¹ Diniˈa Timoteo,

Naan si Pablo, peneliganu ni Kristu Isus tinduˈ nu Megbebayaˈ mukaˈ sinuguˈu niin megukit di pinasaden puˈ adin su sumalabuuk dini Kristu Isus, iini mpeduunan ketubuˈ ndaˈi tamanen.

² Puitan ku yaˈa sulat, puˈ maˈniin ka bataˈu petailen ku.

Penenebiin ku tu Gamaˈ ta Megbebayaˈ mukaˈ tu Kaunutan ta si Kristu Isus, tulungen ka niin, lelaatan ka niin sampay pepiananeni ginaa niu.

³ Mendadi, mekpaladpaladu tu Megbebayaˈ, su pektemuyen ku di gempia delendeman. Pektemuyen ku iin maaˈ nu kektamuy dun nu ginepuˈayu. Mekpaladpaladu tu Megbebayaˈ saˈ medelendemu yaˈa lelayun su saanan ku menenabi gebii gendaw. ⁴ Puˈ ndaˈu selingaway su kengaduy mu di keksuay ta, kaas mauyaˈan ku gupia, mekitaˈ ita puliˈ, adun leliagenu dun gusay. ⁵ Midelendemu pa pagid su kektinantu kekpetuud mu, maˈniin nu kekpetuud nu gapuˈ mu si Loida mukaˈ danu ginaˈ mu si Eunice. Naa mituudanu dun maˈnia dademaig daniˈa. ⁶ Kagina maˈantu, tegyungen ku diniˈa, peguaˈ mu su tinawan bigay diniˈa nu Megbebayaˈ saˈ dipenan ku yaˈa. ⁷ Puˈ ita, kanaˈ iini bigay dinita dun nu Megbebayaˈ sug Balakaten adun menalaw ita. Segaga bigay dinita, adun mpeduunan ita pelum pegbayaˈ nug Balakaten, adun mekekpinetailay ita mukaˈ adun metau ita meguit tu ginaa ta.

⁸ Kaas, ndiˈa mpiid megukit mekatag di Kaunutan ta si Kristu. Ndiˈa dema mpiid di kekpikut dinaan kini sabaˈ nu kekpetuˈun ku mekatag diniin. Laak penemalay mu ukitay su Gempia Petenday pia mekpuun diai kelegenay mu, puˈ ebangan ka nu Megbebayaˈ, adun mekektigela di gulaula. ⁹ Puˈ su Megbebayaˈ, iin su guminawen dinita mukaˈ migenggat dinita mbaal ita nga piglegetawanen, puˈ su ndaˈ pa mbaali gekleb langit buˈ lupaˈ, kiaig delendemanen mekatag dinita. Kanaˈ puun tu pinggulaula ta pimaˈantunen dun, segaga mikpuun tu tulungen dinita pibian dini Kristu Isus. ¹⁰ Mukaˈ nemun mituaˈ dini su Meglegawen, si Kristu Isus, kaas mibuasan dinita kig delendemanen mukaˈ tulungen kia. Pinitaˈen dadema dinita su ketubuˈ ndaˈi tamanen, kaas maˈniinen tika sug lala nu gumul. Saˈitada, inawaˈen su gendek ta di kepatay puˈ inukit na dinita su Gempia Petenday.

¹¹ Naa, naan kini, tinduˈu nu Megbebayaˈ peneliganu ni Kristu Isus megukit Gempia Petenday mukaˈ mekpetituluˈu. ¹² Kagina peneliganu ni Kristu, mibianan kui kelegenayu kini. Laak dagid, ndiˈu mpiid dun, puˈ misuunan ku sug betad nu seligan ku si Kristu, mukaˈ mituudanu dun iin su metau megingat tu pisaligen dinaan sampay di Gendaw nu Kengukum nu Megbebayaˈ tug launan getaw. ¹³ Kaas, subay pektalentenay mu gupia su melegdeng tinaluˈu diniˈa, baalen mu gempia lendasan penunggilingan mu. Kagina suminalabuuk ita dini Kristu Isus, sumaliga gusay tu Megbebayaˈ mukaˈ melelaata gusay tu samasakup ta. ¹⁴ Pepianay mui keguit mu tu metuud sinalig diniˈa nug Balakat nu Megbebayaˈ, su megbenwa di ginaa ta.

¹⁵ Naa, su melaun samasakup ta diag benwa Asia, misuunan mu, tiliudanu nilan, bisan si Figelo mukaˈ si Hermogenes. ¹⁶ Su nga gapen ni Onesiforo pasiˈ, penenebiin ku tu Kaunutan ta lelaatanen ilan, puˈ si Onesiforo, iin laak su tatap mektukaw dinaan. Ndaˈ mpiid di kekpikut dinaan, ¹⁷ puˈ su kedatengen dinig Roma, pinemalanu niin dayun penengaway sampay mibaangan nau niin. ¹⁸ Kaas mpia lelaatan nu Kaunutan ta si Kristu Isus saˈ mateng nai Gendaw nu Kengukum nu Megbebayaˈ. Misuunan mu gupia su gembagel gabang dinaan ni Onesiforo su saanan ku diag Efeso.