¹ Naa duuni sala Gendaw Pelali, inggat si Isus maan diag balay nu sala tawan kaunutan di nga Pariseo. Naa su ngag duma getaw dia, pektuliktulikan nilan si Isus, saˈ alanduni gulaulaanen. ² Mendadi, duuni getaw dia gedapan ni Isus, mingabul. ³ Benaˈ minitaˈ ni Isus, suminaak tu nga mekpetuˈun di Misulat Palinta nu Megbebayaˈ mukaˈ tu nga Pariseo, “Naa saˈ metaang di Gendaw Pelali, biwang ba dinita ditu Misulat Palinta nu Megbebayaˈ meneguliˈ ita, saˈ kanaˈ ba?”

⁴ Ndaˈ sembag ki nga kuntra ni Isus kia. Piguidan ni Isus di kemet su mingabul, piuliˈanen tuˈu. Dayunen pauliˈay tug balayen. ⁵ Sinaak dayun ni Isus tu nga getaw, “Naa ma. Saˈ pinenggiˈ duuni sala tawan diniu, melabuˈig bataˈen di medalem luak di Gendaw Pelali, pia pa sug bakanen laaki melabuˈ. Ndiˈen ba dedeliˈen guunay?”

⁶ Naa ndaˈidun gusayi mesembag nilan dun.

⁷ Naa sug duma getaw inggat maan diag balay kia, minitaˈ ni Isus puˈ pemiliˈen nilan su gingkudan ginandam tu metaas getaw. Saˈ maˈantu, migbaal si Isus penenggiˈan dun, laungen dinilan, ⁸ “Naa saladuaˈ diniu, saˈ pinenggiˈ enggaten ka sumaup dig belaˈi, saˈ mateng ka, ndiˈa pegingkud di gingkudan nu metaas getaw. Puˈ kalukalu duuni inggat metaas pa diniˈa, ⁹ dayun tekaw mbuus mekpesempel diniˈa su migenggat diniu duaˈ, maaˈ laungen dayun diniˈa, ‘Ay, beliu amu gingkudan, puˈ iini paingkuden di giningkudan mu kiin.’ Benaˈ mekegalin ka tu tampusan gembabaˈ gingkudan nu getaw, mpatiˈa mpiid. ¹⁰ Segaga saˈ enggaten ka sumaup dig lumpuk, pegingkuda tu tampusan gembabaˈ gingkudan. Saˈ maˈnia, mbuus mekpesempel diniˈa su migenggat diniˈa, maaˈ laungen dayun, ‘Baa, Sambat, galin ka dini metaas.’” Maaˈ laung ni Isus, “Saˈ maˈantu, mpegbesaan ka di gedapan nu kelaun duma mu meglekebibu. ¹¹ Puˈ adin su getaw petaasenen siai tindegen, iini pebebaˈen. Adin dema su getaw mekpebabaˈ dig lawasen, iini petaasen.”

¹² Kaliˈ pelum pektaluˈ si Isus tu getaw migenggat diniin, “Yaˈa pelum, maˈantu dadema, saˈ megenggata tu melaun getaw maan atawaka meglekebibu, ndiˈ pia saˈ iin laaki enggaten mu su nga sambat mu, nga pated mu, betaˈan mu, atawaka su nga sumbalay niu medatuˈ getaw. Puˈ saˈ ilani enggaten mu, naa enggaten ka nilan pelum. Maˈantu, mpekput na ki sugda dun diniˈa, ndaˈiduni mbilin. ¹³ Segaga saˈ meglekebibua, iini enggat mu su pubri, su nga mibektut, su nga pilung, sampay su ngag buta. ¹⁴ Leliagen ka dayun, puˈ kagina ndiˈ mekesuliˈ diniˈa su nga getaw inggat mu, sugdaan ka dun nu Megbebayaˈ saˈ mateng su gendaw metubuˈ puliˈ su nga mekesuun getaw minatay.”

¹⁵ Naa su ngag duma ni Isus maan, benaˈ midengeg nilani tinaluˈen kia, laung nu sala tawan, “Ki getaw mekesaup tu keglekebibu ditu Keglekaunutan nu Megbebayaˈ, leliagen tantu!”

¹⁶ Kaliˈ sembag diniin si Isus, “Dagid pegdelendem mu ini. Duuni getaw miglumpuk, melaun getaw pisebutanen. ¹⁷ Mendadi, benaˈ minuyaˈ na su gilak, suminuguˈ su gapuˈ peglumpuk di nga sesuguˈenen meksabi tu nga getaw pisebutanen, laungen, ‘Naa ditu namu, minuyaˈ nai gilak!’ ¹⁸ Laak dagid ki nga ginggaten sumaup kini, diadia mipauk ilan, lumbus laak ilan migbaalbaal lapal. Duuni miktaluˈ, ‘Begu dau mekesaluy lupaˈ, subay engain ku pa bentayay. Naa saˈ mesuˈat, taluˈ mu ditu, ndiˈ dau sumaup.’ ¹⁹ Laung nug duma, ‘Suminaluyu lima parisan baka, engain ku pa indanay pegdaru. Kaas saˈ mesuˈat, pemuunen ku diniˈa, ndiˈ nau sumaup.’ ²⁰ Laung pagid nug duma, ‘Begu pau kini penginsawa, kaas ndiˈu mekesaup.’ ²¹ Naa saˈ maˈantu, minuliˈ su sesuguˈen kia, inukiten ditu gegalenen sug launanen kiin. Mendadi ki gapuˈ balay, mitutung patiˈi gangiten. Kaliˈ pektaluˈ di sesuguˈenen kia, ‘Gebeka, leep mu su karsada maikaˈ saˈ gembagel dinig lunsud, penguit mu dayun dini su nga pubri, su nga mibektut, su ngag buta, dakus su nga pilung.’ ²² Naa saˈ maˈantu, benaˈ minateng puliˈ su sesuguˈen kia, laungen, ‘Sir, ki suguˈan mu dinaan, mitubus na, laak duun pai gingkudan.’ ²³ Kaliˈ pektaluˈ su gapuˈ peglumpuk, ‘Naa pedituun ka pelum nga karsada sampay dalan. Adini getaw metaangan mu, tegel mu sumaup, adun gembibu ita dinig balayu keni. ²⁴ Puˈ taluˈu tuˈu diniu, kig bekna pisebutan ku kitu, ndaˈidun dinilani mpeduma di keglekebibuu, pia sala tawan dinilan!’”

²⁵ Naa saˈ mipanaw si Isus, metibaˈ gupia getaw tumindug diniin. Mendadi, luminingay si Isus dinilan, kaliˈ pektaluˈ, ²⁶ “Adin su getaw sumakup dinaan, subay ki kepetailen dinaan, gembagel pa di kepetailen tu ginaˈen mukaˈ tu gamaˈen, tu sawanen, bataˈen, pateden libun laki, sampay su kepetailen tug lawasen. Puˈ saˈ kanaˈ maˈniai kepetailen dinaan, naa ndiˈ mesuˈat sumakup dinaan. ²⁷ Adin su ndiˈ mekpisan kurusen dakus megdunut dinaan, naa kiin, ndiˈ mesuˈat sumakup dinaan.”

²⁸ Laung ni Isus, “Pinenggiˈ duun diniui getaw meliag megbaal gembagel balay. Naa ndiˈ ba megingkud pa deliˈ meglekwinta di gastu dun, saˈ megaganen tubusay saˈ ndiˈ? ²⁹ Puˈ saˈ ndiˈ meglekwinta, tekaw buus laak mbulugen pesekay sug balay, dayun ndiˈen megaga tubusay, pegimusaungan nu nga kelaun mekaitaˈ dun, ³⁰ kaliˈ ilan taluˈ, ‘Haa, ki getaw kiin, mikpuun megbaal balay, dayun ndaˈen pelum megaga tubusay!’”^a

³¹ Laung pagid ni Isus, “Mesama da ki gadiˈ, saˈ mangay megbunuˈ tu sama adiˈen. Dekag pasiˈ mpanaw, ndiˈ ba megingkud pa deliˈ, pengentapenen saˈ su sundalunen selaksaˈ tawan, megaganen ba pengetuay sug dibaluy, duaˈ laksaˈ pelumi sundalunen? ³² Dayun saˈ pengentapenen ndiˈen megaga, selian melayuˈ pai sama adiˈen, ndiˈ ba memuun tu sama adiˈen kia, adun megeksud ilan? ³³ Ndaˈi sala tawan diniu mekesakup dinaan, subay ndaˈ na dig delendemanen su kelaun petailenen.”^b

³⁴ Kaliˈ gusay pektaluˈ si Isus, “Naa ki masin, gembageli gatagen. Laak saˈ meksitebang su masin, naa kendutaˈen ma dun pekpepuliˈ tu kepaiten? ³⁵ Saˈ kanaˈ na gempait, ndaˈ nai gatagen, pia baalen sia gabunu. Benaˈ belengen na laak nu getaw. Naa adin sug duuni telinganen, mekineeg dema tuˈu!”