¹ Naan si Pablo, ginggatu nu Megbebaya' mbaal peneligan ni Kristu Isus mekatag di mauya'an nu Megbebaya'. Yami ni Sostenes su mimated dinita, piwitan nami amu sulat, yamu ² nga mikpungun tu Megbebaya' diag lunsud Corinto. Mipaas namu nu Megbebaya' adun mbaal amu piglegetawanen puun tu keksalabuuk niu dini Kristu Isus. Inggat amu nu Megbebaya' mbaal sakupen, sampay su ngag launan getaw mengamuyu' ditu Kaunutan ta si Isukristu, pia tanda' ilan pegbenwa, pu' iini Kaunutan ta muka' Kaunutan nilan dadema.

³ Penenebiin ku tu Gama' ta Megbebaya' muka' tu Kaunutan si Isukristu, begayan amu niin tulung muka' pianan ginaa.

⁴ Naa yamu, mikpaladpaladu lelayun tu Megbebaya' saba' diniu, pu' tinulung amu niin puun di keksalabuuk niu dini Kristu Isus. ⁵ Kagina gembagel gupiai tulungen diniu, sekat tu keksalabuuk niu diniin, bigayen diniu su tiba'an tinawan, kampu' nu tinawan niu megwali muka' su metaas sinuunan niu mekatag di metuud. ⁶ Ma'antu mingganget na dig delendeman niu su kegukit mekatag dini Kristu. ⁷ Kaas migela' begay diniu nu Megbebaya' su kepiananen. Selian niu megelat di ketua' puli' dini nu Kaunutan ta si Isukristu, nda'idun tu'ui kulang niu di tinawan, bisan maika'. ⁸ Penemalan pegisegay nu Megbebaya' su kekpetuud niu sampay mengiktebig lumbang kini sa' mateng puli' dini su Kaunutan ta si Isukristu. Ndi' amu dayun medangat, saba' nda' nai sala' niu. ⁹ Meseligan su Megbebaya', su migenggat diniu meksalabuuk ditug Bata'en si Isukristu, su Kaunutan ta, kaas penggulaulaanen.

¹⁰ Naa uu Mingumpated, kagina pigwekilanu nu Kaunutan ta si Isukristu, penengiin ku diniu, peksalabuukay niu ki telu'en niu, adun ndi' amu meksuaysuay. Peksalabuuk amu gupia dig delendeman niu muka' di pemilang niu di gempia gulaula. ¹¹ Iini sinulatu dun ini, pu' duunig duma ni nga Cloe migukit na dinaan pu' meksinualay daw amu. ¹² Betangen ku ma'nini', kada sala penunan, sala dawi telu'enen. Duun dawi mektalu' pu' naan daw si Pabloi dinunutanen. Telu'en daw nu sala pu' si Apolos masi' dawi dinunutanen. Telu'en nu sala pelum daw pu' si Pedro dawi dinunutanen. Muka' duun pa pagid dawi mektalu' pu' si Kristu dawi dinunutanen. ¹³ Mikpekilas ba si Kristu mitukid diniu? Kana' naani pinatay di kurus adun gumanti' diniu. Muka' su kebunag diniu tubig, kana' puun di kesakup niu dinaan.

¹⁴ Mendadi mekpaladpaladu gupia tu Megbebaya' pu' meliang diniui binunagan ku tubig, si Crispo bu' si Gayo laak. ¹⁵ Ma'antu nda'idun dayuni mekektalu' pu' binunagan ku amu tubig puun tu kesakup niu dinaan. ¹⁶ (Aaw, wa'a daan. Mibunagan ku tubig si nga Estefanas. Muka' milingawan ku sa' duun paig duma mibunagan ku.) ¹⁷ Pu' kana' iini sinugu'an dinaan ni Kristu memunagu tubig, segaga sinugu'u niin megukit Gempia Petenday tu nga getaw. Muka' nda' dau dema niin sugu'ay megukit pebian tu tinawan nu kilawan. Pu' sa' upama ma'nia, mabu' ndi' mesabut nu nga getaw pegukitan ku pu' megawen ilan puun tu pegbaya' ni Kristu su kepatayen dia kurus.

¹⁸ Naa su Gempia Petenday mekatag di kepatay ni Kristu dia kurus, ndi' ba metuud, pimilang nu nga getaw mekebeleng, nda'i gatagen? Laak ita nu nga migawen nu Megbebaya', pemilangen ta su pigwali kiin ginuung nu Megbebaya', pu' megawen su mekpetuud dun. ¹⁹ Nda' ba mesulat kanugdiin di Misulat Talu' nu Megbebaya',

²¹ Su Megbebaya', metau. Puun tug daniin tinawan, nda'en begay mesuunan nu nga getaw pu' iini Megbebaya' pebian di tinawan kinilawan. Segaga pigdelendemen pegleguunenen su nga mekpetuud diniin pebian di pegukiten ta Gempia Petenday, su laung dun nu nga kilawan nda'i gatagen. ²² Su nga getaw Judea, ndi' ilan mekpetuud ditu Megbebaya' sa' nda'i paita' ta dinilan mekesalebu' tu'us. Su nga getaw Grecia, sa'itada su nga kana' getaw Judea, mekpetuud ilan laak sa' pesuun ta dinilan su medalem titulu'an. ²³ Laak ita pasi', ukiten ta si Kristu linansang di kurus, su laung dun nu nga getaw Judea kemilas, muka' laung dun nu nga kana' getaw Judea nda'i gatagen. ²⁴ Laak dagid, adini getaw inggat nu Megbebaya' sumakup diniin, sa' getaw Judea, sa' kana', misuunanen na pu' pisuun nu Megbebaya' su ginuungen muka' su tinawanen, iin su gasal ni Kristu. ²⁵ Metuud duuni getaw laung nilan dun migdupang su Megbebaya' sa' linansang si Isus dia kurus, laak dagid metaas pai tinawan nu Megbebaya' di tinawan nu getaw. Duun dademai getaw laung nilan dun nda'i pegbaya' nu Megbebaya' gumawen dinita, laak metaas pai pegbaya'en di pegbaya' nu getaw.

²⁶ Mendadi uu Mingumpated, pegdelendem niu deli' su kebetang niu su kegenggat diniu nu Megbebaya'. Su nda' pamu pekpetuud diniin, meliang diniui paingalan dun nu nga sama kilawanen metaasi sinuunanen. Meliang dademai metaasi gelalen. Meliang pa pagidi getaw medatu' sikna mbata'en. ²⁷ Pimili' sungkin nu Megbebaya' su nga laung dun nu nga kilawan getaw nda'i gatagen, adun mpengumpiiden su nga laung nilan dun metaasi sinuunanen. Pimili'en su getaw nda'i gelalen adun mpengumpiiden su nga laung nilan dun metaasi gelalen. ²⁸ Pimili'en su nga gempusuk di nga kilawan muka' su nga piksudi'an nu nga sama kilawanen sampay su nga getaw nda' dawi pantagen, adun mpengawa'en su laung dun nu nga kilawan metaasig laga'en. ²⁹ Pima'nia nu Megbebaya' pu' adun nda'i getaw mpengangya'en su pegbaya'en muka' su tinawanen dia gedapan nu Megbebaya'. ³⁰ Laak yamu, pisalabuuk amu nu Megbebaya' dini Kristu Isus. Puun tu keksalabuuk ta dini Kristu kiin, bigayan ita niin tinawan ta tantu, pimilang ita niin mekesuun, pinaas ita niin daniin getaw muka' pileksu ita niin ditu kaulipen ta dig dusa ta. ³¹ Kagina ma'antu, ndi' ba metuud su sinulat kanugdiin, “Adini getaw mauya'anen megangya', subay pengangya'en su pinggulaula nu Kaunutan.”