¹ Naa, sendaw pa mektelipuun sug Lumpuk tug Liniusan. Mendadi kini si Isus, misuunanen puˈ minateng na ki kegawaˈen dinig lumbang, adun muliˈ ditu Gamaˈen. Kagina melelaat gupia tu nga piglegetawanen dinig lumbang, mauyaˈanen paitaˈen dinilan su gikteb lelaaten dinilan.

² Mendadi, miglebungan si nga Isus. Naa kini si Judas Iscariote, bataˈ ni Simon, daan na pinulayan nu Palin tumipu dini Isus. ³ Si Isus, misuunanen puˈ migelaˈ pegwakil diniin nu Gamaˈen su pegbayaˈ dig launanen. Misuunanen dadema puˈ pigenatanen su Megbebayaˈ, mukaˈ su Megbebayaˈ dademai uliˈanen. ⁴ Mendadi migbuat si Isus dia pengaanan, liwasen su suuben mukaˈ linibedanen tualyai gawaken. ⁵ Tinukakanen dayun tubigi palenggana, mikpuun dayun mengugas di geksud nu nga sakupen, pimunasanen dayun tualya kia linibed di gawaken. ⁶ Laak benaˈ midepet dini Simon Pedro, laung ni Pedro, “Aba, Sir, masiˈ yaˈa mai mengugas di geksudu?”

⁷ Kaliˈ sembag si Isus, “Ndaˈ mu pa mesabut nandaw ki pinggulaulaan ku kini diniˈa. Laak mesuunan mu da saˈ maiben.”

⁸ Laung ni Pedro, “Sampay saumulu, ndiˈu lai begay ugasan mui geksudu!”

“Saˈ ndiˈ mu paugasi geksud mu dinaan, kanaˈa na sakupu,” simbag ni Isus.

⁹ Kaliˈ sembag si Simon Pedro, “Saˈ maˈantu, Sir, kanaˈ laak nu geksudui ugasan mu! Sampay kemetu mukaˈ guluu pa pagid!”

¹⁰ Miksembag pelum si Isus, “Naa kanaˈ. Adin su mikeliguˈ na, miugasan nai tibuuk lawasen, ndiˈ na kambat meliguˈ puliˈ. Subay ugasan laaki geksuden dig lepup lupaˈ. Naa, yamu dema, miugasan namu, laak ndaˈ amu megelaˈ.” ¹¹ (Kaas tinaluˈ dun ni Isusi maˈnia puˈ ndaˈ ilan megelaˈ maugasay, puˈ misuunanen saˈ taˈ taway dun dinilani tumipu diniin.)

¹² Benaˈ mitubusen ugasay su geksud nilan, si Isus, siluken puliˈi suuben mukaˈ mipuliˈ diag lemisaan. Kaliˈ pektaluˈ dinilan, “Naa mesabut ma niui pinggulaulau diniu kini? ¹³ Gilal niau Mekpetuˈun mukaˈ Kaunutan. Paladpalad saˈ maˈnia, puˈ naan, tantu mikpetuˈunu diniu mukaˈ miglekaunutanu diniu. ¹⁴ Naa, saˈ naani mikpetuˈun diniu mukaˈ miglekaunutan diniu, dayun naani mingugas di geksud niu, subay peginugasay amu geksud niu. ¹⁵ Ki pinggulaulau kini, binaalu lendasan, adun penunggilingan niu, kaas pekpepianay amu. ¹⁶ Taman taluˈu diniu, su sesuguˈen, kanaˈ metaas pa di suminuguˈ diniin, mukaˈ su pegwekilan, kanaˈ metaas pa di migwakil dun. ¹⁷ Maˈantu, saˈ mesabut niu ini, leliagen amu dun saˈ penggulaulaan niu!”

¹⁸ Diksuˈ ni Isus, “Laak dagid ki tinaluˈu kini, kanaˈ mekatag diniu gelaˈ. Misuunan kuig delendeman nu nga pimiliˈu sumakup dinaan, laak dagid iini mpenggulaula, adun menuud su sinulat ditu Misulat Taluˈ nu Megbebayaˈ, laung, ‘Ki suminalu gupia dinaan maan, iin dademai tuminipu dinaan.’ ¹⁹ Naa, iini teluˈen ku diniu nandaw, su ndaˈ pa mpenggulaula, adun saˈ mpenggulaula na, metuudan amu dun naan su pekteluˈen ku. ²⁰ Taman taluˈu diniu, adin su menembaˈ tu suguˈen ku, naa gitunganen, naani mipenembaˈen. Pidag pa tanan, kagina pinembaˈu niin, mipenembaˈen dadema su suminuguˈ dinaan.”

²¹ Benaˈ mideksuˈi tinaluˈen kia, milayuˈ dayuni ginaa ni Isus. Pinluksaden dayun teluˈay di nga peneliganen kia, “Taman taluˈu diniu, ki sala tawan diniu, mektipu dinaan.”

²² Miksesindapay dayun su nga sakupen, puˈ misebuˈan ilan dun gupia saˈ taˈ taway duni mitenduˈanen tu taluˈen kiin. ²³ Naa sala tawan di nga sakup ni Isus, su petailenen gupia, pegingkud dia gupid ni Isus. ²⁴ Mendadi kinipayan dayun iin ni Pedro, laungen, “Saak mu lai diniin saˈ taˈ taway duni pekteluˈenen kia.”

²⁵ Minigini sakupen kia dia mesempel ni Isus, sinaaken dayun diniin, “Sir, taˈ taway dun iin?”

²⁶ Kaliˈ sembag si Isus, “Naa, duliten ku di sabawi pan kini. Adin su tulunan ku dun, iin nain.” Benaˈ dinuliten tuˈu, tinulunen dayun dini Judas, sug bataˈ ni Simon Iscariote. ²⁷ Kini si Judas, benaˈ mitabuken su pan, pingepuˈan dayun ni Satanas. Laung ni Isus diniin, “Naa kig baalen mu, baal mu na dayun!” ²⁸ Naa su ngag duma sakup ni Isus dia pengaanan kia, ndaˈidun dinilani mekesabut dun saˈ taˈ alanduni tinaluˈ dun kia ni Isus dini Judas. ²⁹ Laung dun nu ngag duma, kagina si Judasi meguit tug bataˈ kahun betangan nu kwarta nilan, sinuguˈ ni Isus diniin mangay menaluy gimpan dig Lebungan nilan gindan ditug Liniusan. Laung dun nug duma, suguˈen ni Isus pemegayanen su nga pubri.

³⁰ Benaˈ inaanen su pan kia, tumikaw dayun guaˈ si Judas. Gebii kia dema.

³¹ Benaˈ gumiwaˈ dia si Judas, kaliˈ pektaluˈ si Isus, “Naa naan kini, kig Bataˈ nu Kilawan, mbuasan nai kelengas nu pegbayaˈu. Buasan ku dadema su kelengas nu pegbayaˈ nu Megbebayaˈ. ³² Saˈ mbuasan na su kelengas nu pegbayaˈ nu Megbebayaˈ pebian dinaan, su kelengas nu pegbayaˈu, buasan ganam nu Megbebayaˈ meksekat di keksalabuuku diniin, naan kini, kig Bataˈ nu Kilawan. ³³ Yamu nu nga binataˈu, kanaˈ nau maiben dumuma diniu dini. Penengaun niau dayun, laak puliˈan ku taluˈ diniu su tinaluˈu tu nga kaunutan nu getaw Judea puˈ ndiˈ amu mekeditu pegengayan ku. ³⁴ Laak pengumbilin ku diniu kig begu palinta, pekpinetailay amu gupia. Pekpinetailay amu maaˈ nu kepetailu diniu. ³⁵ Iin dayuni kesuun dun nu nga getaw puˈ yamui sakupu, saˈ mekpinetailay amu.”

³⁶ Sinaak ni Simon Pedro dini Isus, “Sir, adin ka ma angay?”

Kaliˈ sembag si Isus, “Ndiˈa pa mekedunut dinaan nandaw ditu pegengayan ku. Dagid duuni gendaw, mekeglenduga daan tuˈu.”

³⁷ “Laak Sir,” sinaak ni Pedro, “mauma dema ndiˈ pau mekedunut diniˈa nandaw? Minuyaˈ nau meksaliunung diniˈa!”

³⁸ “Taˈ ma, Pedro,” simbag ni Isus, “meksaliununga tantu dinaan? Taman taluˈu diniˈa, dekag pasiˈ peguni su manuk, metelu deksuˈa na memalaw puˈ kanaˈ mau mailala.”