¹ Kaas uu Mingumpated, taluˈu diniu, maˈantu petindeg niu gusay su kekpetuud ta ditu Kaunutan. Petailen ku amu gupia, mibugaˈu diniu. Kig leliagu, mikpuun diniu. Pegangyaˈu amu.

² Naa mendadi, yaˈa Euodia mukaˈ yaˈa Sintique, penengiin ku diniu duaˈ, peksalabuuk amu, puˈ mimated amu puun di keksalabuuk niu ditu Kaunutan. ³ Yaˈa dema, meseligan limbangu, ebangay mu ilan duaˈ megeksud, ki ngag libun kia, puˈ minamal ilan megabang dinaan meksigwag tu Gempia Petenday, sampay si Clemente mukaˈ su ngag duma limbangu. Misulat dademai nga ngalan nug launan nilan tandaˈ sulaten nu Megbebayaˈ su nga ngalan nu nga mipeduma na di ketubuˈ ndaˈi tamanen.

⁴ Subay penleliagen amu lelayun sabaˈ nu keksalabuuk niu ditu Kaunutan. Puliˈan ku da teluˈay, penleliagay damu gusay.

⁵ Naa ki mesumayaˈ betad niu, pailala niu di tibaˈan getaw, puˈ sungu metuaˈ dini puliˈ su Kaunutan. ⁶ Naa bisan taˈ alanduni kelibuleng niu sia, ndiˈ amu melibuleng dun, segaga penenabi amu, saak niu ditu Megbebayaˈ su tibaˈan kulang niu. Laak saˈ menenabi amu, lamug niu dun su kekpaladpalad niu tu Megbebayaˈ. ⁷ Maˈantu penendingan dayun nu kelinaw su ginaa niu sampay delendeman niu, puun tu keksalabuuk niu dini Kristu Isus. Ki kelinaw kini, pigenatanen su Megbebayaˈ, su kelinaw ndiˈ mesabut nu getaw tampusan metaasi sinuunanen.

⁸ Taman taluˈu diniu, Mingumpated, iini pegdelendem niu, su mekesuun, su mbantang pegbesaan, saˈitada adin su metuud, adin su gempia enalen, adin su gempia, adin su ndaˈi melamug dun melaat, adin su tigdu melengas, sampay adin su gembasa. ⁹ Mukaˈ adin su misimet niu dinaan di nga pinggulaulau mukaˈ tinaluˈu, penunggilingay niu lelayun. Megduma diniu pa padun su Megbebayaˈ, su megbegay dinita pianan ginaa.

¹⁰ Naa, saˈ su ginabang niu dinaan puliˈ, kagina suminalabuuku ditu Kaunutan, liliagu dun gupia. Misuunan ku, iini miniben na ndaˈ niau ebangay, puˈ ndaˈi sikaw niu dun, kanaˈ nu ndaˈ niau tagikulay. Puˈ misuunan ku dadema puˈ melelaat amu dinaan lelayun. ¹¹ Kanaˈ iini sinulatu dun ia puˈ duuni kulangu, segaga miglegintawu puˈ adin su kebetang ku, sukal dinaan. ¹² Mibianan ku su kepaiten, mibianan ku dadema su kemisen. Kaas, pia taˈ alanduni kebetangu, saˈ mibesugu saˈ miglelegutemu, saˈ medatuˈu saˈ gempusuku, miglegintawu puˈ sukal dinaan. ¹³ Kagina bigayanu ni Kristu ginuung, ndaˈiduni ndiˈu megaga di tibaˈan mbianan ku.

¹⁴ Laak pia maˈantu, gempia pigebangan niau di nga kelegenayu. ¹⁵ Pidag pa tanan, yamu nga getaw Filipos, misuunan niu gupia puˈ su kepalusu diag benwa Macedonia, ndaˈig lain migabang dinaan, yamu laak. Sug beknau pa pegukit tu Gempia Petenday, su pikumpungan niu laaki miglegamut dinaan. ¹⁶ Pia sug ditu pau lunsud Tesalonica, duuni piwit niu dinaan ginabang. Mukaˈ kanaˈ laak mainsan. ¹⁷ Kanaˈ iin laaki mauyaˈan ku, begayan niau ginabang, segaga mauyaˈan ku megdugangi sugda diniu nu Megbebayaˈ sabaˈ nu gabang niu. ¹⁸ Kaas, kini naig keligenan niu ditug launan bigay niu dinaan mbaal takesiˈ dun, puˈ sukal ma, mukaˈ miglabi pa padun. Kagina iwit na dinaan ni Epafrodito sug lumaun bigay niu, ndaˈ nai kulang ku, bisan maikaˈ. Kig bigay niu kini, maaˈ nu memut betang pengilak tu Megbebayaˈ, medawaten mukaˈ leliagen dun iin. ¹⁹ Mukaˈ adin pa pagidi kulang niu, begayan amu dun nu Megbebayaˈ meksekat di melengas gaˈusen pebian dini Kristu Isus. ²⁰ Naa su Gamaˈ ta Megbebayaˈ, gempia ta pegdedengegen mukaˈ pegbesaan di ndaˈi tamanen! Amen.

²¹ Naa, saˈ mesuˈat, sambay niau dig launan piglegetawan nu Megbebayaˈ suminakup dini Kristu Isus ditu niu. Simbayan damu dema nu kepetedan niu dini. ²² Sampay sug launan piglegetawan nu Megbebayaˈ dini, simbayan amu nilan, labi na saˈ su nga samasakup ta sesuguˈen nu tampusan gadiˈ si Cesar.

²³ Naa, tigaˈwan, penenebiin ku begayan amu lelayun nu Kaunutan ta si Isukristu nu tulungen.

Daal daitu. Pablo