² Naa yamu, penalan ku amu, pu' medelendem niau lelayun, muka' piktalentenan niu su piktu'un ku diniu. ³ Naa, iini mauya'an ku mesuunan niu pu' si Kristu, iini megbaya' tu ngag laki, su dadema ngag lakii megbaya' tu sawanen, muka' su Megbebaya'i megbaya' dini Kristu. ⁴ Kaas, sa' mekpungun amu nga sakup ni Kristu, sa' duunig laki menenabi atawaka megwali talu' nu Megbebaya' dayun memangyu, mpengumpiiden si Kristu. ⁵ Ma'nia dademaig libun, sa' menenabi atawaka megwali talu' nu Megbebaya' dia pikumpungan niu, laak nda' pasi' pemengyuayi gulunen, ma'niinen dadema mipengumpiid su sawanen. Pu' lepeng ikudan su gulu nug libun. ⁶ Laak sa' ndi' memangyu sug libun, tumu' pai pekudenen siai gulunen. Laak dagid, kagina gempiid sa' ekisan, subay memangyu. ⁷ Kig laki pasi', ndi' na kambat memangyu sa' menenabi atawaka megwali dia pikumpungan niu, pu' lingaw main nu palas nu Megbebaya', mpaita'en su kelengas nu pegbaya' nu Megbebaya'. Sug libun pasi', subay memangyu daan, pu' lingaw laak iin nu palas nug laki. ⁸ Pu' ndi' ba metuud, kana' nug libuni pigenatan nug laki kanugdiin. Pu' pigenatan nug libun sug laki. ⁹ Muka' kana' iini biwat dun nu Megbebaya' sug laki, adun megabang tug libun, pu' iini biwat dun sug libun, adun megabang tug laki. ¹⁰ Kaas, adun mpaita'en di nga sesugu'en nu Megbebaya' getaw langit pu' mekpetuud tu sawanen, mpia memangyu sug libun dia pikumpungan niu. ¹¹ Laak dagid, pia ma'antu, puun tu keksalabuuk ta ditu Kaunutan, mekpaingabang sug libun ditug laki, muka' mekpaingabang dadema sug laki ditug libun. ¹² Pu' pia sug lakii pigenatan nug libun kanugdiin, sug libun nai megbata' dig laki. Muka' sug launanen biwat nu Megbebaya'.

¹³ Mendadi, pegdelendem niu gupia sa' gempia menenabi sug libun ditu Megbebaya' dia pikumpungan niu sinegay nda' kemangyu, sa' ndi' mpia. ¹⁴ Ndi' ba metuud, genat di pikpuunan nug launan, gasal nug laki gempiid sa' metaasig buuken? ¹⁵ Laak, sa' metaas pasi'ig buuk nug libun, kiai kelengasen, pu' bigay diniin sug buuken adun metabun di gulunen. ¹⁶ Naa, sa' duuni getaw mpauk tulima' tu titulu'an ku kini, sembagen ku pu' nda'ig lain titulu'an ku muka' nda'ig lain betad nu nga pikumpungan nu nga sakup nu Megbebaya'.

¹⁷ Naa, duun pa titulu'u diniu, laak ndi'u amu penalan. Sa' daw mekpungun amu adun mektamuy amu, kana' kepiaig deksu'anen, segaga kelaatan dawig deksu'anen. ¹⁸ Beknanen, duuni migukit dinaan pu' sa' daw mekpungun amu, mekpinigpinig amu. Naa duuni metuudanu dun. ¹⁹ (Duun daan tu'u diniui ndi' meksalabuuk, pu' adun mailala gupia sa' adin su ngag duma niu suminakup tantu.) ²⁰ Kaas, sa' meglumpuk amu maan daw gindan tu Kaunutan, kana' amu meksalabuuk. Sa' ma'antu, kana' nug lebungan gindan tu Kaunutan su ka'aan niu. ²¹ Sa' timpu na meglebungan diadia, aanenen daw dayun sug daniin lebungan. Ndi' daw amu meginelatay, kaas duun pa dawi megutem muka' duun daw dademai megbebulek na. ²² Masi', nda'idun maig balay niu ka'aanan niu muka' kainuman niu? Mauya'an ba niu pemilangen niu su pikumpungan nu nga sakup nu Megbebaya' nda'ig laga'en, muka' pengumpiiden niu pa pagid su nga kulangi gaanen muiten diag lumpuk niu? Ta'i mpiau telu'en diniu? Penalan ku bamu? Baa, ndi' lai mesu'at.

²³ Naa kini naig betad mialapu ditu Kaunutan, muka' tinitulu'u dayun diniu. Su Kaunutan si Isus, su gebii ketipunen, su nda' pa metipu, minalap pan. ²⁴ Sikna mikpaladpalad tu Megbebaya', pimetanen su pan, dayunen pentulunay dia nga sakupen. Kali' pektalu', “Kini sug lawasu, gumanti' diniu. Kini, aan niu lelayun, pu' adun medelendem niau.” ²⁵ Ma'nia dadema, bena' mitubus ilan maan, minalap sala tasa penginumen, kali' pektalu', “Ki penginumen kini, iin sug dugu'u, kig bian nug begu pasad nu Megbebaya' tu getaw puun tug dugu'u. Kaas sa' inumen niu ini, bisan nanu, medelendem niau.”

²⁶ Naa sa' ma'antu, sampay mateng puli' dini su Kaunutan ta si Isus, kada maan amu di pan kia muka' minum amu di tasa kia, metakesi'an niu su kesalig niu di kepatayen. ²⁷ Mendadi, sa' duuni getaw maan di pan muka' minum di tasa nu Kaunutan, asa nda' pengganget dig delendemanen su ma'anan nug baalenen, naa ma'antu, peksudi'anen su Kaunutan, kaas mekesala' dig lawas ni Isus muka' dig dugu'en. ²⁸ Mendadi, sa' meglumpuk amu maan gindan tu Kaunutan, diadia subay unaanen peksima'ay sug delendemanen. Dekag pa aan tu pan muka' minum dayun di tasa. ²⁹ Pu' adini getaw maan tu pan kia muka' minum di tasa, asa ndi'en mesabuti ma'anan nug lawas nu Kaunutan, maukum saba' nu ka'aanen muka' kainumen. ³⁰ Kaas, iini melaun diniui melubay dun muka' megladu, sampay duun diniu dademai matay, pu' ginukuman na dinilan nu Megbebaya'. ³¹ Sa' unaan ta pa peksima'ay sug delendeman ta, ndi' ita dayun maukuman nu Megbebaya'. ³² Laak pia ma'antu, sa' upama ukuman ita nu Kaunutan, dayun pengmensuun ita niin pa pagid, metitulu'an ita, adun ndi' ita mpeduma ukumay di nga sama kilawan ta ditug binaya' gebii bu' gendaw.

³³ Kaas uu Mingumpated, sa' meglumpuk amu maan gindan tu Kaunutan, peginelatay amu, dekag pamu aan. ³⁴ Laak sa' duun diniui megutem, subay maan deli' dia da balayen, adun ndi' amu ukuman nu Megbebaya' saanan niu meglumpuk.

Naa su ngag duma sinaak niu di sulat niu, titulu'u da diniu sa' matengu dia niu.