¹ Naan si Pablo, puun tu mauyaˈan nu Megbebayaˈ peneliganu ni Kristu Isus, mukaˈ si Timoteo su mimated dinita. ² Puitan nami amu sulat, yamu nga getaw diag lunsud Colosas pinaas na nu Megbebayaˈ mbaal daniin piglegetawan. Meseligan damu dema kepetedan nami puun tu keksalabuuk ta dini Kristu.

Penenebiin nami, begayan amu nu Gamaˈ ta Megbebayaˈ tulungen mukaˈ pianan ginaa.

³ Naa yamu, saˈ penenebian nami amu, mekpaladpalad ami lelayun tu Megbebayaˈ, su Gamaˈ nu Kaunutan ta si Isukristu. ⁴ Iini mekpaladpalad ami dun, midengeg nami puˈ mikpetuud amu dini Kristu Isus mukaˈ mekpetail amu dig launan samasakup ta tu Megbebayaˈ. ⁵ Ki kekpetuud mukaˈ kepetail niu, miksekat di pedetengen niu. Iin su pedetengen niu, duuni begay diniu mitaguˈ pa ditu gekbus langit. Daansamaˈ midengeg niu ia saˈ inukit diniu su metuud, saˈitada su Gempia Petenday. ⁶ Ki Gempia Petenday kini, mipelaktag diniu sampay di tibuukan benwa. Su nga mekpetuud dun, sigi ilan megdugang mukaˈ penggulaulaan nilan su gempia maaˈ nug daniu, puˈ pinggulaulaan niui melengas sikna midengeg niu su tulung nu Megbebayaˈ mukaˈ misabut niu puˈ tantu tulung. ⁷ Pisuunan amu dun ni Epafras, su petailen sama sesuguˈen ta, meseligan pegwekilan ni Kristu pibian di gabangen dinami. ⁸ Inukiten dinami su kepetail niu di nga samasakup niu, puun tug Balakat nu Megbebayaˈ.

⁹ Naa kagina maˈantu, sikna midengeg nami puˈ mekpetuud amu mukaˈ mekpetail amu di nga samasakup niu, penenebian nami amu lelayun. Penenebiin nami tu Megbebayaˈ pesuunen gupia diniu su mauyaˈanen baalen niu, saˈitada, begayen diniu sug launan gininisan tinawan mukaˈ telisebutay puun tug Balakat nu Megbebayaˈ. ¹⁰ Maˈantu pegbetaden niu dayun su mauyaˈan nu Kaunutan ta, sug leliagen dun iin lelayun maˈniniˈ, penggulaulaan niu su kelaun gempia, mukaˈ megisegi sinuunan niu mekatag di Megbebayaˈ. ¹¹ Penenebiin nami dadema, pepegenen gupia nu Megbebayaˈ su ginaa niu puun tu tampusan metaas ginuungen, adun metigel niu gusay su kelegenay niu, dunut leliagen amu dun, ¹² mukaˈ adun mekpaladpalad amu tu Gamaˈ ta ditug langit, puˈ bigayan amu niin mpeduma amu petengeday di tinaguˈ nu Megbebayaˈ di nga piglegetawanen, su mitaguˈ ditu gekbus langit. ¹³ Ginawen ita niin di medelem, saˈitada su keglekaunutan ni Satanas, mukaˈ pisakup ita niin di keglekaunutan nug Bataˈen petailenen gupia. ¹⁴ Puˈ puun tu pinggulaula nug Bataˈen, likat ita niin, pidasun ita niin di salaˈ ta.

¹⁵ Naa, kanaˈ maitaˈ su Megbebayaˈ. Si Kristu kini, iin su tantu palas nu Megbebayaˈ maitaˈ nu getaw. Iin dademai penganay Bataˈ nu Megbebayaˈ, metaas pa dig launan binaalen. ¹⁶ Puˈ pibaal diniin nu Megbebayaˈ su tibaˈan bitang di gekleb langit buˈ lupaˈ, su maitaˈ mukaˈ su ndiˈ maitaˈ, sug launan megbayaˈ di ngag diwata pia taˈ gelalay dun, saˈ meguit tug duma, saˈ meglekaunutan, saˈ meglegadiˈ. Binaal nu Megbebayaˈ su gekleb langit buˈ lupaˈ pebian diniin. Iini mibaal dun, adun pegbesaan si Kristu nu tibaˈan bitang. ¹⁷ Su ndaˈ pa mbaalig launanen, daan nain. Sikna mibaal nai tibaˈanen, iini megbayaˈ dun. ¹⁸ Iin su Kaunutan nu pikumpungan nu sakupen maˈniin nu gulu meguit tug lawasen, mukaˈ iin su puun nug begu ketubuˈ nilan, sampay sug bekna metubuˈ puliˈ, adun iin laaki tampusan pegbesaan dig launanen. ¹⁹ Puˈ pigdelendem nu Megbebayaˈ, su gasalen mukaˈ su gasal nug Bataˈen, iin da tanan. ²⁰ Mauyaˈan nu Megbebayaˈ peseksudenen diniin su tibaˈan getaw di gekleb langit buˈ lupaˈ pibian dini Kristu, adun mekesambat diniin sug launan getaw meksekat di kepatay ni Kristu ditu kurus.

²¹ Naa yamu, begudiin melayuˈ amu gupia ditu Megbebayaˈ. Migbanta amu gupia diniin miksekat di melaat gulaula niu mukaˈ melaat delendeman niu. ²² Dagid nandaw, pisambat amu nu Megbebayaˈ diniin pibian di tantu kepatay nug Bataˈen, adun paindegen amu di gedapanen di ndaˈi melamug dun melaat. Mukaˈ ndiˈ damu dema medangat, puˈ mekesuun namu tantu. ²³ Basta laak sumalig amu gusay diniin, saˈitada gempagen da gusayi kekpetuud niu mukaˈ ndiˈ niu begay pelinen su pedetengen niu dig launan pinasad nu Megbebayaˈ, su midengeg niu saˈ pisuunan amu di Gempia Petenday pilaktag na tug liwenagan benwa. Mukaˈ naan, si Pablo, iini tinduˈu dun ni Kristu sesuguˈenen, adun ukiten ku su Gempia Petenday.

²⁴ Naa nandaw, naan, liliagu di gabang nu kelegenayu diniu, puˈ megelaˈu mbianay su kelegenay tinduˈ ni Kristu mbianan ku saanan ku megabang dig lawasen, saˈitada su pikumpungan nu nga sakup ni Kristu. ²⁵ Iini tinduˈu dun nu Megbebayaˈ sesuguˈenu nu pikumpungan nu sakup, pigwekilanu niin megabang diniu pebian di kepesuun ku gupia di taluˈ nu Megbebayaˈ. ²⁶ Daansamaˈ pigbuni nu Megbebayaˈ ki taluˈ kiin, iglud begudiin di nga getaw mingasal menumpat di tibuukan benwa. Nandaw biwasan na nu Megbebayaˈ di nga piglegetawanen. ²⁷ Iini pigdelendem dun nu Megbebayaˈ buasanen di nga getawen sug daansamaˈ igluden, adun pepiananen sug launan bansa getaw. Kinii metuud biwasanen, yamu nga kanaˈ getaw Judea, pegbenwanan amu ni Kristu, guluganen mpeduma amu di kekpededengeg tu Megbebayaˈ ditug langit di ndaˈi tamanen. Ndaˈi tituluˈan melengas pa dini! ²⁸ Kaas megukit ami mekatag dini Kristu di tibuukan benwa. Pektituluˈen nami su nga getaw mukaˈ pektikuken nami, gikteb nu tinawan nami, puˈ adun, saˈ mekaindeg ilan di gedapan nu Megbebayaˈ, menggangeti kekesuun nu nga getaw suminalabuuk na dini Kristu. ²⁹ Kiai piginuunganu dun gupia ni Kristu, kaas meksitugesu megukit, gikteb di megagau.