¹ Naa saˈ maˈantu, tigaˈwan pigdelendemu ndiˈ pau deliˈ media niu, adun ndiˈu amu mbegayan puliˈ kelegenay. ² Puˈ saˈ upama libulengen ku amu, taˈ taway dun dayunig dumau adun mpiai ginau? Su laak linibulengu. Ndiˈ lai mesuˈat. ³ Iini piwitu dun diniu su sala sulatu kiin, mipauku media niu, tekaw buus mekpelibuleng dinaan su nga getaw mekpeleliag sia dinaan. Puˈ misuunan ku saˈ leliagenu, leliagen damu dema, launan niu. ⁴ Su kesulatu dun, milegenanu gupia sampay mikengaduyu. Puˈ kanaˈ iini sinulatu dun adun mekpelibulengu diniu, segaga suminulatu dun puˈ adun metuudan amu dun puˈ melelaatu diniu gupia.

⁵ Naa, ki mikesalaˈ kiin dig dumanen, ndaˈ mbaal kelibulengu, segaga yamui pilibulengen, launan niu, laak ndiˈu na pebegeleni salaˈen. ⁶ Sukal nai silut mipebian di ngag lelaunay duma niu. ⁷ Kaas subay pedesunen niu pelum iin, mukaˈ pengemuˈen niu, kalukalu mbuus lumukas gupia sabaˈ nu meliget kedemengen dun. ⁸ Mendadi, penengiin ku diniu, subay paitaˈ niu diniin puˈ petailen niu iin gusay. ⁹ Iini piwitan ku amu dun sulatu kiin, puˈ mauyaˈan ku peksimaˈen ku amu saˈ lelayun amu mekpetuud di suguˈan ku diniu. ¹⁰ Adin su getaw pidasun niu di mipenggulaulanen, pedesunen ku dadema. Puˈ saˈ upama duuni mikesalaˈ dinaan, pedesunen ku adun pepianan ku amu, puˈ pigwekilan ami ni Kristu. ¹¹ Mingmaˈniau, adun ndiˈ ita muit nu gakal ni Satanas mekatag dig duma niu kiin mikesalaˈ. Puˈ misuunan ta si Satanas, melaat gupiaig delendemanen.

¹² Naa, su kepanawu pangay ditug lunsud Troas puˈ megukitu Gempia Petenday mekatag dini Kristu, saˈ minatengu, iini mibianan ku maˈniin mipukaˈ nu Kaunutan sug bianan ku dig baalen ku. Gembageli sikawan ku megukit di Gempia Petenday dia. ¹³ Pia maˈantu, su saanan ku ditu, milibulengu di kedawat niu di sulatu kiin, puˈ ndaˈu mpegitaˈ dia si Tito su mimated dinaan, su kedatengen sia genat dia niu. Kaas migudasu di nga getaw dia, dayun minundasu dinig benwa Macedonia.

¹⁴ Dagid pia maˈantu, mekpaladpaladu tu Megbebayaˈ, puˈ sabaˈ nu keksalabuuk ta dini Kristu, itai maaˈ nu getaw midaap ni Kristu di gubat iini mikedaag, lelayun ita niin dayun pegegakay mekpedayag di ngag launan getaw. Pisigwagen dinita tu tibuukan benwa su petenday mekatag dini Kristu maaˈ nu memut sumapu meleep dig benwa. ¹⁵ Puˈ su gukiten ta Gempia Petenday maaˈ nu memut sumapu pegbegay ni Kristu ditu Megbebayaˈ meleep dayun tu nga getaw, su getaw pegleguunen mukaˈ su pekebeleng dadema. ¹⁶ Naa saˈ maˈantu, di kedengeg dun nu nga getaw pekebeleng, meselaini Gempia Petenday, puˈ mpesuunen dinilan su ginukuman dinilan subay matay ilan di ndaˈi gikteben. Laak di kedengeg dun pasiˈ nu nga pegleguunen, melengasi Gempia Petenday, puˈ mekegbegay dinilan ketubuˈ ndaˈi tamanen. Taˈ mai mbantang megukit di Gempia Petenday? Meliang lai daan. ¹⁷ Laak naan, kanaˈu maaˈ nug lain megukit Gempia Petenday. Melaun ilan, su nga gitungan dun mendagang taluˈ nu Megbebayaˈ adun menelapiˈ ilan. Kagina suminuguˈ dinaan su Megbebayaˈ, pinluksadu teluˈay su Gempia Petenday di gedapan nu Megbebayaˈ di gempia delendeman, puˈ iinig bantang penggulaulaan nu pigwekilan ni Kristu.