¹ Naa Mingumpated, yamu nu ngag bigayan na Balakat nu Megbebayaˈ, saˈ upama duunig duma niu misuunan na niu puˈ gempeleget, peseksuden niu iin, pepeksikesuunen niu, laak dagid pengmayaˈmayaˈ niu tituluˈay. Mukaˈ peglengilamay niu, kalukalu buus pegdaangan damu dema. ² Kaas, pektinebangay amu di nga kelegenay niu, puˈ saˈ maˈantu, medunutan niu gupia su palinta ni Kristu. ³ Saˈ duun diniuig duma laungen dun iini metaas diniu, asa ndaiˈ ketendananen, melimbunganenig lawasen. ⁴ Diadia, subay peksimaˈeneni pigbetaden. Saˈ melengas, leliagen dun dayun sug daniin pigbetad mukaˈ kanaˈ sekat tu ketanggiˈen tu pigbetad nug dumanen. ⁵ Puˈ ndiˈ ba metuud, saladuaˈ subay ketendananen sug daniin pigbetad?

⁶ Laak su petuˈunan taluˈ nu Megbebayaˈ, subay emutanen su mekpetuˈun dun puun tu gempia mialapen.

⁷ Naa, ndiˈ niu peglimbungayig lawas niu, puˈ ndaˈi getaw megaganen pegekalay su Megbebayaˈ. Sengkuˈaneni getaw lepeng gupia tu pimulanen. Saˈitada, pia taˈ alanduni penggulaulaan nu getaw, lepeng gupiai sugda dun ditu gendaw pegindeg ditu gedapan nu Megbebayaˈ. ⁸ Saˈ penggulaulaan nu getaw su gayaken puun tu kekilawanen, iinig lepeng sugda dun, ndiˈ mengiktebi kepatayen. Saˈ penggulaulaanen sungkin su mauyaˈan nug Balakat nu Megbebayaˈ, iini malapen, su ketubuˈen ndaˈi tamanen. ⁹ Kaas ndiˈ ta mpia lukasan penggulaulaay su melengas, puˈ saˈ ndiˈ ta lukasan, duuni gendaw mateng, sengkuˈan ita gupia, saˈitada malap ta gupia su ginandam daan nu Megbebayaˈ gempia sugda dinita. ¹⁰ Kaas dema, saˈ duuni sikawan ta, gempia ta peksibaˈan su nga samataw ta, labi na su nga samasakup ta dini Kristu.

¹¹ Naa, naan dai suminulat dun ini, bentayay pa daan niu, gembagel gupiai ngag letra sinulatu, kaas mailala niu puˈ piksulat duni kemetu. ¹² Ki ngag duma niu tegelen amu nilan mekpesirkunsisu amu, meliag ilan mekpaitaˈitaˈ di nga getaw mukaˈ mauyaˈan nilan mengangyaˈ. Laak iini pinggulaula nilan dun adun ndiˈ ilan peglegetan sabaˈ nu kekpetuud mukaˈ kedunut nilan dini Kristu su minatay dia kurus. ¹³ Pia su nga mituˈusan na, ndiˈ nilan megaga dunutay su Palinta, laak mauyaˈan nilan metuˈusan amu, adun pengangyaˈ nilan su kekpetuud niu dig betad nilan mektamuy. ¹⁴ Sinangkaliˈ pa tanan, danaan kini, iin laaki pegangyaˈu su kepatay nu Kaunutan ta si Isukristu dia kurus. Puˈ puun tu kepatayen dia kurus, sug betad kekinilawan sampay su ngag launan gayak, ndaˈi gatagen dinaan, mukaˈ naan, ndiˈ nau meliag dun. ¹⁵ Mendadi, saˈ metuˈusani getaw puˈ getaw Judea, saˈ ndiˈ, ndaˈig labeten tu keglegawen dinita nu Megbebayaˈ. Iin sungkin gembageli pantagen, saˈ binaal ita nu Megbebayaˈ begu bitang. ¹⁶ Yamu nga mikpetuud puˈ binaal naita nu Megbebayaˈ begu bitang kaas nga piglegetawan namu niin, sampay su nga getaw Judea suminakup dadema tantu ditu Megbebayaˈ, penenebian ku amu, begayan amu niin gelaˈ gempia ginaa mukaˈ pebianan amu niin lelaaten gebii gendaw.

¹⁷ Naa katapusan taluˈu diniu, subay ndaˈi getaw megleget dinaan puˈ kanaˈu daw peneligan ni Kristu, puˈ maitaˈ di nga paliˈ dini na lawasu puˈ naani sesuguˈen ni Isus.

¹⁸ Naa Mingumpated, penenebiin ku tu Kaunutan si Isukristu, begayan amu niin tulungen gebii gendaw.

Daal daitu. Pablo