¹ Naa mendadi, biluy naita ni Kristu di kedunut ta tu Palinta, adun kanaˈ naita gulipen nu Palinta. Kaas, pekpetubud amu gupia, ndiˈ niu begay duuni mengulipen diniu puliˈ tu kedunut tu Palinta.

² Naa, yamu, pektalentenay niu ini. Duun diniui suminalig na ditug betad nu nga getaw Judea adun megawen ilan, kaas mekpesirkunsisu amu. Naan si Pablu, taluˈu diniu saˈ metuˈusan amu maˈnia, guluganen, ndaˈi gatagen diniu su pinggulaula ni Kristu. ³ Pegadu na puliˈ teluˈay diniu, adin su getaw mauyaˈanen metuˈusan adun meginetaw getaw Judea, naa subay gelaˈenen dunutay su tibuuk Palinta. ⁴ Yamu nga getaw mekpemilang amu sia tu Megbebayaˈ mekesuun amu sekat tu kedunut niu tu Palinta, sinangkaliˈ pa tanan, pisuay niuig lawas niu dini Kristu mukaˈ tiliudan niu su tinulung sia diniu nu Megbebayaˈ. ⁵ Yami pelum, iini pedetengen nami gupia, pemilangen ami nu Megbebayaˈ mekesuun. Mukaˈ sabaˈ nu ginuung nug Balakat nu Megbebayaˈ pebian tu kesalig nami diniin, leliagen ami saanan nami megelat di kemilangen dun dinami. ⁶ Puˈ misuunan nami, saˈ meksalabuuk naita dini Kristu Isus, mesama da saˈ metuˈusan ita getaw Judea saˈ kanaˈ, ndaˈig labeten tu kegawen ta. Iin sungkin gembageli pantagen su kesalig ta mekpalas di petailan ta di nga samataw ta.

⁷ Naa yamu, begudiin melengasi kedunut niu tu metuud puun tu keksalabuuk niu dini Kristu. Dagid duun na masiˈi getaw mikpetalin diniu tu kedunut niu tu metuud. Taˈ mai gelalen iin? ⁸ Ki kengmetuuden diniu, kanaˈ puun tu Megbebayaˈ su migenggat diniu sumalig amu dun. ⁹ Kaas peglengilam amu, puˈ pia maikaˈi ketalin niu, ndiˈ maiben meseled dig delendeman niu. Ndiˈ ba peneluˈen, laung, “Saˈ duuni maikaˈ petulin pan melamug di pan, ndiˈ maiben tumulini tibuuk pan.” ¹⁰ Pia maˈantu, naan, mituudanu dun puˈ ndaˈ pa niu teliuday su metuud tinituluˈu diniu. Mukaˈ dema sabaˈ nu keksalabuuk ta ditu Kaunutan ta, suminaligu puˈ ndaˈig lain sinanguˈ niu. Suminalig dau dema puˈ su getaw mekpeduaˈduaˈ sia dig delendeman niu, pelebuˈan iin nu Megbebayaˈ.

¹¹ Laak dagid uu Mingumpated, naan kini, saˈ metuud megukit pau daw subay tuˈusani getaw adun megawen daw, taˈ mai piglegetan pau dun? Saˈ sia metuud ia, ki kegukitu di kepatay ni Kristu dia kurus, kanaˈ sia mesamuk amu dun. ¹² Uy, mauyaˈan ku sia, ki nga mekpeduaˈduaˈ dig delendeman niu, ndiˈ nilan sirkunsisuun laakig lawas nilan, melengas sia, tebiaˈ, pekapun nilan dademai tibuuk lawas nilan!

¹³ Naa yamu pa pagid, Mingumpated, inggat namu tuˈu nu Megbebayaˈ, adun beluyen amu niin dig launan migbalud diniu. Kagina biluy namu, ndiˈ niu mpia pesikaun su gayak niu mekegbayaˈ di ginaa niu sampay di pegbetaden niu. Segaga, kagina dinawat na niu su kepetail nu Megbebayaˈ, gempia namu mektinebangay puun tug linelaatay niu. ¹⁴ Puˈ ndiˈ ba mitingeb su tibuuk Palinta di sektaang taluˈ kini, “Petail mu dadema sug duma mu. Su kepetail mu diniin, pelepeng mu di kepetail mu dig lawas mu?” Mitingeb lai daan! ¹⁵ Laak dagid, saˈ meksinualay amu mukaˈ mekagaw tindeg amu, maˈniin amu nu malig metetubuˈ megegebutay mukaˈ megdedepaˈay amu, naa peglengilam amu, puˈ buus metulagi keksalabuuk niu gupia.

¹⁶ Kaas, pektalentenay niu ini. Kig Balakat nu Megbebayaˈ, pekpetuud amu diniin, buangen niu iin megbayaˈ dig delendeman niu mukaˈ di pegbetaden niu. Ndiˈ niu dayun dunutani melaat gayak nu kekinilawan niu. ¹⁷ Puˈ su mauyaˈan nu kekinilawan tai memilas lelayun tu mauyaˈan nug Balakat nu Megbebayaˈ. Kig Balakat, kumuntra dadema lelayun di mauyaˈan kinilawan. Kagina miglelekuntra ilan duaˈ, ndiˈ niu mpenggulaula su mauyaˈan niu penggulaulaay. ¹⁸ Kaas saˈ iini megagak diniu lelayun sug Balakat nu Megbebayaˈ, kanaˈ nu Palintai megbayaˈ diniu.

¹⁹ Naa kig betad nu kekinilawan ta, gempantek gupia, ndiˈ ba? Maˈniinig betad nu nga getaw megbayaˈ pa dinilan su gayak nu kinilawan, megdusa, menggulaula mekepiidpiid sampay menlelaug. ²⁰ Mektamuy dailan dema di ngag ledawan nu sagya diwata, mensaled ilan, meksininaay ilan, meksesualay ilan, mengimbegu ilan, meglipunget ilan sampay meglelebaway ilan. Meksesuayay ilan pa pagid, ndiˈ ilan meksalabuuk, ²¹ meksesigiay ilan, megbebulek ilan, meglekebibu ilan sampay ndaiˈ taman nug dupangan nilan, mukaˈ penggulaulaan nilanig lain gulaula maˈniai kelaaten. Laak yamu, pegadan ku amu puliˈ maaˈ danug daansamaˈ pigadu diniu, adin su menggulaula maˈnia kia, ndiˈ mekesakup tu Keglekaunutan nu Megbebayaˈ.

²² Iin sungkini pegbetaden nu getaw megbayaˈ dun sug Balakat nu Megbebayaˈ. Mekpetail di nga samatawen, leliagen lelayun, mekpeseksud di ngag duma, mektigel lelayun di kelegenayen mukaˈ kepeleget dun, melilelaaten, mekesuun gupia, meseligan tantu, ²³ mesumayaˈ, sampay metau megbenaˈbenaˈ di gayaken. Ki pegbetaden kia, ndaˈ benduay nu Palinta. ²⁴ Mukaˈ pa padun, su nga sakup ni Kristu Isus, pimalaw na nilan su kekinilawan nilan kampuˈ nu ngag launan melaat gayak, maˈniin linansang nilan sug daan lawas nilan ditu kurus. ²⁵ Naa, kagina bigayan ita nug Balakat nu Megbebayaˈ ketubuˈ ndaˈi tamanen, subay pepegbayaˈ ta dadema diniin su pegbetaden ta. ²⁶ Kaas subay ndiˈ ita mekpelabawlabaw, ndiˈ dadema ita melisualen mukaˈ ndiˈ ita megegimbeguay.