˈ getaw. Mendadi ki peneligan kini, dinangat ditu medatuˈ getaw, ndiˈen daw peksibaˈan su gaˈus pigwakil diniin. ² Naa saˈ maˈantu, sinabi nu medatuˈ getaw peneliganen, sinaakanen, ‘Naa ma, metuud ba ki midengegu kini mekatag diniˈa? Uliˈ mu dinaan su keglekwinta mu tu kelaun pigwakil diniˈa, puˈ kanaˈa na peneligan ku.’ ³ Benaˈ midengeg nu peneligan su tinaluˈ nu gegalenen, laungen dig dialem ginaanen, ‘Naa, taˈ mai baalen ku keni, kagina uiˈen dinaan nu gegalen kui ketendanan ku? Ndiˈu ma megaga mengimbaal dig lupaˈ, mpiidu dema menengi.’ ⁴ Kaliˈ pegleketau, laungen, ‘Aa naa, adun duun pai getaw menembaˈ dinaan tug balayen saˈ mawiˈ dinaani ketendanan ku, tumuˈ maˈniniig baalen ku!’

⁵ “Mendadi, sinabinen su nga kelaun miutangan tu gegalenen, piksesala tawan. Sinaakanen su miuna dateng, ‘Naa yaˈa ma, sanui gutang mu tu gegalen ku?’ ⁶ Kaliˈ sembag, ‘Megatus taruig lana.’ Kaliˈ pektaluˈ su peneligan, ‘Naa, kiniig lista mu. Pegingkuda deliˈ, sulat mu dayun, lima puluˈ laak.’ ⁷ Sinaakanen pelum su sala tawan, ‘Naa daniˈa ma, sanui gutang mu?’ Kaliˈ sembag, ‘Megatus bakidi trigo.’ Kaliˈ pektaluˈ su peneligan, ‘Naa, kiniig lista mu. Sulat mu diin, walu puluˈ bakid laak.’

⁸ “Naa mendadi,” maaˈ laung ni Isus, “saˈ midengeg nu gegalenen su pinggulaula nug limbungan peneliganen kia, pinalanen, puˈ telisebuten daw. Puˈ su nga getaw kinilawanig delendemanen, metau ilan mengandam di kepianan nilan ditug binayaˈ gebii buˈ gendaw. Telisebuten ilan mengandam dun, batul nu nga midelagan getaw.

⁹ “Kaas taluˈu tuˈu diniu,” maaˈ laung pa ni Isus, “ki gaˈus niu kinilawan, peksaluy niu, adun gabang niu tu nga samataw niu. Dayun saˈ mateng na su gendaw kiin mpapas su gaˈus, mpenembaˈ amu gusay ditug benwa ndaiˈ kebelengen. ¹⁰ Adin su meseligan di maikaˈ ketendananen, iini meseligan dadema di gembagel. Adin su meglimbung di maikaˈ, iini meglimbung dadema di melaun. ¹¹ Kaas diadia saˈ kanaˈa meseligan gumamit di gaˈus kinilawan, pesalig ba diniˈa ki gaˈus ditu gekbus langit? ¹² Mukaˈ saˈ kanaˈa meseligan di gimu laak pisalig pa deliˈ diniˈa, begayan ka ba nu Megbebayaˈ dig daniˈa gupia gimu?”

¹³ Diksuˈ ni Isus su tinaluˈen, “Naa su peneligan, ndiˈ mesuˈat pegdenganen tindanay nug duaˈ tawan gegalen. Puˈ saˈ maˈantu, mesengayen sug bekna gegalenen, laak petailenen su keduaˈ gegalenen. Atawaka iini petuudenen sug bekna gegalenen, dagid teliudanen laak su keduaˈen. Kaas su Megbebayaˈ mukaˈ su gaˈus, ndiˈ mesuˈat pegdenganen pebegelay di ginaa niu.”

¹⁴ Naa su nga Pariseo, benaˈ midengeg nilan su kelaun tinaluˈ kia ni Isus, piksudiˈan nilan iin, sabaˈ mesaku ilan gupia di kwarta. ¹⁵ Dagid kaliˈ pektaluˈ si Isus, “Paa, yamu di nga Pariseo, mekpaitaˈitaˈ amu mekesuun di gedapan nu nga getaw, laak misuunan nu Megbebayaˈi tantu delendeman niu. Ki melagaˈ gupia di pegitaˈ dun nu kilawan, melemuˈ laak dun su Megbebayaˈ.”

¹⁶ Kaliˈ pektaluˈ si Isus, “Naa dekag pasiˈ mituaˈ si Juan su Memunag Tubig, pigbiaˈan su nga getaw nu Palinta nu Megbebayaˈ pisulaten dini Moises mukaˈ tu ngag duma pimuunanen dengantu. Dayun genat di ketuaˈ ni Juan, pegukiten su Gempia Petenday mekatag di Keglekaunutan nu Megbebayaˈ, kaas su kelaun getaw, mektinantu sumakup dun. ¹⁷ Laak dagid pia maˈantu, ki Misulat Palinta nu Megbebayaˈ, ndiˈ mpalin su pegbayaˈen. Melemu pa megelaˈ mbeleng su gekleb langit buˈ lupaˈ kini, sabayaˈ nu Palinta, mengkanan sektaang taluˈ.”

¹⁸ Kaliˈ pektaluˈ si Isus, “Adin sug laki belengenen su sawanen dayun menginsawa na puliˈ dig lain libun, naa kiin, mikesalaˈ dusa. Mesama da saˈ duuni senlangan megbeleng, dayun penginsuaan nug lain laki sug libun. Kiin, mikesalaˈ dadema dusa su menginsawa dun.”

¹⁹ Naa miksambingay si Isus, laungen, “Duuni medatuˈ getaw, iini penepetenen gempula suub gadiˈ dakus sug duma melagaˈ penepeten. Gendawgendaw meglekebibu. ²⁰ Naa diag bisuangan nu medatuˈ getaw, duuni pegbelilid dia pubri getaw, ngalanen si Lazaro, mileepig lawasen penekit. ²¹ Puˈ liagan sia ni Lazaro, maan di nga mumu melabuˈ diag lemisaan nu medatuˈ getaw. Pidag pa tanan su penekiten, pinilaˈan nu nga gituˈ. ²² Mendadi benaˈ miniben, minatay si Lazaro, iwit dayun nu nga sesuguˈen nu Megbebayaˈ getaw langit tu gupid ni Abraham. Naa ki medatuˈ getaw kini, minatay dadema mukaˈ libeng. ²³ Naa benaˈ ditu na linaw gapuy su medatuˈ, miligetan gupia. Kaliˈ tingag, minitaˈen ditu melayuˈ si Abraham, sampay si Lazaro, masiˈ dia peksainganen gupia si Abraham.

²⁴ “Tiwagan dayun nu medatuˈ getaw si Abraham, laungen, ‘Uu Apuˈ Abraham, lelaatay mau! Suguˈ mu si Lazaro, adun lesekenen pia laak sebanay di tenduˈen di metegdaw tubig, adun petegduˈanen dinig dilaˈu. Puˈ mitegelanu patiˈ dini gapuy keni!’

²⁵ “Laak dagid miktaluˈ si Abraham, ‘Naa Apuˈ, iini pegdelendem mu, yaˈa, mibianan mu na su nga memis kebetang, saanan pa tetubuˈa. Si Lazaro, mibiananen dema su nga gempait kebetang. Dagid nemun, mipianan iin dini. Yaˈa pelumi mitegelan diin. ²⁶ Keduaˈen, duuni gembagel gupia gawang di gelet ta, adun ndiˈ mekebian su mangay sia diniu diin genat dini. Mukaˈ ndaˈ dademai mekebian mangay dinami kini genat diniu dapit.’

²⁷ “Kaliˈ sumpat su medatuˈ getaw, ‘Laak kelelaat diniˈa Apuˈ, penengiin ku dema tuˈu diniˈa, suguˈ mu si Lazaro meditug balay nu gamaˈu, ²⁸ adun penegulanen su patedu, puˈ duunig lima tawan patedu ditu, adun ndiˈ ilan sia mpeduma mekedini benwa nu kelegenay!’

²⁹ “‘Baa,’ simbag ni Abraham, ‘ki Palinta nu Megbebayaˈ pisulaten dini Moises mukaˈ tu ngag duma pimuunanen dengantu, mipeduunan ilan dun. Melengas kitui kineegan nilan.’

³⁰ “Laung pelum nu medatuˈ getaw, ‘Naa kanaˈ maˈnia, Apuˈ Abraham. Saˈ tumuˈ duun siai getaw genat matay mangay mekpegad dinilan, naa dekag pailan tuˈu peksikesuun.’

³¹ “‘Baa,’ simbag ni Abraham, ‘saˈ ndiˈ nilan kineegan ki Palinta nu Megbebayaˈ pisulaten dini Moises mukaˈ tu ngag duma pimuunanen dengantu, naa ndiˈ ilan gusay metuudan, pia pa duuni getaw metubuˈ puliˈ genat matay.’”