¹ Mendadi ndaˈ maiben, mikpesempel dini Isus su nga sakupen, sinaak nilan diniin, “Naa Sir, ki nga sakup di Keglekaunutan nu Megbebayaˈ, taˈ taway duni tampusan metaasi tindegen?”

² Saˈ maˈnia, suminabi si Isus sala tawan gembataˈ, piˈindegen di gedapan nilan. ³ Kaliˈ pektaluˈ si Isus, “Naa taman taluˈu diniu, ndiˈ amu mekesakup tu Keglekaunutan nu Megbebayaˈ, subay megbegu betad amu, penunggilingan niu sug betad nu gembataˈ. ⁴ Puˈ adin su menunggiling di gembataˈ kini, saˈitada mekpebabaˈ dig lawasen, iin tuˈu ki tampusan metaas sakup di Keglekaunutan nu Megbebayaˈ. ⁵ Mukaˈ pa padun, adin su menembaˈ di sala tawan gembataˈ maaˈ ni gembataˈ kini sabaˈ nu kesakupen dinaan, naa gitunganen, naani mipenembaˈen.”

⁶ Kaliˈ pagid pektaluˈ si Isus, “Mendadi adin su getaw mekegdaang di sala tawan gembataˈ kini, ki mikpetuud na dinaan, naa ki mekegdaang dun kia, saˈ pinenggiˈ palintangan gembagel galingan dayun lemesay tug laud, tumuˈ megaan daitu, sabayaˈ nu ginukuman nu Megbebayaˈ tu getaw mekegdaang di gembataˈ kini. ⁷ Mekelelaatlelaat su kelaun getaw dig dibabaw lumbang sabaˈ nu kegdaang di getaw. Minget ndiˈ mesuˈat puˈ ndaˈiduni kegdaang, laak pia maˈantu, ki getaw mekegdaang di samatawen, iini mekelelaatlelaat gupia!

⁸ “Kaas saladuaˈ diniu, saˈ pegdaangan ka, ki kemet mu atawaka geksud mui mekesabaˈ dun, naa putuk mui kemet mu kiin atawaka geksud mu, beleng mu dayun! Puˈ tumuˈ pa mpedumaa di ketubuˈ ndaˈi tamanen, pungkula, sabayaˈ mesangkapi kemet mu mukaˈ geksud mu, laak lebuˈen ka tug linaw gapuy ndaˈ nai kepalengen!^{a 9} Mesama da saˈ pegdaangan ka, ki mata mu pelumi mekesabaˈ dun, naa asak mui mata mu kiin, beleng mu dayun! Puˈ melengas pa diniˈa saˈ mpedumaa tu ketubuˈ ndaˈi tamanen, salabuuk daig lisu mata mu, sabayaˈ mesangkapi mata mu, laak lebuˈen ka tug linaw gapuy.”

¹⁰ Laung ni Isus, “Kaas petubud amu, adun ndiˈ niu peksudiˈani nga gembataˈ kini, pia sala tawan dinilan. Puˈ taman taluˈu diniu, saladuaˈ dinilan, duuni sesuguˈen nu Megbebayaˈ getaw langit mektagikul dun. Mukaˈ su getaw langit kia, gebii gendaw madap ditu Gamaˈu tu gekbus langit. [ ¹¹ Keduaˈen, naan kini, kig Bataˈ nu Kilawan, iini luminusadu dun, puˈ adun guunen ku ki nga getaw mibeleng.]

¹² “Puˈ alandunig delendeman niu? Pinenggiˈ duuni sala tawan megatusi karnirunen, dayun mbelengi salabuuk dun. Ndiˈen ba bilinen diag binentudan su siam puluˈ buˈ siam, adun penengaunen ki salabuuk kia mibeleng? Penengaunen lai! ¹³ Dayun saˈ metuunen na, taman taluˈu diniu, kig leliagen di salabuuk kia, gembagel pa dig leliagen ditu siam puluˈ buˈ siam karnirunen kia, su ndaˈ mbeleng. ¹⁴ Naa, maˈantu dadema su Gamaˈ niu ditu gekbus langit. Iini mauyaˈanen, ki nga gembataˈ kini, ndaˈiduni mbeleng dun, pia sala tawan dinilan.”

¹⁵ Laung ni Isus, “Saladuaˈ diniu, saˈ duuni samasakup mu mekesalaˈ diniˈa, naa laaway mu sug duma mu kia, pesuun mu diniin ki salaˈen kia. Laak abig mu, amu duaˈ da. Dayun saˈ mekineeg da diniˈa, paingalan ta dun, mipegawen mu ki samasakup mu kia. ¹⁶ Dagid saˈ ndiˈ mekineeg diniˈa, naa laaway mu puliˈ, tituluˈay mu, laak pedunut mu pelumi sala tawan atawaka duaˈ tawan, maaˈ dadema nu sinulat ditu Taluˈ nu Megbebayaˈ, laung, ‘Saˈ duuni getaw dengatenen sug dumanen, subay takesiˈan telu tawan. Saˈ ndiˈ mesuˈati telu, sukal da saˈ duaˈ tawan.’ ¹⁷ Dagid,” laung ni Isus, “saˈ ndiˈ dadema gusay mekineeg dinilan su samasakup mu kia, naa suknaˈay mu pelum tu gedapan nu pikumpungan nu nga sakupu. Pidag pa tanan, saˈ ndiˈ pa gusay mekineeg ditu pikumpungan, naa ki getaw kia, pelepeng mu di kanaˈ mekpetuud, atawaka di getaw mendawat buis.”

¹⁸ Laung padun ni Isus, “Kaas taman taluˈu diniu, adin sug benduun niu dinig dibabaw lumbang, benduun dadema ditu gekbus langit. Adin sug buangen niu dinig dibabaw lumbang, buangen dadema ditu gekbus langit.

¹⁹ “Mukaˈ padun taman taluˈu diniu, adinig duaˈ tawan diniu senguˈen niui penenebiin niu, naa pia alanduni penengiin niu, begay dadema nu Gamaˈu ditu gekbus langit. ²⁰ Puˈ adinig duaˈ tawan atawaka telu tawan mekpungun miksekat di kesakup nilan dinaan, naa naan, ditu dau dema, mungun dau dema dinilan.”

²¹ Mendadi mikpesempel dini Isus si Pedro, kaliˈ saak diniin, “Naa Kaunutan, saˈ duuni samasakupu menamal mekesalaˈ dinaan, sanu deksuˈ mai pedasun ku diniin? Sampay nga pitu deksuˈ?”

²² Simbag ni Isus, “Kanaˈ lai pitu deksuˈ da laak. Sinangkaliˈ saˈ pinenggiˈ pitu puluˈi pitu, naa pedasun mu pa gusay. ²³ Puˈ su Keglekaunutan nu Megbebayaˈ, maˈniniig bianen. Penenggiˈan ku duni gadiˈ, piningilanen su nga sesuguˈenen di nga gutang nilan diniin. ²⁴ Mendadi benaˈ miningil dun su gadiˈ, duuni sesuguˈenen iwit diniin, aba, kanaˈ laak sanu laksaˈi gutangen, ²⁵ ndaˈidun pa paduni sukatanen dun. Naa saˈ maˈnia, sinuguˈ sia nu gadiˈ peksaluy ki sesuguˈen kia adun mbaal gulipen, kampuˈ nu sawanen mukaˈ su kelaun bataˈen. Sampay su gikteb gimunen, peksaluy pa pagid sia, adun elapen sia nu gadiˈ su galinen, bayad tu gutang kia. ²⁶ Dagid benaˈ midengeg nu sesuguˈen kinii sinuguˈ sia nu gadiˈ, minginlulud di gedapanen mekpekilelaat diniin, laungen, ‘Ay, Adiˈ, kelelaat pektigela dinaan, puˈ biadan ku daig launanen!’ ²⁷ Mendadi ki gadiˈ kini, kaliˈen medengeg, milelaat tuˈu diniin, pituyangen su gutangen mukaˈ biluyen su sesuguˈenen kia.

²⁸ “Dagid su kepalus laak nu sesuguˈen kia dia gadiˈ,” laung pa ni Isus, “duuni misungkaken sala tawan sama sesuguˈenen. Naa ki sama sesuguˈenen kini, duun dademai gutangen diniin, megatus denario da laak. Dagid kaliˈ maitaˈ nu sesuguˈen su mikautang diniin kia, piguidanen masiˈ dig liig, lingeken sia, laungen diniin, ‘Naa, biaday mu na su gutang mu kia dinaan!’ ²⁹ Miglaub dayun di gedapanen su sama sesuguˈenen, mikpekilelaat diniin, laungen, ‘Kelelaat diniˈa, pektigela dinaan, puˈ biadan ku da diniˈa!’ ³⁰ Dagid kig bekna sesuguˈen kini, ndaˈ peliag. Palu pa mekpedasun dun, ndiˈ na daan. Pipirisunen sungkini sama sesuguˈenen, sampay da dun mbayaden sia su gutangen.

³¹ “Naa kaliˈ mesuunay nu ngag duma sesuguˈen, milegenan ilan dun gupia, linaawan nilan dayun su gadiˈ, inukit nilan diniinig launanen kia. ³² Kaliˈ medengeg nu gadiˈ, sinabinen su sesuguˈen kia, tinaluˈen diniin, ‘Paa, melaata sesuguˈen! Ndaˈu ba pedesunay ki gutang mu kia, gembagel dadema gupia? Minengia laak kelelaat, pidasun ku yaˈa dayun. ³³ Saˈ maˈnia, iini bentanganen, lilaatan mu dadema sia su sama sesuguˈen mu, puˈ yaˈa, lilaatan ku yaˈa dadema.’ ³⁴ Maˈantu, mitutung gangit su gadiˈ. Pipirisunen dayun su sesuguˈenen kia dakus pisilutanen. Naa alandun bai keguaˈen, subay gelaˈenen pa biaday su tibuuk gutangen?”

³⁵ Diksuˈ ni Isus su taluˈen, “Mendadi yamu dema, diadia maˈantui penggulaulaan diniu nu Gamaˈu ditu gekbus langit, saˈ ndiˈ niu pedesunen su salaˈ nu nga samasakup niu di ndiˈ megduaˈduaˈig delendeman niu dun.”