¹ Naa Mingumpated, duun pa sala teluˈen ku diniu. Subay leliagen amu dun su keksalabuuk niu ditu Kaunutan. Pia pa puliˈan ku sulatay sug daansamaˈ piwitu diniu, puˈ penending tu kekpetuud niu. ² Duuni nga mekpetuˈun melaat, puˈ mektituluˈ ilan subay mekpesirkunsisu daw su sumakup.^a Naa, peglengilamay niu ilan. ³ Puˈ ilan kia, kanaˈ ilan tantu sakup nu Megbebayaˈ. Laak dagid ita, sakup ita niin tuˈu. Kagina mektamuy ita diniin pebian dig Balakat nu Megbebayaˈ, pinleliag ita dun su keksalabuuk ta dini Kristu Isus, mukaˈ ndiˈ ta seligan sug betad kinilawan, maaˈ danug betad keksirkunsisu kia. ⁴ Laak naan kini, mesuˈat seligan ku dadema sia sug betad kinilawan maˈantu. Saˈ upama duunig duma mekesalig dig betad kinilawan, labi pa naan. ⁵ Su kesirkunsisu dinaan, dinunutan gupia nu nga mekegulangu sug betad, puˈ genat tu kegigetawu, su kewalu endawen, pisirkunsisuu nilan. Keduaˈen, getaw Israel mau, sapuˈ ni Benjamin, gasalu getaw Hebreo, ndaˈig bangiˈ di nga ginepuˈayu. Mukaˈ genat tu kaikaˈayu, dinunutan ku gusay su Palinta maaˈ danug betad nu nga Pariseo.^{b 6} Kagina mipenemalan ku dunutayig betad Pariseo, piglegetan ku su nga pikumpungan nu nga sakup ni Kristu. Saˈ sug betad munut tu Palinta adun mekesuun, paa, ndaˈi getaw labaw dinaan, ndiˈu medangat, dinunutan ku gelaˈ. ⁷ Laak dagid, adin sug daansamaˈ pimilangu gembagel gatagen, pemilangen ku na ndaˈi gatagen sabaˈ nu kesambatu dini Kristu. ⁸ Pidag pa tanan, ki kesambatu dini Kristu Isus su Kaunutan ku, kagina ndaˈig labaw dun su gatagen, pimilangu na sug lain, ndaˈi gatagen. Saˈitada, mibeleng dinaanig lain, mukaˈ pemilangen ku ki tibaˈanen kia gekput, adun medawatu sungkin si Kristu ⁹ mukaˈ sumalabuuku diniin gupia. Kaas, ndiˈ nau mpemilang mekesuun puun tu kedunutu tu Palinta, segaga mipemilangu mekesuun pibian di kesaligu dini Kristu, ki kekesuun pigenatanen su Megbebayaˈ mukaˈ puun tu kesalig nu getaw. ¹⁰ Daal dai mauyaˈan ku, sumambatu dini Kristu mukaˈ mbianan ku su ginuungen puun tu ketubuˈen puliˈ. Mauyaˈan ku dadema meksaliunungu di nga kelegenayen sampay pemilangen ku minatay naig daan betadu. ¹¹ Kiin, adun saˈ mesuˈat, mpetubuˈ dau puliˈ.

¹² Laak dagid pia maˈantu, ki sinulatu kia, ndiˈu engkenen puˈ migelaˈu na melaam. Ndiˈu dadema teluˈen puˈ mingganget na gupia su kekesuun ku. Segaga penemalan ku penggulaulaay su gikteb nu megagau, adun mekpalasi kesakupu dini Kristu Isus mikpuun di ginagaken dinaan. ¹³ Kanaˈu delendeman, uu Mingumpated, puˈ milaamu na, laak selingawan ku sug ditug binayaˈ, saˈitada su mibianan ku na, situgesan ku gusay elapay sug di gunaan, saˈitada su mauyaˈan nu Megbebayaˈ penggulaulaan ku. ¹⁴ Kaas, maˈniin menandengu gubek ditu gengayan meglumbaˈ, adun malapu su primyu. Iini inggatu dun nug Megbebayaˈ, malapu ki primyu kia, su kesalau ditu Megbebayaˈ megbenwa ditu gekbus langit, sekat di keksalabuuku dini Kristu Isus.

¹⁵ Naa saˈ maˈantu, adin dinita su meligen nai kesaligen, subay pesemaanen sug delendemanen mukaˈ ginaanen dig danaan kini. Laak dagid, saˈ upama duunig duma ta salaig delendemanen, pepenteken pa diniin nu Megbebayaˈ su metuud. ¹⁶ Pia da, basta laak petuuden ta su gikteb nu sinuunan ta pa nandaw.

¹⁷ Mendadi Mingumpated, penunggilingay niau gusay, launan niu, puˈ binaaluig lawasu gempia lendasan. Subay pektalentenan niu dadema su nga getaw minunggiling dun. ¹⁸ Naa, iini tatapu teluˈay diniu. Melauni samasakup ta, saˈ peksimeten ta su pigbetad nilan, gempantek pimilas nilan su kekpetuud ta puun tu kepatay ni Kristu ditu kurus. Kagina subay puliˈan ku teluˈay, maubaˈu. ¹⁹ Iini sugda dinilan, mekauliˈ ilan ditug linaw gapuy, puˈ biwang nilan megbayaˈ di kekpetuud nilan su melaat gayak nilan. Pingangyaˈ nilan pa pagid su mbantang mpiid ilan dun, mukaˈ pektalentenan nilan laak su melaat betad kinilawan. ²⁰ Ita kini pasiˈ, nandaw sakup ita nu gekbus langit. Pekpelaban ta gupia mpuliˈ dini genat ditu su Meglegawen dinita, su Kaunutan ta si Isukristu. ²¹ Saˈ metuaˈ nain, kig lawas ta, betaden melubay mukaˈ gasalen matay, pelinenen dig lawas maaˈ nug daniin, ginuungan mukaˈ melengasi pegbayaˈen. Pelinenen puun tu ginuungen mekegbayaˈ di gekleb langit buˈ lupaˈ.