¹ Yamu nga getaw Galacia, metegas gupiai gulu niu! Pinluksadu na gupia ukitay diniu puˈ si Isukristu, pinatay ditu kurus, laak dagid duun masiˈi mikpetalin diniu tu metuud. ² Naa, saaken ku diniu, mikendutaˈ mai kedawat niu tug Balakat nu Megbebayaˈ? Miksekat ba di tegel niu dumunut tu Palinta, atawaka tu kedengeg niu di Gempia Petenday mekatag dini Isukristu, mukaˈ su kekpetuud niu diniin? Ndiˈ ba metuud, su kedengeg niu mukaˈ su kekpetuud niu? ³ Yamu nga metegasi gulunen! Saˈ mikpuun amu sumakup dini Kristu, pisalig niui kegawen diniu ditug Balakat nu Megbebayaˈ. Laak dagid nemun, iin na masiˈi seligan niu, su tegel niu dumunut tu Palinta! ⁴ Naa, su ngag launan mibianan niu sikat tu kesakup niu, mibulugan ba laak? Ndaˈ! ⁵ Begayan bamu nu Megbebayaˈ Balakaten mukaˈ pebaalen ba diniu su nga mekesalebuˈ ginuung sabaˈ nu tegel niu di kedunut niu tu Palinta, atawaka sabaˈ daan nu kedengeg niu di Gempia Petenday mukaˈ su kekpetuud niu diniin? Ndaˈig lain, su laak kekpetuud niu.

⁶ Naa pegdelendemen ta deliˈ si Abraham. Ndiˈ ba sinulat di Misulat Taluˈ nu Megbebayaˈ maˈniniˈ? “Si Abraham, mikpetuud ditu Megbebayaˈ, kaas pimilang nu Megbebayaˈ mekesuun sabaˈ nu kesaligen diniin.” ⁷ Kaas, subay mesuunan niu puˈ su nga getaw mekpetuud ditu Megbebayaˈ, ilani mpemilang tantu sapuˈ ni Abraham, sabayaˈ su nga mektegel dumunut tu Palinta. ⁸ Puˈ daan na sinulat di Misulat Taluˈ nu Megbebayaˈ puˈ su nga getaw kanaˈ getaw Judea, pemilangen nu Megbebayaˈ mekesuun meksekat tu kesalig nilan diniin. Ndiˈ ba daansamaˈ inukit nu Megbebayaˈ dini Abraham su Gempia Petenday maˈniniˈ? “Sug launan bansa getaw di tibuukan benwa, pepianan ku meksekat diniˈa.” ⁹ Kaas, kumalenged mikpetuud si Abraham ditu tinaluˈ nu Megbebayaˈ mukaˈ pipianan nu Megbebayaˈ, su ngag launan getaw mekpetuud ditu Megbebayaˈ, pepiananen maaˈ danu kepia dini Abraham.

¹⁰ Laak dagid, su nga getaw seligan nilan su tegel nilan dumunut tu Palinta adun megawen ilan, daan na inukuman nu Megbebayaˈ lagaˈ na ginaa. Ndaˈ ba sulat di Misulat Taluˈ nu Megbebayaˈ, “Adin su getaw ndiˈen gelaˈen petuuday su tibaˈan sinulat di Palinta, ukuman nu Megbebayaˈ lagaˈ na ginaanen.” ¹¹ Naa, gempantek ndaˈi getaw mpemilang nu Megbebayaˈ mekesuun meksekat tu tegelen dumunut tu Palinta. Gempantek, puˈ sinulat di Misulat Taluˈ nu Megbebayaˈ, “Adin su getaw pemilangen nu Megbebayaˈ mekesuun sabaˈ nu kesaligen diniin, malapen sug begu ketubuˈ.” ¹² Pidag pa tanan, su tegel nu getaw dumunut tu Palinta, ndaˈig labeten tu kesaligen, puˈ saˈ duun siai getaw megelaˈen dunutay su nga tibaˈan pinalinta, ndiˈen kambat seligan si Isukristu. Ndiˈ ba sinulat dadema di Misulat Taluˈ, “Adin su getaw, gelaˈenen dunutay su tibaˈan pinalinta nu Megbebayaˈ, malapeni ketubuˈ mikpuun ditu.”

¹³ Naa, si Kristu, kagina mibiananen na su ginukuman dinita nu Megbebayaˈ lagaˈ na ginaa saˈ minatay dia kurus, likat ita niin di ginukuman dinita miksekat tu kemilas ta tu Palinta. Ndaˈ ba mesulat di Misulat Taluˈen maˈniniˈ? “Adin su tinambed di pasek mukaˈ mikalempuyut dia, inukuman na nu Megbebayaˈ.” ¹⁴ Iini likat ita dun ni Kristu adun su nga kanaˈ getaw Judea, mesuˈat mpeduma nailan di kepia pinasad nu Megbebayaˈ begay tu sapuˈ ni Abraham nga getaw Judea. Mesuˈat sabaˈ nu kesalig nilan dini Kristu Isus. Iin dademai likat ita niin dun adun begayan ita Balakat nu Megbebayaˈ daan na pinasaden begayen dinita sabaˈ nu kesalig ta.

¹⁵ Naa Mingumpated, malap ita penenggiˈan dig betad kinilawan. Saˈ upama duunig duaˈ tawan mitakenaˈ su sabut nilan, dayun tinakesiˈan nilan su sinulat dun, ndaˈ dayuni mekelutas dun atawaka mekesumpat dun, ndiˈ ba? ¹⁶ Naa, su nga pinasad nu Megbebayaˈ mekatag di kepianen di getaw, pisadanen dun si Abraham mukaˈ su sapuˈen. Ndaˈ mesulat di sinulat kiin puˈ “pisadanen su nga sapuˈen,” guluganen melaun getaw. Iini misulat “su sapuˈen,” guluganen sala tawan laak, si Kristu. ¹⁷ Mendadi iini maˈananen, inisun nu Megbebayaˈ si Abraham mukaˈ pinasaden dun puˈ penuudenen su kelaun sabut nilan. Benaˈ minayani paat gatus buˈ telu puluˈ taun, duun pelumi pinalintanen ditu nga sapuˈ ni Abraham, getaw Israel. Laak su kepalintanen dun, daansamaˈ mitakenaˈ sug bekna pisabuten kia, kaas ndaˈ penguaˈay nu Palinta su sabut mukaˈ ndaˈ mbeleng dun su pinasaden. ¹⁸ Puˈ saˈ upama begayan nu Megbebayaˈ su nga getaw sabaˈ nu kedunut nilan tu Palintanen, kanaˈ sekat tu kepasaden, ndiˈ ba? Sinangkaliˈ pa tanan, iini bigayanen dun si Abraham, puˈ sabaˈ nu pinasaden.

¹⁹ Naa saˈ maˈantu, taˈ ma dayuni pinalinta dun nu Megbebayaˈ ditu nga getaw Israel? Iin, midugang ditu pinasaden su Palinta, adun gempantek na melaat gupia su kemilas nu nga getaw ditu Megbebayaˈ. Pigdelendem nu Megbebayaˈ puˈ su pinalintaneni megbayaˈ dinilan sampay mateng su sapuˈ ni Abraham pisadan nu Megbebayaˈ, si Kristu. Naa, su kepalinta nu Megbebayaˈ, pipalintanen di nga sesuguˈenen getaw langit. Duun dademai getaw, si Moises, maˈniin miglekagun ditu Megbebayaˈ mukaˈ tu nga getaw. ²⁰ Laak dagid, ndiˈ na kambat duuni meglekagun dun saˈ sala tawan laaki masad. Ki kepasad nu Megbebayaˈ, ndaˈi meglekagun dun, minandeng masad su Megbebayaˈ, salanen da.

²¹ Mendadi, iin bai guluganen ia, puˈ su Palinta, kumuntra di nga pinasad nu Megbebayaˈ? Ndiˈ mesuˈat, puˈ saˈ upama duuni pinalinta nu Megbebayaˈ pitenday di nga getaw, dayun saˈ medunutan nilan sia gelaˈ, begayan dayun ketubuˈ ndaˈi tamanen su tibaˈan getaw. Maˈantu mpemilang ilan sia nu Megbebayaˈ mekesuun meksekat tu kedunut nilan dun. ²² Sinangkaliˈ pa tanan, ndaˈ ba mesulat di Misulat Taluˈ nu Megbebayaˈ puˈ su tibaˈan getaw, binalud nug betad nilan mekesesalaˈ? Kaas gempantek, su nga mekpetuud dini Isukristu, ilani begayan ketubuˈ ndaˈi tamanen puun tu pinasad mukaˈ meksekat di kesalig nilan.

²³ Laak dagid su ndaˈ pa datengi gendaw pemilangen nu Megbebayaˈi getaw mekesuun meksekat di kesaligen diniin, maˈniin ita binalud, pinikutan ita lelayun nu Palinta. Ndaˈ ita mbeluy sampay biwasan na sug bian nu kesalig. ²⁴ Kaas, maˈniin migingat mukaˈ miktituluˈ dinita su Palinta sampay minateng si Kristu, adun saˈ mateng na, mpemilang ita nu Megbebayaˈ mekesuun sabaˈ nu kesalig ta dini Kristu. ²⁵ Naa nandaw, ki kesalig tai mpemilang nu Megbebayaˈ kekesuun ta, kaas kanaˈ na nu Palintai megingat mukaˈ mektituluˈ dinita.

²⁶ Maˈantu launan na niuig bataˈ nu Megbebayaˈ, sabaˈ nu kesalig niu ditug Bataˈen, launan niui miksalabuuk dini Kristu Isus. ²⁷ Mibunagan namu tubig sekat tu keksalabuuk niu dini Kristu, kaas mibaluy gasal niu su gasal ni Kristu. ²⁸ Kaas dema, ndaˈ nai pegbidaˈanen, ndiˈ na mpemilang saˈ getaw Judea saˈ su kanaˈ getaw Judea, saˈ gulipen, saˈ su kanaˈ gulipen, saˈ libun, saˈ sug laki, launan niui mesama sabaˈ nu keksalabuuk niu dini Kristu Isus. ²⁹ Mendadi, kagina piglegetawan namu ni Kristu, mibaal amu nga sapuˈ ni Abraham, kaas malap niu su ngag launan pinasad nu Megbebayaˈ begay tu nga sapuˈ ni Abraham.