¹ Naa Mingumpated, mauya'an ku ndi' niu selingawan su mibianan nu nga ginepu'ay nami getaw Israel suminakup dini Moises kanugdiin. Su kegawa' nilan diag benwa Ehipto, pinendingan ilan nu gabun migabay dinilan, launan nilan. Nda' dailan dema meka'iday sa' mikelaad ilan dig dagat paingalan dun su Gempula Dagat. ² Ki kebian nilan di gabun muka' dig dagat, lepeng mibunagan ilan gela' tubig tu'us pu' sakup nailan ni Moises. ³ Muka' mika'aan ilan gela' di gaan gumimaw bigay dinilan nu Megbebaya', ⁴ sampay su tubig bigayen dinilan, mika'inum ilan dun gela', pu' ininum nilan su gumimaw tubig gumiwa' tug batu pinuka' nu Megbebaya'. Laak sug batu, iini tantu ma'ananen si Kristu su migdunut dinilan, pu' iini pigenatan nu gininum nilan. ⁵ Pia ma'antu, meliang dinilani liliag dun su Megbebaya', kaas metiba'i minatay diag limawa'.

⁶ Naa, ki nga mipenggulaula kia, mibaal na penenggi'an dinita, adun mesuunan ta gupia pu' melaatig deksu'anen ki mayak ita di melaat, maa' danu mipenggulaula nu nga ginepu'ay nami kanugdiin. ⁷ Kaas ndi' ta mpia pektemuyen su ngag ledawan. Pu' lendasan laak nu tautau diwata. Duuni ngag duma nu nga ginepu'ay nami miktamuy dun, mipeduma ilan dayun di nga pilebu'an nu Megbebaya'. Pu' nda' ba mesulat di Misulat Talu' nu Megbebaya', “Mingingkud su nga getaw, adun maan ilan muka' meginum ilan. Laak migbuat ilan dayun adun meglekebibu ilan megbebulek, deksu'anen meglaat pekesuunan.” ⁸ Subay ndi' ita megdusa, pu' duunig duma dinilan migdusa, kaas sendaw da, pilebu'anig dua' laksa' bu' telu ngibu tawan. ⁹ Muka' subay ndi' ta pengindanan su Kaunutan maa' nu kengindan diniin nu ngag duma getaw kanugdiin, pu' pinatay ilan nu nga mamak. ¹⁰ Subay ndi' ita megbensi tu Megbebaya' maa' danilan, pu' pinatay ilan nu sesugu'en nu Megbebaya' getaw langit tindu'en mekpatay dinilan.

¹¹ Naa, ki nga mipenggulaula kiin, mibaal na penenggi'an di gempia pegliaun nu ngag duma. Kaas misulat dadema, adun metitulu' dinita nga pektetubu' nandaw, pu' sungu melengkebig benwa.

¹² Mendadi, adini samasakup ta laungen pu' metau na megbaya' di gayaken, subay mekpetubud gupia, pu' mbuus mpegdaangan! ¹³ Pia ta' alanduni kengindan mbianan niu, mbianan gusay nu nga sama kilawan niu. Laak kagina meseligan su Megbebaya', ndi'en begay penemalan amu pengindanay tu gendi' niu megaga tigelay. Sa' mpengindanan namu, begayan amu niin pebian niu di kektigel niu, adun ndi' amu mpegdaangan.

¹⁴ Kaas uu Mingumpated petailen ku, subay pegliaun niu su kektamuy tug ledawan. ¹⁵ Yamu nga pegyegaan ku, metelisebutay amu, kaas ki sinulatu kini, pegdelendem niu gupia sa' metuud sa' kana'. ¹⁶ Ki keglumpuk ta maan ita gindan tu kepatay ni Kristu, mekpaladpalad ita tu Megbebaya' mekatag dig bitang tu tasa, dayun sa' minum ita dun, mailasan ita dugu' ni Kristu. Sa' memeta ita pan pelum, dayun aanen ta, mailasan daita dema lawas ni Kristu. ¹⁷ Kagina salabuuk dai pan kia, sa'itada sug lawas ni Kristu, pia melaun ita, lepeng salabuuk lawas daita, pu' mailasan ita tu salabuuk pan.

¹⁸ Naa, pegdelendem niu deli' sug betad nu getaw Israel. Ndi' ba metuud, su nga maan betang pengilak tu Megbebaya', pebian dun, megduma ilan di kektamuy diniin? ¹⁹ Pengma'anan ku ba pu' sug ledawan, duuni pantagen? Sa' su gilak dun, duun bai pantagen? ²⁰ Ndi' dadema tu'u, pu' sug betang pengilak nu nga kana' mekpetuud tu Megbebaya', iini pengilakan nilan su menenulay, kana' nu Megbebaya'. Mpauku sa' meglimbang amu di menenulay. ²¹ Kaas, sa' minum amu di tasa gindan tu Kaunutan, ndi' mpia minum daamu dema dig danu menenulay. Sa' maan amu tu pekaanan nu Kaunutan, ndi' mpia aanen niu dadema sug danu menenulay. ²² Melengas ba pepengimbeguun ta su Kaunutan di menenulay? Laung niu dun ba pu' gembagel pai pegbaya' ta di pegbaya' nu Kaunutan?

²³ Naa, nda'idun laungi geligen ta. Metuud, laak dagid kana' nug launan baaleni mekabang di kekpetuud ta. Metuud nda'i geligen ta, laak dagid ndi' pegiseg nug launaneni kekpetuud nu ngag duma ta. ²⁴ Pu' ndi' ta mpia tagikulen su kebetang ta laak, sa' melengas, sa' kana'. Subay tagikulen dadema su kebetang nug duma ta. ²⁵ Naa, sa' ma'antu, pia ta' karniay duni pekseluyen ditu tebu'an, mesu'at da aanen niu, ndi' na kambat saaken ditu meninda sa' daansama' ginilak tug ledawan. Mesu'at aanen niu di kana' dua'dua'ig delendeman niu dun. ²⁶ Ma'aan ta sug launan ginis gaan, pu' nda' ba mesulat kanugdiin di Misulat Talu' nu Megbebaya', “Danu Kaunutan su tibuuk lumbang sampay sug launan bitang dun.”

²⁷ Muka' sa' duun demai getaw nda' pekpetuud ditu Kaunutan megenggat diniu maan diag balayen, muka' sa' meliag damu media, aan niu da su gilak diniu. Ndi' niu dadema iin saakay sa' daansama' ginilak tug ledawan su seda'an, pu' nda'ig labeten sa' dua'dua'ig delendeman niu dun. ^28-29 Laak dagid sa' duuni samasakup niu telu'enen pu' ginilak na di pekenuan su seda'an dia, ndi' na niu mpia aanen, adun ndi' mpelaatan nu samasakup niu su pinggulaula niu.

Mendadi duun dayuni miktalu', “Kagina nda'i geligen ku, ta' mai pegeli'an ku dun aanay saba' nu geligen nug dumau? ³⁰ Sa' mekpaladpalad dau dun tu Megbebaya', dayun aanen ku, ta' mai pegdena'enu dun nu ngag dumau mekatag di pipeladpeladan ku?”

³¹ Kaas pia ta' alanduni baalen niu, sa' maan amu, sa' minum amu, subay menggulaula amu dun adun megdedengeg su Megbebaya'. ³² Kagina ma'antu, subay peksiba'an niu su pegbetaden niu, adun ndi' amu mekesala' tug delendeman nu nga getaw Judea, sa' su nga kana' getaw Judea, sampay su ngag duma di pikumpungan niu tu Megbebaya'. ³³ Ma'nia dademai pegbetaden ku, pu' adun mekpeleliagu di tiba'an getaw meksekat dig launan baalen ku. Petuyangen ku na su kepia dinaan, pu' pektalentenan ku laak su kepia di ngag launan getaw, adun megawen ilan di sala'.