¹ Naa, pebundasen ta sug yaga ta di sinulatu kini. Pinenggiˈ ki gembataˈ petengedan nu pusakaˈ nu gamaˈen. Saˈ mbataˈ pa, mesama di gulipen, pia iin siai gapuˈ nug launan pimetang sampay lupaˈ. ² Su saanan kaikaˈayen, duuni getaw metenduˈ megingat diniin mukaˈ duun dademai getaw metenduˈ megbayaˈ dig launan gimunen sampay di gendaw tenduˈen nu gamaˈen iin pemusekaˈan. ³ Naa ita, maˈniin daita dema, puˈ begudiin, su ndaˈ ta pa mesabut su metuud, saˈitada, maˈniin ita gembataˈ pa di kesabut ta tu metuud, gulipen ita nu nga ndiˈ maitaˈ meguit di nga kilawan. ⁴ Laak dagid, benaˈ minateng nai gendaw daan na tinduˈ nu Megbebayaˈ, sinuguˈ nu Megbebayaˈ sug Bataˈen lumusad dinig lumbang. Kig Bataˈen, benaˈ midini, pigbataˈ nu ginaˈen kilawan, mukaˈ mibagel dig dialem gengkeman nu Palinta nu nga getaw Judea. ⁵ Miginetaw Judea iin, puˈ adun lekatenen su nga pigbiaˈan nu Palinta, adun mbaal ita bataˈ nu Megbebayaˈ, launan ta.

⁶ Mukaˈ kig Balakat nug Bataˈen, sinuguˈ dadema iin nu Megbebayaˈ megbenwa dig delendeman ta, puˈ adun pepentekenen dig delendeman niu puˈ binataˈ amu nu Megbebayaˈ, kig Balakaten miktaluˈ tu Megbebayaˈ, “Amaˈ, Gamaˈ nami.” ⁷ Maˈantu diadia, kanaˈa na gulipen, puˈ bataˈa niin. Mukaˈ pa padun, kagina bataˈa niin, begayan ka pa nu Megbebayaˈ launan daan na pingandamen begayen tu ngag bataˈen.

⁸ Naa yamu, begudiin ndaˈ niu pa sembatay su Megbebayaˈ mukaˈ ndaˈ niu iin pegbesaay, kaas gulipen pamu nu nga sagya diwata. ⁹ Laak dagid nemun, suminambat namu tu Megbebayaˈ. Mukaˈ labi pa, puˈ suminambat su Megbebayaˈ diniu! Naa asal maˈantu, mauma dema luminingay amu puliˈ ditu nga ndiˈ maitaˈ meguit tug dibabaw lumbang, su ndaˈig balakaten mukaˈ pegbayaˈen? Mauma dema mauyaˈan niu mengulipen ilan diniu puliˈ? ¹⁰ Pegbesaan niui nga gendaw. Sug duma gendaw, pegbesaan niu bulanbulan, sug duma saˈ su masanen, sug duma tauntaun! ¹¹ Mipatiˈu melibuleng diniu. Metuud ba ndaˈi gatagen su tibaˈan pinggulaulau gabang diniu?

¹² Uu Mingumpated, penengiin ku diniu, penunggilingay na niau. Ndiˈ namu mekpebalud ditu Palinta. Ndiˈ ba metuud mingmaˈniin dau dema diniu, puˈ kanaˈ na Palintai megbayaˈ dinaan? Metuud lai. Naa begudiin, ndaˈ niau pelaatay, segaga tinagikul niau gupia. ¹³ Medelendem niu puˈ sug bekna, iini mikelakayu dun megukitu diniu Gempia Petenday puˈ sabaˈ migladuu sinegayu dia niu. ¹⁴ Pia milegenan amu dun sug leduun ku, ndaˈ niau peksudiˈay, ndaˈ niau pemilasay. Sinangkaliˈ pa tanan, pinembaˈ niau, maˈniin nu kenembaˈ niu sia di sesuguˈen nu Megbebayaˈ getaw langit, maˈniin nu kenembaˈ niu sia dini Kristu Isus. ¹⁵ Naa begudiin, liliag amu gupia. Taˈ ma, mauma dema kanaˈ namu leliagen? Taluˈu diniu, saˈ sia misuˈat, pia su nga mata niu, pisuk niu sia adun bigayan niau dun sia, sabaˈ nug lelaat niu dinaan begudiin. ¹⁶ Mendadi nemun, pemilangen ba niau pelum kuntra niu puˈ sabaˈ pinluksadu teluˈay diniu su metuud?

¹⁷ Naa su ngag duma getaw kia mekpalin di Gempia Petenday, tagikulen amu nilan gupia, dagid su ketagikul nilan dun diniu, melaat. Iini tantu mauyaˈan nilan, teliudan niau, adun tagikulen niu ilan, mesama di ketagikul nilan diniu. ¹⁸ Melengas da mekpetagikuli getaw di ngag dumanen saˈ laak gempia dai mekpetagikul dun, ndiˈ ba? Metuud da gusay, kaas tagikulen ku amu, pia ndaˈu dia niu. ¹⁹ Yamu ngag lepeng bataˈu petailen ku gupia, milegenan nau puliˈ, maˈniin da nug libun pegbataˈ saananen mesaitan gupia. Taluˈu diniu melegenan pau gusay sampay di gendaw mengganget dig delendeman niu sug delendeman ni Kristu. ²⁰ Mauyaˈan ku gupia dia nau niu sia nandaw, adun pesuun ku diniu di tingegu gupia puˈ gempia dai ginau diniu, kaliˈ buus laung niu dun melaati ginau diniu, sabaˈ nu pinluksadu teluˈay diniu kini. Melibulengu diniu gupia.

²¹ Naa, yamu nga mauyaˈanen pegbiaˈan ditu Palinta adun mekalap amu sia ketubuˈ, duuni saaken ku diniu. Ndaˈ ba niu pektalentenay su misulat di Palinta? ²² Misulat dia puˈ si Abraham, duunig duaˈ tawan bataˈen, lumbus laki. Su sala, ginaˈen su gulipen nu tunayan ni Abraham, si Agar. Ki sala pelum, ginaˈen su tunayan, kanaˈ gulipen, si Sara. ²³ Naa sug bataˈ nu gulipen, kegigetawen, maaˈ da nu kegigetaw nu nga kilawan. Dagid ki kegigetaw nug bataˈ nu kanaˈ gulipen, iini mipenggulaula dun, puˈ minuud su pinasad nu Megbebayaˈ di nga mekegulangen. ²⁴ Naa ki ngag libun kini, malap ta dia penenggiˈan dig duaˈ buuk sabut nu Megbebayaˈ. Ki sala sabut, damikian dun si Agar, puˈ pinalinta nu Megbebayaˈ ditu ni Moises diag bentud Sinai. Su ngag bataˈ ni Agar, su kegigetaw nilan, daan nailan gulipen, mesama di ngag launan getaw pegbiaˈan nu Palinta. ²⁵ Si Agar, damikian dadema dig bentud kiin Sinai diag benwa Arabia tandaˈ pinalintaan nu Megbebayaˈ su getaw. Damikian pa padun di syudad Jerusalem nemun, puˈ miulipeni syudad kia sampay su nga kelaun getaw dun, miulipen nu Palinta. ²⁶ Dagid su Jerusalem ndiˈ maitaˈ puˈ gasalen genat tu gekbus langit, damikian dun si Sara, puˈ kanaˈ gulipen, kaas iini ginaˈ nug launan ta nga suminalig dini Kristu. Saˈitada sug bekna sabut, su pinasad nu Megbebayaˈ dini Abraham, damikian dun si Sara. ²⁷ Ndiˈ ba sinulat di Misulat Taluˈ nu Megbebayaˈ maˈniniˈ?

²⁸ Naa, yamu kepetedan ku, bataˈ namu nu Megbebayaˈ miksekat tu pinasaden maaˈ dadema ni Isaac. Puˈ iin, miksekat su kegigetawen di pinasad nu Megbebayaˈ ditu gamaˈen si Abraham. ²⁹ Dengantu, kig bataˈ ni Abraham miksekat tug Balakat nu Megbebayaˈ su kegigetawen, ndaˈ ba peglegetay nu sala bataˈ ni Abraham, kinilawan laaki kegigetawen? Naa, mesama da nemun, ita, peglegetan naita dema nu nga gulipen nu Palinta. ³⁰ Sinangkaliˈ pa tanan, ndaˈ ba mesulat di Misulat Taluˈ maˈniniˈ? “Kig libun kiin gulipen, pengutiday mu ilan nug bataˈen, puˈ kig bataˈen kiin, ndiˈ mpeduma pusekaˈay nug bataˈ nug libun kanaˈ gulipen.” ³¹ Kaas, yamu kepetedan ku, kanaˈ ita nug bataˈ nug libun gulipen nu kedunut tu Palinta, segaga bataˈ ita nug libun kanaˈ gulipen.