¹ Maˈantu, pesuun ku diniu puˈ mektegelu di kengimbaalu, adun mebangan ku amu mukaˈ su nga sakup diag lunsud Laodicea, sampay sug launan sakup ndaˈ siben mekaitaˈ dinaan. ² Iini mektegelu dun, puˈ adun meligeni kesalig niu gelaˈ meksekat tu keksalabuuk niu, ki mekpuun pelum tu kekpinetailay niu. Mektegel dau dun dema puˈ adun niu mesabut gelaˈ mukaˈ mesuunan niu tantu kig daansamaˈ pigbuni nu Megbebayaˈ, saˈitada kig biwasan na mekatag dini Kristu. ³ Puˈ si Kristu, mekpesabut diniu launan tinawan mukaˈ sinuunan, maaˈ nu gunsiˈ pekpukaˈ di pingegludan nug launan gaˈus nu Megbebayaˈ.

⁴ Kiin, tinaluˈu dun diniu adun ndiˈ niu begay limbungan namu nu nga metau gupia membaalbaal, pia melengas gupiaig yaga nilan. ⁵ Puˈ pia kini dau melayuˈ, tagikulen ku amu gupia. Liliag dau dun dema, puˈ midengegu miksalabuuk amu tantu mukaˈ mitembusan niu su kesalig niu dini Kristu.

⁶ Kaas yamu, subay pebentangen niuig betad niu di getaw suminalabuuk na dini Kristu Isus, puˈ dinawat niu iin Kaunutan niu. ⁷ Baal niu lendasan niuig betad gayu, meksidalemi gangeten adun tumulin. Pengmaˈnia damu dema, penggengeten niu dig delendeman niu sug bekna tinituluˈ diniu ni Epafras mekatag dini Kristu. Pegisegay niu duni kekpetuud niu, mukaˈ penemalay niu pekpeladpeladay su Megbebayaˈ.

⁸ Naa peglengilam amu, tekaw duuni mekpalin dig delendeman niu pebian di tinawan kinilawan mukaˈ pebian di pimbaalbaal tituluˈan ndaˈi gatagen, adun pegbiaˈan amu dayun. Kiin, puun laak tug betad kinilawan pingumbilin di nga getaw mukaˈ puun tu nga ndiˈ maitaˈ melaatig betaden, kanaˈ puun tu metuud mekatag dini Kristu. ⁹ Puˈ si Kristu, saˈ miksibaluy getaw, maitaˈ diniin su tibuuk gasal nug Diwata Megbebayaˈ. ¹⁰ Mukaˈ migelaˈ dadema mengganget diniu su tantu ketubuˈ puun tu keksalabuuk niu diniin, su megbayaˈ dig launan meglekaunutan, saˈ maitaˈ, saˈ ndiˈ maitaˈ.

¹¹ Naa yamu, kagina miksalabuuk namu diniin, gitungan dun sinirkunsisu amu.+\fr 2:11 \ft Sug betad sirkunsisu, tinituluˈ nu Megbebayaˈ tu nga getaw Judea. Su gembataˈ laki, saˈ walu endaw genat di kegigetawen, tebiaˈ tuliˈen, puˈ guluganen, tuˈus puˈ getaw Judea, saˈitada getaw mektamuy tu Megbebayaˈ. Ki kesirkunsisu kini, kanaˈ puun di getaw, segaga puun dini Kristu, puˈ inawaˈen su tibuuk melaat gasal niu, adun kanaˈ nai melaat gayak niui megbayaˈ di ginaa niu. ¹² Puˈ su kekpebunag niu tubig, lepeng miksaliunung amu di kepatay ni Kristu mukaˈ di kelebeng dun. Saˈ ginawen amu dayun dia tubig, lepeng mipeduma amu di ketubuˈen puliˈ, puun tu kesalig niu di kuleg nu ginuung nu Megbebayaˈ, su mikpetubuˈ dun. ¹³ Bekna minggulaula amu melaat mukaˈ kanaˈ amu getaw Judea, saˈitada kanaˈ amu sakup nu Megbebayaˈ. Kaas pimilang nu Megbebayaˈ su ginaa niu minatay na. Laak dagid pia maˈantu, piduma amu nu Megbebayaˈ di ketubuˈ puliˈ ni Kristu. Puˈ pidasun ita niin dig launan melaat gulaula ta, ¹⁴ maˈniin iknasanen na su sinulat tandaˈ misulat puˈ subay gelaˈen ta dunutay su nga Palinta, kaas mukuman ita dun. Gilaˈen penguaˈay su sinulat kiin, puˈ su kepatay ni Kristu, maˈniin linansang su sinulat ditu kurus. ¹⁵ Su kepatay ni Kristu, dinaag dadema nu Megbebayaˈ su nga megbayaˈ mukaˈ meglekaunutan di ngag duma nilan ndiˈ maitaˈ, puˈ ilan, penenggiˈan dun, ilani midaapen di gubat, iini mikedaag dun. Lelayunen ilan dayun pegegakay megbukayang di ngag launan getaw.

¹⁶ Kaas, adini megdenaˈ diniu mekatag di maˈaan niu mukaˈ mainum niu, saˈ di nga gendaw pegbesaan, pia galep, saˈ Gendaw Pelali, petuyang niu ilan. ¹⁷ Kig launan tituluˈan kia, begudiin mibaal laak tuˈus nu pedetengen nu nga getaw Judea. Naa, ki pedetengen nilan kiin, minateng na. Iin si Kristu. ¹⁸ Petuyang da niu dema adin su getaw megdenaˈ diniu, laungen dun subay pebebaˈen ta laak dawig lawas ta mukaˈ pektemuyen ta daw su nga sesuguˈen nu Megbebayaˈ getaw langit. Petuyangen niu, puˈ laungen dun, su tituluˈanen, mikpuun daw tu kepenilungen tu pinitaˈ diniin daw nu Megbebayaˈ. Petuyangen da niu dema puˈ mikpelabawlabaw pagid di ndaˈi pantagen sabaˈ nug delendemanen kinilawan. ¹⁹ Petuyangen na niu pa pagid su kesuayen dini Kristu, su mekpaiseg di kesalig mukaˈ di keksalabuuk nu pikumpungan nu nga sakupen, mekatag di mauyaˈan nu Megbebayaˈ. Puˈ si Kristui Gulu megbayaˈ di ketulin nug lawas, pitibuuk nug lelenguˈanen mukaˈ gugaten. Mukaˈ su pikumpungan nu nga sakupenig lawasen kiin.

^20-21 Naa, miksalabuuk amu dini Kristu, lepeng mipeduma amu diniin matay. Ndaˈ naig labet niu dig betad kinilawan. Kaas ndiˈ na niu kambat petuuden sug betad nu kilawan, sug betad puun tu nga ndiˈ maitaˈ, su kektalenten gupia di ndiˈ mpia mbianan, di ndiˈ maˈaan sampay su ndiˈ mpuleg. Mauma dema mauyaˈan niu petuuden su ngag betad maˈnia? ²² Ki kelaun ndiˈ mpia mbianan, ndiˈ maˈaan mukaˈ ndiˈ mpuleg, mpupus saˈ mpenggulaula na. Kiaig betad mukaˈ tituluˈan binaal laak nu kilawan. ²³ Laung dun nu getaw puˈ melengas daw gupiaig betad maˈnia, puˈ menamal mektamuy pebian di tegel nu kilawan mekpebabaˈ dig lawasen, sampay mekpetukung dig lawasen. Sinangkaliˈ pa tanan, su ngag betad kia, ndaˈi pantagen megbayaˈ di melaat gayak, pia maikaˈ.