¹ Maˈantu laung niu dun ba puˈ naan, megangyaˈ nau puliˈ? Subay duun bai sinulat keligenan ku paitaˈu diniu atawaka genat diniu paitaˈu dig lain getaw maaˈ dadema nug betad nu ngag lain mekpetuˈun? ² Ndiˈ na kambat, puˈ iini keligenan ku misulat di ginau, su kelingay niu ditu Megbebayaˈ. Misuunan nu nga getaw kia, mukaˈ mbasa nilani maaˈ nu keligenan ku saˈ pegipusipusen nilan su kesakup niu ditu Megbebayaˈ. ³ Gempantek dadema puˈ ki sulat kini, saˈitada, su kesakup niu diniin, si Kristui suminulat dun mukaˈ migwakil dun dinaan. Kanaˈ tintaˈi sinulat dun. Kanaˈ dadema gempapan batui sinulatanen dun, puˈ sinulatanen su ginaa kilawan pibian dig Balakat nu Megbebayaˈ ndaˈi gumulen.

⁴ Mitaluˈu ia puˈ siligan ku su Megbebayaˈ miksekat tu kesakupu dini Kristu. ⁵ Laak ndiˈu mangken puˈ mbantang mau di kegbaalu tu pibaal dinaan nu Megbebayaˈ. Genat tu Megbebayaˈ ki tinawan ku kini, ⁶ puˈ iini migbegay dinaan tinawan ku megukitu begu pasad di nga getaw. Kig begu pasad, kanaˈ nu sinulat Palinta, puˈ sikat tug Balakaten. Iini miwit nu sinulat Palinta, su kepatay nu kilawan, puˈ ndiˈ ta megaga dunutay. Dagid iinig begay nug Balakat nu Megbebayaˈ, su ketubuˈ ndaˈi tamanen.

⁷ Naa, su sinulat Palinta kia, begudiin kinulit di nga gempapan batu. Saanan meguglit dun, midayag pa pagid su tiag nu Megbebayaˈ. Dunut tumiag su muluˈ nu getaw bigayan ngag batu kinulitan, si Moises. Kagina mekesulaw su tiagen, ndaˈ megaga nu getaw Israel pengenlengay su muluˈ ni Moises, bisan pegalep su tiagen. Maˈantu midayag su tiag nu Megbebayaˈ su kegbegayen Palintanen meguit kepatay nu kilawan ndaˈi gikteben. ⁸ Laak dagid, su kegbegayen pasiˈ begu pasad, ki pasad pibianen tug Balakaten, gembagel pa duni tiagen. ⁹ Naa, melengas gupiai kegbegay nu Megbebayaˈ Palintanen begudiin di nga kilawan, puˈ mipeduma dun su tiagen, asa muit nu Palinta su kaukum di nga kilawan lagaˈ na ginaa. Labi pa melengasi kuleg nug Balakat nu Megbebayaˈ, saˈitada kig begu pasad, puˈ muiten su kemilangen tu nga kilawan mekesuun. ¹⁰ Mitaluˈu ia puˈ saˈ pinenggiˈ mesuˈat peguntain ta su tiag mipeduma di kepalinta nu Megbebayaˈ begudiin mukaˈ su kelengas nug begu pasad, maˈniin ndaˈi kelengasen su miuna. ¹¹ Puˈ saˈ melengas gupia su Palinta ndaˈ maiben meguit tu nga kilawan, labi pa melengasig begu pasad ndaˈi tamanen.

¹² Naa, kagina kiai pedetengen nami, kanaˈ ami mpiid dig baalen nami. ¹³ Kanaˈ dami dema maaˈ ni Moises, puˈ si Moises, subay tibunanen munsala su muluˈen, adun ndiˈ maitaˈ nu getaw Israel su kegegdus nu tiagen sampay mialep. ¹⁴ Su nga getaw Israel, ndaˈ nilan telimaˈay su metuud, puˈ metegasi gulu nilan. Sampay nandaw, saˈ besaan nilan su nga sinulat misulatan dig daan sabut, maˈniin mitebunanig delendeman nilan. Saˈ laak meksalabuuki getaw dini Kristu, mawaˈ da su maaˈ nu munsala dig delendemanen. ¹⁵ Nandaw, saˈ besaan nu getaw Israel su Palinta ni Moises, maˈniin mitebunan munsala sug delendeman nilan, kaas ndiˈ nilan mesabut. ¹⁶ Laak mesuˈat pukasen su munsala, saˈitada, mesabut nu getaw saˈ lumingay tu Kaunutan si Kristu, puˈ ndaˈ ba mesulat di Misulat Taluˈ nu Megbebayaˈ, “Pinukas ni Moises su munsala di muluˈen saˈ luminingay ditu Kaunutan.” ¹⁷ Naa, ki Kaunutan misulat ditu, iinig Balakat. Adin su getaw bigayan Balakat nu Kaunutan, iini piliu nug Balakat kiin dig launan migbalud dun. ¹⁸ Naa, maˈantu, launan ta, mekelingaw ita di ketiag nu Kaunutan, puˈ pinukas su munsala di muluˈ ta. Kaas puun tu tiag genat tu Kaunutan, sug Balakaten, pelinen ita niin di palas nu Kaunutan, saˈitada pegdugangdugangi keksama ta di gasalen gupia.