¹ Diniˈa Tito,

Naan si Pablo, tinduˈu sesuguˈen nu Megbebayaˈ mukaˈ peneligan ni Isukristu.

Iini tinduˈu dun nu Megbebayaˈ, adun penggengeten ku pai kesalig nu nga getaw tinduˈen sumakup diniin, mukaˈ pesuun ku dinilan su metuud tituluˈan mekatag di kekpetuud ta. ² Puun tu kekpetuud ta, pedetengen nu nga sakupen puˈ metubuˈ ita di ndaˈi tamanen. Kia, pinasad dinita nu Megbebayaˈ su ndaˈ pa mbaali gekleb langit buˈ lupaˈ. Naa ndiˈ metau megbalus su Megbebayaˈ. ³ Ki pinasaden kia di ketubuˈ, su gendaw bantang pesuunenen, pisuun tuˈu nu Megbebayaˈ ditu nga sesuguˈenen, adun petenday nilan pelum tu nga getaw. Sampay naan, pisaligen dadema dinaan, adun ukitan ku dun dema su nga getaw. Kaas megukitu puun tu kesuguˈ dinaan nu Megbebayaˈ, su Meglegawen dinita.

⁴ Yaˈa Tito, maˈniin ka tantu bataˈu puun di keksalabuuk ta di kekpetuud ta.

Penenebiin ku tu Gamaˈ ta Megbebayaˈ mukaˈ dini Kristu Isus su Meglegawen dinita, begayan ka niin tulung mukaˈ pianan ginaa.

⁵ Naa Tito, iini binilin ku yaˈa dun ditug benwa Creta, puˈ adun peksibaˈan mu su ndaˈu pa metubus peksibaˈay, mukaˈ adun tenduˈen mui nga kaunutan nug launan pikumpungan nu nga sakup dia ngag lunsud. Kelelaat, ndiˈ mu selingaway ki tinituluˈu diniˈa kini. ⁶ Ki nga kaunutan nu pikumpungan, iin subayi metenduˈ, su kanaˈ medangat, sala tawan laaki sawanen, mukaˈ su ngag bataˈen, mekpetuud ilan dini Kristu sampay kanaˈ ilan megdedengeg mesungal atawaka medupang. ⁷ Kagina megbayaˈ tu pibaal nu Megbebayaˈ su meguit tu pikumpungan, subay kanaˈ medangat. Saˈitada, kanaˈ nu mekpelabawlabaw atawaka sempaun, kanaˈ nu megbebulek, kanaˈ nu melisualen mukaˈ kanaˈ nu mauyaˈanen dumatuˈ. ⁸ Iin sungkini gempia metenduˈ, su metau menembaˈ di memenaikan, penggengetenen dig delendemanen su gempia, su metau meguit tug delendemanen, mukaˈ mekesuun, ndaˈi melamug dun melaat, sampay metau megbayaˈ di gayaken. ⁹ Subay pektalentenan gusay nu meguit tu samasakupen su meseligan petenday mesanguˈ gupia nu tituluˈan ku, puˈ adun metituluˈen su ngag duma mekatag di metuud mukaˈ pengmetuudanen su nga kuminuntra tu metuud mekatag di gembagel sayep nilan.

¹⁰ Puˈ ki nga kuminuntra kia, metibaˈ mailan. Memilas ilan tu metuud, pegyegaan nilan su ndaˈi gatagen, mukaˈ peglimbungan nilan su nga samataw nilan. Labi na duuni nga getaw Judea suminakup na dini Kristu kuminuntra tu metuud. ¹¹ Naa, subay pemaag mu ilan, puˈ kanaˈ laak santaˈ enlangan peglibulengen nilan pebian di nga tituluˈan nilan kanaˈ gempia tituluˈan. Pektituluˈ nilan dun, adun laak tindanan nilan selapiˈ. Iini melengas, mpiid ilan dun! ¹² Ndaˈ ba metaluˈ nu suunan, sama nilan getaw Creta, “Ita nga getaw Creta! Belusen ita, maaˈ ita nu nga malig metetubuˈ, melelaˈ ita, mukaˈ medalu ita maan.” ¹³ Metuud daan su tinaluˈen kiin. Kaas, subay peligetan niu ilan tituluˈay, puˈ adun gempageni kekpetuud nilan, ¹⁴ mukaˈ adun ndiˈ na nilan pektalentenani nga sagya guksugan nu getaw Judea, mukaˈ nga pinalinta nu kilawan memilas tu metuud. ¹⁵ Naa, ki mekesuun getaw, pemilangenen mekesuun sug launanen. Su getaw pasiˈ kanaˈ mekesuun sampay ndaˈ pekpetuud dini Kristu Isus, mekesalaˈ tu Megbebayaˈ, puˈ migelaˈ melemuˈayig delendemanen sampay ndiˈ metau megbiksuˈ di melaat gulaulanen. ¹⁶ Laung nu getaw maˈnia puˈ suminambat tu Megbebayaˈ, laak kumalenged melaati gulaulanen, ndiˈen sembaten. Mesina dadema mukaˈ memilas gupia tu Megbebayaˈ, ndiˈen pa padun megaga baalay su gempia gulaula.