¹ Naan si Pablo, peneligan ni Kristu Isus puun tu mauyaˈan nu Megbebayaˈ, dumau si Timoteo su mimated dinita. Suminulat ami diniu su pikumpungan nu nga sakup nu Megbebayaˈ diag lunsud Corinto, kampuˈ nug launan getaw di tibuuk benwa Grecia pinaas na nu Megbebayaˈ daniin piglegetawan.

² Penenebiin ku begayan amu nu Gamaˈ ta Megbebayaˈ mukaˈ nu Kaunutan si Isukristu tulung mukaˈ pianan ginaa.

³ Naa su Megbebayaˈ, su pektemuyen nu Kaunutan ta si Isukristu mukaˈ Gamaˈen pa pagid, gempia ta pegdedengegen, puˈ iini Gamaˈ metau melelaat di getaw mukaˈ iinig Diwata su pigenatan nug launan kengamuˈ di getaw. ⁴ Pengemuˈen ita niin dig launan kegleget dinita, adun metau daita dema mengamuˈ di nga samataw ta, bisan taˈ keglegetay dun dinilan, miksekat tu kengamuˈ dinita nu Megbebayaˈ. ⁵ Metuud, mipeduma ita di gembagel kengamuˈ nu Megbebayaˈ pibian dini Kristu maaˈ dadema nu kepeduma ta tu kelaun kelegenay ni Kristu. ⁶ Saˈ peglegetan ami, iini peglegetan ami dun, adun mebangan nami amu mukaˈ megawen damu dema. Saˈ ebangan ami, ebangan nami damu dema, sampay begayan amu sekeg niu meketigel amu di kelegenay niu maaˈ nu kelegenay mibianan nami dadema. ⁷ Kaas ndiˈ meglugbadi kesalig nami diniu. Kumalenged mpeduma amu di kelegenay nami, mpeduma damu dema di kengamuˈ dinami nu Megbebayaˈ.

⁸ Naa Mingumpated, mauyaˈan nami mesuunan niu su kegleget dinami su saanan nami diag benwa Asia. Kagina meliget gupiai mibianan nami, batik nami dun ndiˈ nami megaga, sampay laung nami dun, naa matay nami. ⁹ Maˈniin duuni ginukuman dinami lagaˈ na ginaa nami. Laak dagid, iini mipenggulaula nami dun, adun kanaˈ nug lawas namii seligan nami, segaga siligan nami su Megbebayaˈ, su mekpetubuˈ puliˈ di minatay. ¹⁰ Ginawen nami nu Megbebayaˈ adun ndiˈ ami matay, mukaˈ guunen pami niin gusay. Mukaˈ pa padun seligan nami puˈ su Megbebayaˈi meglegawen dinami puliˈ. ¹¹ Iin dademai gabang niu dinami pebian di kenenabi niu, adun guunen ami niin. Naa, saˈ maˈantu, metelimaˈ nu Megbebayaˈ su kelaun kenenabi kia, mpianan ami dayun, kaas melaun getawi mekpaladpalad diniin meksekat di gempenggulaula nami.

¹² Naa, iini liliag ami dun, puˈ kanaˈ duaˈduaˈig delendeman nami mekatag di kepia pigbetad nami di nga samataw nami. Ki kebian nu pigbetad nami, mekesuun gupia mukaˈ miksekat di gempia delendeman mikpuun tu Megbebayaˈ. Labi na su pigbetad nami diniu mikpuun di tulung dinami nu Megbebayaˈ, kanaˈ nu tinawan kinilawan. ¹³ Puˈ sulaten nami diniu su laak mbasa niu mukaˈ mesabut niu, saˈitada su kanaˈ sambingay. Pedetengen ku megelaˈ pa niu mesabut ¹⁴ su maikaˈ pai kesabut niu dun nemun, adun saˈ mateng dini puliˈ su Kaunutan ta si Isukristu, leliagen amu dun dinami maaˈ dadema nug leliag nami diniu.

¹⁵ Naa, kagina misuunan ku na tuˈu puˈ mesabut niuig launanen kia, bekna pigdelendemu, medituunu niu sia, adun duaˈ deksuˈ pamu mpianay. ¹⁶ Puˈ kig bekna delendeman ku, su saanan ku mpanaw mangay dinig benwa Macedonia, tumukawu sia dia niu, mukaˈ bianan ku damu puliˈ saˈ muliˈ nau pelum, adun pegebangan niau dadema di kebundasu dayun ditu Judea. ¹⁷ Naa, kagina pinalin kuig delendeman ku, megileng baig delendeman ku? Saˈ pigdelendemui kepanawu, miksekat ba di mauyaˈan nu kekinilawan ku laaki pigdelendemu, kaas midedaliˈui ketaluˈu dun puˈ medituunu niu mukaˈ ndiˈu meditu? ¹⁸ Kumalenged meseligan su Megbebayaˈ, ndaˈ pegdenganayi tinaluˈu diniu “Medituunu” mukaˈ “Ndiˈ.” ¹⁹ Puˈ iini ginukit nami ni Silas mukaˈ ni Timoteo diniu, si Isukristu, sug Bataˈ nu meseligan Megbebayaˈ. Naa, si Isukristu kini, ndiˈ megilengig delendemanen, puˈ meseligan gupia. ²⁰ Puˈ iini menuud tu ngag launan pinasad nu Megbebayaˈ ditu nga piglegetawanen. Kaas kiai metaluˈ ta dun “Amen” (guluganen menuud) saˈ menenabi ita pebian dini Isukristu. Mukaˈ maˈantu, megdedengeg gupia su Megbebayaˈ. ²¹ Su Megbebayaˈi mekpepengganget dun dig delendeman ta puˈ miksalabuuk naita dini Kristu. Iin dademai tuminduˈ dinami peneliganen, ²² puˈ tinuˈusan ita niin daniin getaw, sampay bigayen dinita sug Balakaten dialem ginaa ta, iini piunanen dig launan pingandamen begay dinita. ²³ Naa, sinambayu su Megbebayaˈ puˈ iini pigdelendemu dun ndiˈu deliˈ media Corinto, puˈ adun ndiˈu amu melibuleng puun tu kepegbeluˈu sia diniu. ²⁴ Puˈ ndiˈu megbayaˈ di kesalig niu, puˈ meligen nai kekpetuud niu, segaga megabangu diniu, adun megisegig leliag niu.