¹ Naa, ki pibaal dinami nu Megbebayaˈ, kagina su Megbebayaˈi mikpebaal dun dinami sekat tug lelaaten dinami, ndiˈ ami lumukas dun. ² Sinangkaliˈ bileng namiig launan penggulaulaan nami mekepiidpiid mukaˈig baalen nami gempia egluden. Kig baalen nami, ndaˈi maitaˈ dun limbung. Ndiˈ nami pa pagid pelinen su Gempia Petenday. Penluksaden nami pasiˈ teluˈay su metuud, adun pesanguˈ nami su kekesuun nami dig delendeman nu nga getaw mukaˈ di pegitaˈen nu Megbebayaˈ. ³ Naa saˈ mileglud su Gempia Petenday pegukiten nami, mileglud laak di nga getaw pekebeleng. ⁴ Puˈ su getaw pekebeleng, ndiˈ nilan petuuden su Gempia Petenday, puˈ sug diwata meguit dig lumbang kini nemun, su Palin, pidelemen sug delendeman nilan. Liningeden dinilan su tiag mekepedelag sia dinilan, su tiag puun tu Gempia Petenday mekatag di keglegawen dinita ni Kristu, su tantu palas nu Megbebayaˈ. ⁵ Kanaˈ mekatag dig lawas namii pegukiten nami, iin sungkini pegukiten nami puˈ si Isukristu, iini Kaunutan. Yami, mbaal ami sesuguˈen niu, adun pegbesaan si Isus. ⁶ Sug Diwata miktaluˈ begudiin puˈ subay dulag su tiag genat di medelem, iinen dadema su Megbebayaˈ mikpedelag di ginaa ta, adun mesuunan ta su kelengas nu pegbayaˈ nu Megbebayaˈ, puˈ maitaˈ gupia dini Kristu.

⁷ Naa, ki Gempia Petenday piukit dinami, maaˈ nu gaˈus, laak gaˈus bitang di gulen, puˈ piukit dinami nga kilawan laak, puˈ adun gempantek puˈ miksekat tu Megbebayaˈ su gembagel ginuung di Gempia Petenday kini. Kanaˈ miksekat dinami. ⁸ Saˈ maˈantu, yami, tatap ami peglegetay, laak ndiˈ ami maulakan. Taang dun melibuleng ami, laak ndiˈ nami ubaˈan. ⁹ Melauni kuminuntra dinami, laak ndiˈ ami mbelengan nu Megbebayaˈ, bisan mesaitan ami, ndiˈ ami mekaˈidan. ¹⁰ Gendawgendaw pektulakiti gumul nami maaˈ dadema nu kepatay ni Isus, adun maitaˈ di ketubuˈ nami gusay puˈ mitubuˈ na dadema si Isus pegabang dinami. ¹¹ Sampay matengi gumul nami, lelayun ami mesimpitay sabaˈ nu kedunut nami diniin, adun gempantek puˈ mitubuˈ puliˈ iin, puˈ maitaˈ ditu keglegawenen dig lawas nami gendawgendaw. ¹² Kaas pektulakiti gumul nami gebii gendaw, puˈ adun yamu pasiˈ, mpeduunan amu ketubuˈ ndaˈi tamanen.

¹³ Naa ndaˈ ba mesulat di Misulat Taluˈ nu Megbebayaˈ puˈ duuni miktaluˈ, “Kagina suminaligu ditu Megbebayaˈ, migukitu.” Naa, kagina suminalig dami dema diniin, ukiten nami su Gempia Petenday. ¹⁴ Puˈ misuunan nami gupia, petubuˈen ami puliˈ nu Megbebayaˈ, su mikpetubuˈ puliˈ dadema di Kaunutan ta si Isus. Petubuˈen ami niin puliˈ maaˈ nu kepetubuˈ puliˈ dini Isus, mukaˈ uiten ami niin, sampay yamu, ditu gedapanen. ¹⁵ Sug launanen kiai bigay nu Kaunutan kepia diniu, adun selian pegdugangi getaw mikebian di tulung nu Megbebayaˈ, megdugang dademai kekpaladpalad nu getaw ditu Megbebayaˈ adun megdedengeg iin gupia.

¹⁶ Maˈantu ita, ndiˈ ita lumukas megbaal tu pibaal dinita. Puˈ kig lawas ta, pia gumulanggulang mukaˈ lumubay, kig delendeman ta, gendawgendaw megisegi kesaligen mukaˈ sinuunanen mekatag di metuud. ¹⁷ Maikaˈ da mukaˈ ndiˈ maiben su kelegenay mbianan ta nemun. Sabaˈ nu kelegenay ta mbianan ta nemun, ditug binayaˈ gebii buˈ gendaw mpeduma ita di gasal nu Megbebayaˈ mukaˈ di kelengas nu pegbayaˈen ndaˈi tamanen. Ki kelegenay ta, ndiˈ mpeguntay ditu kepepia dinita di gendaw kiin. ¹⁸ Kanaˈ nu maitaˈ dinig lumbangi pektalentenan ta, puˈ pektalentenan ta sungkin su ndiˈ maitaˈ ditu gekbus langit, puˈ mpupus su maitaˈ, laak su ndiˈ maitaˈ, ndaˈi gikteben.